[1] Fɛn minw bilara pewu u dan na, Israɛl bɔnsɔn ye kanbilali kɛ olu ko la. Juda siya la Karmi denkɛ Akan ye o fɛn bilalen dɔw ta. Matigi ka dimiya wulila Israɛl bɔnsɔn kama. Karmi fa tun ye Zabdi ye. Zabdi fa tun ye Zerak ye.
[2] Josue ye cɛ dɔw ci ka bɔ Jeriko ka taa Ayi, o bɛ Bɛt-Avɛn kɛrɛ fɛ Bɛtɛl kɔrɔn yanfan fɛ. A y'a fɔ u ye ko: «Aw ka yɛlɛn ka taa o jamana ko lajɛ.» O cɛw yɛlɛnna ka taa Ayi ko lajɛ.
[3] O kɔ, u kɔseginna ka na Josue yɔrɔ, k'a fɔ a ye ko: «Kun t'a la mɔgɔ bɛɛ ka taa yen, cɛ waa fila wala waa saba ka taa Ayi ci. I kana mɔgɔw bɛɛ sɛgɛn ka taa yen, sabu Ayikaw man ca.»
[4] Cɛ waa sabaɲɔgɔn taara, nka olu bolila Ayikaw ɲɛ.
[5] Ayikaw ye cɛ bisaba ni wɔɔrɔɲɔgɔn faga u la. U ye u nɔgɛn ka bɔ dugu donda la fo ka taa se Sebarim, ka u tiɲɛn kulu jiginjigin yɔrɔ la. Mɔgɔw ja tigɛra fo u kɔnɔna fɛnw bɛɛ kɛra ji ye.
[6] Josue ye a ka finiw fara, a ni Israɛl cɛkɔrɔbaw y'u bi k'u ɲɛ biri duguma Matigi ka wagandeɲɛ fɛ fo wula da fɛ. U ye buguri kɛ u kun na.
[7] Josue y'a fɔ ko: «E Matigi Ala, mun na i ye Jurdɛn ba tigɛ ni nin mɔgɔw ye ka an don Amɔr siya bolo ka an halaki? Ni a y'a sɔrɔ ko an tun tora Jurdɛn ba kɔ fɛ!
[8] Hakɛ to, Matigi, ne na mun fɔ sa? k'a sɔrɔ Israɛl ye u kɔ sin u juguw ma.
[9] Kanankaw ni nin jamana mɔgɔw bɛɛ na o kibaru mɛn. U na an datugu ka an tɔgɔ ban ka bɔ dugukolo kan. I na mun kɛ i tɔgɔba kosɔn?»
[10] Matigi y'a fɔ Josue ye ko: «Wuli! Mun na i birilen bɛ i ɲɛda kan?
[11] Israɛl ye jurumu kɛ. Ne ye ne ka layidu min di u ma k'a gɛlɛya, u ye o tiɲɛn. Fɛn minw bilara pewu, u ye o dɔ ta. U ye sonyali ni nanbara kɛ ka o fɛnw dogo u ka minanw cɛma.
[12] O de kosɔn Israɛl ma se ka jɔ u juguw ɲɛ. U bɛ u kɔ sin u juguw ma, k'a masɔrɔ u dangalen bɛ. Ne tɛna to aw fɛ tun, fɔ ni aw ye o fɛn dangalen halaki ka bɔ aw cɛma.
[13] Wuli ka mɔgɔw saniya k'a fɔ ko u ka u yɛrɛw saniya sini kama. Matigi, Israɛl ka Ala ko: ‹Fɛn dangalen bɛ i cɛma Israɛl, i tɛna se ka jɔ i juguw ɲɛ fɔ ni aw ye o fɛn dangalen bɔ aw cɛma.
[14] Sini sɔgɔma aw ka madon yan siya-siya. Ni Matigi ye siya min jira, o ka madon gwa-gwa. Ni Matigi ye gwa min jira, o ka madon so-so. Ni Matigi ye so min jira, o ka madon cɛ-cɛ.
[15] Ni mɔgɔ min jirala ko o ye o fɛn bilalen pewu dɔ ta, o tigi ni a bolo fɛnw bɛɛ ka jeni ni tasuma ye, katuguni a ye Matigi ka layidu tiɲɛn ka ko kunntan kɛ Israɛl cɛma.›»
[16] Josue solila ka wuli. A ye Israɛl madon o yɔrɔ la siya-siya. Juda siya jirala.
[17] A ye Juda siya madon gwa-gwa. Zerak ka gwa jirala. A ye Zerak ka gwa madon so-so, Zabdi jirala.
[18] A ye Zabdi ka so madon cɛ-cɛ. Karmi denkɛ Akan jirala ka bɔ Juda siya la. Karmi fa tun ye Zabdi ye. Zabdi fa tun ye Zerak ye.
[19] Josue y'a fɔ Akan ye ko: «Ne denkɛ, i ka Matigi, Israɛl ka Ala bonya k'a tanu. I ye min kɛ, o fɔ ne ye, i kana a dogo ne la fewu.»
[20] Akan ye Josue jaabi ko: «Tiɲɛ la, ne ye Matigi, Israɛl ka Ala hakɛ ta. Ne ye ko min kɛ, o filɛ nin ye.
[21] Ne ye Sinear dulɔkiɲuman ye fɛn cɛlenw la ani warijɛ sikle kɛmɛ fila ani sanu kuru, a bɛ sikle biduuru bɔ. Neɲɛ bɔra olu fɛ, ne ye u ta. U dogolen bɛ dugukolo rɔ ne ka finiso cɛmancɛ la, warijɛ bɛ u jukɔrɔ.»
[22] Josue ye mɔgɔw ci ka taa. U bolila ka se o finiso ma. A filɛ, o fɛnw dogolen tun bɛ Akan ka finiso kɔnɔ. Warijɛ tun bɛ u jukɔrɔ.
[23] U ye o fɛnw ta ka bɔ finiso kɔnɔ ka taa ni u ye Josue ni Israɛl bɔnsɔn bɛɛ yɔrɔ ka u bila Matigi ɲɛ kɔrɔ.
[24] Josue ni Israɛl bɛɛ ye Zerak denkɛ Akan ni o warijɛ ni o dulɔki ni o sanu kuru ani Akan denkɛw ni a denmusow ani a ka misiw ni a ka faliw ni a ka sagaw ni a ka finiso ani a bolo fɛnw bɛɛ cɛ ka yɛlɛn ka taa ni u ye Akor jɛkɛnɛ la.
[25] Josue ko: «Mun na i ye an tɔɔro? Matigi na i tɔɔrɔ bi.» Israɛl bɛɛ y'a bon ni kabakurunw ye. U bonnen kɔ ni kabakurunw ye, u ye u jeni ni tasuma ye.
[26] O kɔ, u ye kabakurunw caman ton Akan kan. U bɛ yen halibi. Matigi yɛlɛmana, a ka dimiya banna. O de kosɔn o yɔrɔ tɔgɔ dara ko Akɔr jɛkɛnɛ fo ka na se bi ma.