[1] Matigi y'a fɔ Josue ye ko: «I kana siran, i ja kana tigɛ. Wuli ka taa ni kɛlɛkɛ cɛw bɛɛ ye Ayi kama. A filɛ, ne ye Ayi masakɛ ni a ka mɔgɔw ni a ka dugu ani a ka jamana don i bolo.
[2] I ye min kɛ Jeriko ni a masakɛ la, i ka o bɔɲɔgɔnko kɛ Ayi ni a masakɛ la, nka aw ka a nafolo ni a baganw cɛ ka to ni u ye. I ka mɔgɔ dɔw dogo dugu kɔ fɛ.»
[3] Josue ni kɛlɛkɛ cɛw bɛɛ wulila ka taa Ayi kama. Josue ye cɛ farinma ja gɛlɛnw waa bisabaɲɛnatɔmɔ olu la ka u bila ka taa su fɛ.
[4] A y'a fɔ u ye ko: «A' ye aw tulo majɔ, aw ka taa aw dogo dugu kɔ fɛ. Aw kana aw yɔrɔ janya dugu la kosɛbɛ, aw bɛɛ labɛnnen ka to.
[5] Ne ni ne fɛ mɔgɔ bɛɛ na gɛrɛ dugu la. Ni u bɔra ka an kunbɛn i ko fɔlɔ cogo, an na boli u ɲɛ.
[6] U na an nɔgɛn, an na u nɛgɛn ka u mabɔ dugu la, sabu u n'a fɔ ko an bɛ boli u ɲɛ i ko fɔlɔ cogo. Ayiwa an na boli u ɲɛ.
[7] O tuma la aw ka wuli ka bɔ aw dogo yɔrɔ la ka dugu minɛ. Matigi, aw ka Ala na a don aw bolo.
[8] Ni aw ye dugu minɛ tuma min na, aw ka tasuma don a la. Aw k'a kɛ i ko Matigi y'a fɔ cogo min na. Ne ye o ci di aw ma.»
[9] Josue ye u bila ka taa. U taara ka u dogo Bɛtɛl ni Ayi furancɛ la, Ayi tilebi yanfan fɛ, nka Josue sira mɔgɔ tɔw cɛma o su fɛ.
[10] Josue solila ka wuli ka mɔgɔw lajɛɲɔgɔn fɛ. Ale ni Israɛl cɛkɔrɔbaw taara mɔgɔw ɲɛ fɛ Ayi kama.
[11] Kɛlɛkɛ cɛ minw tun bɛ a fɛ, olu gɛrɛla dugu la ka daga sigi Ayi ni saheli yanfan cɛ. Kuluw furancɛ tun bɛ u ni Ayi cɛ.
[12] A ye cɛ waa duuruɲɔgɔn dogo Bɛtɛl ni Ayi furancɛ la dugu ni tilebi yanfan cɛ.
[13] U ye mɔgɔw sigi tan, kɛlɛbolo kelen tun bɛ dugu ni saheli yanfan cɛ, mɔgɔ dogolenw tun bɛ dugu ni tilebi yanfan cɛ. O su fɛ Josue taara kuluw furancɛ la.
[14] Ayi masakɛ ye o ye tuma min na, Ayikaw solila ka wuli ka tɛliya. U bɔra ka taa Israɛl kɛlɛ. Masakɛ ni a ka mɔgɔw bɛɛ taara yɔrɔ latigɛlen na jɛkɛnɛ fan fɛ. A tun m'a dɔn ko mɔgɔw dogolen bɛ dugu kɔ fɛ a kama.
[15] Josue ni Israɛl bɛɛ y'a kɛ i n'a fɔ u juguw ye se sɔrɔ u kan. U bolila u ɲɛ ka taa kungokolon sira fɛ.
[16] Ayiwa, dugu kɔnɔ mɔgɔw bɛɛ welela ka taa u nɔgɛn. U ye Josue nɔgɛn fo ka u mabɔ dugu la.
[17] Cɛ si ma to Ayi ni Bɛtɛl kɔnɔ ni min ma bɔ ka taa Israɛl nɔ fɛ. U ye dugu dayɛlɛlen to ka Israɛl nɔgɛn.
[18] Matigi y'a fɔ Josue ye ko: «Tama min bɛ i bolo, o yankan k'a sin Ayi fan fɛ, katuguni ne bɛna a don i bolo.» Tama min tun bɛ Josue bolo, a ye o yankan k'a sin dugu fan fɛ.
[19] A ye a bolo mɔɔnɔbɔ, o yɔrɔ nin bɛɛ, cɛ dogolenw tɛliyara ka wuli ka bɔ u dogo yɔrɔ la. U bolila ka don dugu kɔnɔ k'a minɛ ka tasuma don a la joona.
[20] Ayikaw ye u kɔ filɛ, u ye dugu jeni sisi yɛlɛntɔ ye san fɛ. Fanga tun tɛ u la tun ka boli ka dan kɛ yɔrɔ si la. Mɔgɔ minw tun bɛ boli ka taa kungokolon fan fɛ, olu ye u yɛlɛma u nɔgɛnbaaw kama.
[21] Josue ni Israɛl bɛɛ y'a ye ko mɔgɔ dogolenw ye dugu minɛ tuma min na ka dugu jeni sisi yɛlɛntɔ fana ye, o tuma la u ye u yɛlɛma ka Ayikaw faga.
[22] Israɛl mɔgɔ tɔw bɔra dugu kɔnɔ ka taa u kama. Israɛl ye Ayikaw kooli fan bɛɛ la. Israɛl ye u faga ka u si tunun. Mɔgɔ si ma kisi.
[23] U ye Ayi masakɛ ɲɛnama minɛ ka taa n'a ye Josue yɔrɔ.
[24] Israɛl ye Ayikaw bɛɛ faga u nɔgɛn yɔrɔ la kungokolon kɔnɔ. U fagara ni npan ye fo ka u ban. O kɛlen kɔ, Israɛl bɛɛ kɔseginna ka taa Ayi ka npan kɛ k'a ci.
[25] O don na mɔgɔ fagalen dama tun bɛ mɔgɔ waa tan ni fila bɔ, cɛw ni musow, Ayikaw bɛɛ.
[26] Tama yankannen tora Josue bolo, a ma o lajigin fo ka Ayikaw bɛɛ halaki ka u ban tuma min na.
[27] Nka Israɛl ye o dugu baganw ni a nafolo cɛ ka to ni u ye ka kɛɲɛ ni Matigi ka ci fɔlen ye Josue ye.
[28] Josue ye Ayi jeni k'a kɛ tomon ye badaa. A bɛ ten halibi.
[29] A ye Ayi masakɛ dulon jiri la k'a to yen fo wula da fɛ. Tile bi tuma la Josue y'a fɔ ko u ka a su lajigin ka bɔ jiri la k'a fili dugu donda la ka kabakurun caman ton a kan. U bɛ yen halibi.
[30] O tuma la Josue ye saraka bɔlan jɔ Ebal kulu kan Matigi, Israɛl ka Ala ye,
[31] i ko Matigi ka jɔnkɛ Musa y'a fɔ Israɛl bɔnsɔn ye cogo min na, i ko a sɛbɛnna Musa ka sariya kitabu la cogo min na fana. O saraka bɔlan jɔra ni kabakurun dɛsɛbaliw ye, nɛgɛma fɛn si ma gosi u la. U ye saraka jenitaw faga ka nisɔndiya sarakaw bɔ Matigi ye o saraka bɔlan kan.
[32] Musa tun ye sariya min sɛbɛn Israɛl bɔnsɔnɲɛ na, Josue ye o kumaw sɛbɛn o kabakurunw kan.
[33] Israɛl bɛɛ, u cɛkɔrɔbaw ni u kuntigiw ani u ka kiritigɛlaw, siginfɛ fara jamanaden kan, olu bɛɛ jɔra wagande fan fila fɛ, wagande donibaa sarakalasebaaw Levitew ɲɛ fɛ. Mɔgɔw tilancɛ tun bɛ Garizim kulu fan fɛ, u tilancɛ dɔ tun bɛ Ebal kulu fan fɛ ka dubaw kɛ Israɛl mɔgɔw ye ka kɛɲɛ ni Matigi ka jɔnkɛ Musa ka ci fɔlen fɔlɔ ye.
[34] O kɔ, Josue ye sariya kuma bɛɛ kalan, a duba kumaw ni a dangali kumaw ka kɛɲɛ ni sariya kitabu ko sɛbɛnnen bɛɛ ye.
[35] Musa ye ko minw bɛɛ sɛbɛn, o kuma si ma to ni Josue ma o kalan Israɛl jama bɛɛ ɲɛ na, musow ni denmisɛnw ani siginfɛ minw tun bɛ u cɛma, a kalanna olu fanaɲɛ na.