[1] O tuma la Levitew ka gwaw kuntigiw taara sarakalasebaa Eleazar ni Nun denkɛ Josue ani Israɛl siyaw ka gwaw kuntigiw sɛgɛrɛ
[2] Silo, Kanan jamana la k'a fɔ u ye ko: «Matigi ye ci di Musa ma ko a ka dugubaw di an ma, an ka sigi yen ka olu laminiw di an ma an ka baganw kosɔn.»
[3] Ayiwa, Israɛl bɔnsɔn ye u ciyɛn na dugu minw ni u laminiw di Levitew ma ka kɛɲɛ ni Matigi ka kuma fɔlenw ye, olu filɛ ninw ye.
[4] Kala fɔlɔ dara Kɛhat bɔnsɔn ka gwaw ye. Levitew sarakalasebaa Aron denkɛw ye dugu tan ni saba sɔrɔ kala dali la ka bɔ Juda bɔnsɔn ni Simeɔn bɔnsɔn ani Benjamɛn bɔnsɔn ka dugukolow la.
[5] Kɛhat denkɛ tɔw ye dugu tan sɔrɔ kala dali la ka bɔ Efrayim bɔnsɔn ni Dan bɔnsɔn ani Manase siya tilancɛ ka dugukolow la.
[6] O kɔ, Gersɔn bɔnsɔn ye dugu tan ni saba sɔrɔ kala dali la ka bɔ Isakar bɔnsɔn ni Asɛr bɔnsɔn ni Nefitali bɔnsɔn ani Manase siya tilancɛ ka dugukolow la Basan jamana la.
[7] Mɛrari bɔnsɔn ye dugu tan ni fila sɔrɔ ka kɛɲɛ ni u ka gwaw ye ka bɔ Rubɛn bɔnsɔn ni Gad bɔnsɔn ani Zabulɔn bɔnsɔn ka dugukolow la.
[8] Israɛl bɔnsɔn ye nin duguw ni u laminiw di Levitew ma kala dali la ka kɛɲɛ ni Matigi ka ci fɔlen ye Musa fɛ.
[9] Ayiwa, dugu minw bilara ka kɛ Levitew ta ye, u ye olu di ka bɔ Juda bɔnsɔn ni Simeɔn bɔnsɔn ka dugukolow la.
[10] Olu kɛra Aron bɔnsɔn ta ye. Kala da ko fɔlɔ kɛra Levi bɔnsɔn Aron denkɛ Kɛhat ta ye.
[11] U ye Kirjat-Araba ni a laminiw di u ma Juda kulu jamana la, o ye Heborɔn ye. Araba tun ye Anak fa ye.
[12] O duguw ni a laminiw dugukolow ni o dugu misɛnw dira a tigi Jefune denkɛ Kalɛb ma tuma min na,
[13] bolibaa kalifadon dugu dira sarakalasebaa Aron bɔnsɔn ma o tuma la, k'a kɛ mɔgɔ fagala taa dugu ye. O kɛra Heborɔn ni a laminiw ni Libina ni a laminiw
[14] ni Jatir ni a laminiw ni Estemoa ni a laminiw
[15] ni Holɔn ni a laminiw ni Debir ni a laminiw
[16] ni Ayin ni a laminiw ni Juta ni a laminiw ani Bɛt-Semɛs ni a laminiw ye. O kɛra dugu kɔnɔntɔn ye ka bɔ o siya fila la.
[17] Yɔrɔ minw dira u ma ka bɔ Benjamɛn siya ka dugukolo la, o kɛra Gabaon ni a laminiw ni Geba ni a laminiw
[18] ni Anatɔt ni a laminiw ani Alimɔn ni a laminiw ye. Olu ye dugu naani ye.
[19] Sarakalasebaa Aron bɔnsɔn ka duguw kɛra dugu tan ni saba ye ani u laminiw.
[20] Kɛhat bɔnsɔn tɔ minw ye Levi siya ye, olu ye Efrayim bɔnsɔn ka dugu dɔw sɔrɔ kala dali la.
[21] Dugu dɔ dira u ma ka kɛ mɔgɔ fagala ka yɛrɛ kalifadon yɔrɔ ye. O kɛra Sisɛm ni a laminiw ye Efrayim kulu jamana la ani Gezɛr ni a laminiw
[22] ni Kibzaim ni a laminiw ani Bɛt-Horɔn ni a laminiw. Olu ye dugu naani ye.
[23] Dan bɔnsɔn la, u ye dugu minw di, olu kɛra Elteke ni a laminiw ni Gibetɔn ni a laminiw
[24] ni Ajalɔn ni a laminiw ani Gat-Rimɔn ni a laminiw ye. Olu ye dugu naani ye.
[25] Minw dira ka bɔ Manase siya tilancɛ ka dugukolo la, o kɛra Tanak ni a laminiw ani Gat-Rimɔn ni a laminiw ye. Olu ye dugu fila ye.
[26] O bɛɛ lajɛlen kɛra dugu tan ye ani u laminiw. U kɛra Kɛhat bɔnsɔn taw ye.
[27] Dɔ fana dira Levi bɔnsɔn Gersɔn bɔnsɔn ka gwa kelen ma ka bɔ Manase siya tilancɛ ka dugukolo la k'a kɛ kalifadon dugu ye mɔgɔ fagala kosɔn. O kɛra Golan ye Basan jamana la ani a laminiw ani Beɛstra ni a laminiw. Olu ye dugu fila ye.
[28] Minw dira ka bɔ Isakar siya ka dugukolo la, olu kɛra Kisijɔn ni a laminiw ani Dabarat ni a laminiw
[29] ni Jarmut ni a laminiw ni En-Ganim ni a laminiw ye. Olu ye dugu naani ye.
[30] Minw dira ka bɔ Asɛr siya ka dugukolo la, o kɛra Miseal ni a laminiw ni Abidɔn ni a laminiw
[31] ni Helkat ni a laminiw ani Rehɔb ni a laminiw ye. Olu ye dugu naani ye.
[32] Minw dira ka bɔ Nefitali siya ka dugukolo la, o mɔgɔ fagala kalifadon dugu kɛra Kadɛs ni a laminiw ye Galile jamana la ani Hamɔt-Dɔr ni a laminiw ni Karitan ni a laminiw. Olu ye dugu saba ye.
[33] Gersɔn bɔnsɔn ka duguw bɛɛ lajɛlen kɛra dugu tan ni saba ye ani u laminiw ka kɛɲɛ ni u ka gwaw ye.
[34] Mɛrari bɔnsɔn tɔ minw tun tora ka bɔ Levitew la, dugu minw dira olu ma ka bɔ Zabulɔn siya ka dugukolo la, o kɛra Jokneam ni a laminiw ye ani Karita ni a laminiw
[35] ni Dimna ni a laminiw ani Nahalal ni a laminiw. Olu ye dugu naani ye.
[36] Minw dira ka bɔ Rubɛn siya ka dugukolo la, o kɛra Bezɛr ni a laminiw ye ani Jatisa ni a laminiw
[37] ni Kedemɔt ni a laminiw ani Mefat ni a laminiw. Olu ye dugu naani ye.
[38] Minw dira ka bɔ Gad siya ka dugukolo la, mɔgɔ fagala kalifadon dugu kɛra Ramɔt ye Galad jamana la ani a laminiw
[39] ani Mahanayim ni a laminiw ni Hesibɔn ni a laminiw ani Jaezɛr ni a laminiw. Olu bɛɛ kɛra dugu naani ye.
[40] Dugu minw dira Mɛrari bɔnsɔn Levite tɔ tolenw ma kala dali la ka kɛɲɛ ni u ka gwaw ye, olu bɛɛ lajɛlen kɛra dugu tan ni fila ye.
[41] Levitew ka dugu minw bɔra Israɛl bɔnsɔn niyɔrɔw cɛma, olu bɛɛ lajɛlen kɛra dugu binaani ni segin ye ani u laminiw.
[42] O duguw bɛɛ kelen-kelen ni a lamini dugukolow tun don. O duguw bɛɛ tun bɛ cogo kelen na.
[43] Ayiwa Matigi tun y'i kali ka jamana min di u bɛnbaw ma, a ye o bɛɛ di Israɛl bɔnsɔn ma. U y'a minɛ ka kɛ u ta ye, ka u sigi a kɔnɔ.
[44] Matigi ye lafiya di u ma u fan bɛɛ la i ko a tun y'i kali u bɛnbaw ye cogo min na. U juguw si ma se ka wuli u kama. Matigi ye u juguw bɛɛ don u bolo.
[45] Hali Matigi ka layidu kumaɲuman kelenpe ma to ni a ma min kɛ Israɛl ka so ye. A bɛɛ kɛra ka dafa.