[1] Hazɔr masakɛ Jabɛn ye o kow mɛn tuma min na, a ye cidenw bila ka taa Madɔn masakɛ Jobab ani Simrɔn masakɛ ni Akisaf masakɛ sɛgɛrɛ,
[2] ani masakɛ minw tun bɛ kulu saheli yanfan fɛ ani jɛkɛnɛ la Kinerɛt worodugu yanfan fɛ ani kɛnɛba la ani Dor kulu kan tilebi yanfan fɛ.
[3] A ye ci bila fana ka taa Kanankaw fɛ, olu minw tun bɛ kɔrɔn ni tilebi yanfan fɛ ani Amɔr siya ni Hɛti bɔnsɔn ni Ferɛz siya ani Jebuskaw fɛ kulu jamana la ani Hev siya fɛ Hermɔn kulu kɔrɔ Mizpa jamana la.
[4] U bɔra, u ni u ka kɛlɛkɛ cɛw bɛɛ. U kɛra jamaba ye i ko kɔgɔji dala cɛncɛn. U ka sow ni u ka wotorow tun ka ca kosɛbɛ.
[5] O masakɛw bɛɛ ye ɲɔgɔn lajɛ ka daga sigi Merɔm ji da fɛ Israɛl kɛlɛli kama.
[6] Matigi y'a fɔ Josue ye ko: «I kana siran u ɲɛ fewu sabu siniɲan tuma, ne na u bɛɛ fagalen don Israɛl bolo. I ka u ka sow kɔsen fasaw tigɛ ka u ka wotorow jeni ni tasuma ye.»
[7] Ayiwa Josue ni a ka kɛlɛkɛ cɛw bɛɛ taara u kama, ka cun u kan Merɔm ji da fɛ ka bi u kan.
[8] Matigi ye u don Israɛl bɔnsɔn bolo. Israɛl ye u tiɲɛn ka u nɔgɛn fo ka taa se Sidɔn duguba ma ka taa se Misirefɔt-Maim ka taa se Mizpa kɛnɛba la kɔrɔn yanfan fɛ. U ye u tiɲɛn ka u ban, hali kelen ma dan kɛ.
[9] Matigi tun ye min fɔ Josue ye, a ye o bɛɛ kɛ. A ye u ka sow kɔsen fasaw tigɛ ka u ka wotorow jeni ni tasuma ye.
[10] O tuma la Josue kɔsegintɔ ye Hazɔr minɛ ka a masakɛ faga ni npan ye, k'a masɔrɔ Hazɔr tun ye o mara yɔrɔw bɛɛ la masadugu ye ka kɔrɔ.
[11] U ye a kɔnɔ mɔgɔw faga ni npan ye ka u bɛɛ halaki ka u ban. Hali u kelenɲɛnama ma to. U ye Hazɔr jeni ni tasuma ye.
[12] Josue ye npan kɛ ka o masakɛw ka duguw bɛɛ minɛ ka u ci ka masakɛw bɛɛ fana minɛ ka u halaki ka u ban ka kɛɲɛ ni Matigi ka jɔnkɛ Musa ka ci fɔlen ye.
[13] Dugu minw sigilen tun bɛ tintinw kan, Israɛl ma o si jeni ni Hazɔr tɛ. Josue ye o de jeni.
[14] Israɛl bɔnsɔn ye o duguw nafolo bɛɛ ni u ka baganw bɛɛ cɛ ka to ni u ye, nka u ye mɔgɔw bɛɛ faga ni npan ye ka u si tunun. Hali u kelenɲɛnama ma to.
[15] Matigi ye ci minw fɔ a ka jɔnkɛ Musa ye, Musa ye o bɛɛ fɔ Josue ye. Matigi ye ci minw fɔ Musa ye, Josue ye olu bɛɛ kɛ ka u dafa.
[16] Ayiwa Josue ye jamana bɛɛ minɛ k'a daminɛ kulu jamana la ka taa se worodugu yanfan jamana bɛɛ ma ani Gosɛn jamana bɛɛ ni kɛnɛba ni jɛkɛnɛ ani Israɛl ka kulu jamana ni a kɛnɛba
[17] k'a daminɛ kulu lankolon na, o bɛ bɔ Seir fan fɛ ka taa se Bal-Gad ma, Liban kɛnɛba la Hermɔn kulu kɔrɔ. A ye o masakɛw bɛɛ minɛ ka u gosi ka u faga.
[18] Josue mɛnna o masakɛw kɛlɛli la.
[19] Dugu si ma hɛrɛ ɲini Israɛl bɔnsɔn fɛ ni Hev bɔnsɔn tɛ, olu minw sigilen tun bɛ Gabaon. Ni olu tɛ, u ye tɔw bɛɛ kɛlɛ ka u minɛ.
[20] Matigi ye u dusu gɛlɛya fo u ye Israɛl kɛlɛ walisa a ka u halaki ka u ban. Israɛl kana na makari u la, nka a ka u halaki, i ko Matigi y'a fɔ Musa ye cogo min na.
[21] O tuma la Josue tugura Anak bɔnsɔn nɔ fɛ ka u halaki ka u ban ka bɔ kulu jamana la, ani Heborɔn ni Debir ni Anak ni Juda kulu jamana bɛɛ ani Israɛl kulu jamana bɛɛ. Josue ye o mɔgɔw ni u ka duguw halaki ka u ban.
[22] Anak bɔnsɔn mɔgɔ si ma to Israɛl jamana la fo Gaza ni Gat ani Asdɔd.
[23] Ayiwa, Josue ye jamana bɛɛ minɛ i ko Matigi tun y'a fɔ Musa ye cogo min na. Josue ye o di Israɛl ma ciyɛn ye k'a tilatila u siyaw bɛɛ cɛ. Kɛlɛ banna, jamana ye lafiya sɔrɔ.