[1] Israɛl bɔnsɔn jama bɛɛ ye ɲɔgɔn lajɛ Silo kaɲɔgɔn kunbɛn finiso jɔ yen. U ye se sɔrɔ jamana bɛɛ kan.
[2] Nka Israɛl bɔnsɔn siya tɔ wolonwula tun ma u ciyɛn sɔrɔ fɔlɔ.
[3] O tuma la, Josue y'a fɔ Israɛl bɔnsɔn ye ko: «Matigi, aw bɛnbaw ka Ala ye jamana min di aw ma, o minɛli salaya na kɛ aw la fo tuma jumɛn?
[4] Aw ka cɛ saba-sabaɲɛnatɔmɔ ka bɔ siyaw bɛɛ la. Ne na olu ci, u na yaala jamana yɔrɔ bɛɛ la k'a danw ci k'a tilatila, o kɔ, ka na ne yɔrɔ ni o dan cilenw sɛbɛnw ye.
[5] U ka a tilatila ka kɛ niyɔrɔ wolonwula ye. Juda na sigi o dancɛ worodugu yanfan fɛ. Yusufu ka so na sigi o dancɛ saheli yanfan fɛ.
[6] Aw ka o jamana danw ci wolonwula ye ka o sɛbɛn ka na n'a ye ne yɔrɔ yan. Ne na kala da aw ye Matigi, an ka Ala ɲɛ kɔrɔ yan.
[7] Levitew tɛna niyɔrɔ si sɔrɔ aw cɛma, k'a masɔrɔ Matigi ka sarakalasebaaya ye u niyɔrɔ ye. Gad ni Rubɛn ani Manase siya tilancɛ ye u niyɔrɔ sɔrɔ Matigi ka baaraden Musa fɛ Jurdɛn ba fan dɔ fɛ kɔrɔn yanfan fɛ.»
[8] O tuma la o mɔgɔw wulila ka taa. Minw bɛ taa ka jamana danw tigɛ, Josue ye nin ci di olu ma k'a fɔ u ye ko: «A' ye taa jamana yaala k'a dan tigɛ. O kɔ, aw ka segin ka na ne yɔrɔ ni o dan sɛbɛnw ye yan. Ne na kala da aw ye Matigi ɲɛ kɔrɔ Silo.»
[9] O tuma la u taara ka jamana yaala ka a danw tigɛ k'a kɛ wolonwula ye ka kɛɲɛ ni u dugubaw ye ka u sɛbɛn kitabu dɔ kɔnɔ, ka na ni olu ye Josue yɔrɔ bugufyɛ la Silo.
[10] Ayiwa Josue ye kala da u ye Matigi ɲɛ kɔrɔ Silo. Josue ye jamana tilatila Israɛl bɔnsɔn cɛ yen ka kɛɲɛ ni u niyɔrɔw ye.
[11] Benjamɛn bɔnsɔn siya ka kala dara ka kɛɲɛ ni u ka gwaw ye. U niyɔrɔ dugukolo kɛra Juda bɔnsɔn ni Yusufu bɔnsɔn cɛ.
[12] U saheli yanfan dancɛ daminɛna Jurdɛn ba la ka yɛlɛn ka taa Jeriko ni saheli cɛ ka tɛmɛn ka taa kulu jamana cɛ tigɛ ka taa tilebi yanfan fɛ fo ka taa se Bɛt-Avɛn kungokolon ma.
[13] A dancɛ bɔra yen ka taa ka tɛmɛn Luz ni worodugu cɛ, o ye Bɛtɛl ye. O kɔ, a jiginna ka taa Atarɔt-Adar duguma Bɛt-Horɔn kulu kɛrɛ fɛ worodugu yanfan fɛ.
[14] O kɔ, tilebi yanfan dancɛ munumununa ka taa worodugu yanfan fɛ, kulu min bɛ Bɛt-Horɔn kuntilenna la worodugu yanfan fɛ, ka bɔ o la ka taa bila Kirjat-Bal, o ye Kirjat-Jearim ye. O ye Juda bɔnsɔn ka duguba ye. O kɛra a tilebi yanfan dan ye.
[15] A worodugu yanfan dan bɔra Kirjat-Jearim ka sin ka taa tilebi yanfan fɛ ka dan Neftoak ji boyi la.
[16] O kɔ, a jiginna ka se kulu dan ma, o bɛ Bɛn-Hinɔm ka kɛnɛba kuntilenna la, Refaim siya ka kɛnɛba la saheli yanfan fɛ. A tɛmɛnna Hinɔm kɛnɛba fɛ ka taa Jebuskaw ka jamana ni worodugu cɛ, fo ka taa bila En-Rogɛl.
[17] A tɛmɛnna saheli yanfan fɛ fo ka taa se En-Semɛs ka taa se Gelilɔt, o bɛ Adumim yɛlɛn yɔrɔ kuntilenna la ka taa se Rubɛn bɔnsɔn Bohan ka dancɛ kabakurun ma,
[18] ka yɛlɛn ka taa saheli yanfan kɛnɛba fan fɛ ka taa bila Araba la.
[19] A jiginna ka tɛmɛn Bɛt-Hogila saheli yanfan fɛ fo ka taa se Jurdɛn ba bila yɔrɔ la Kɔgɔji Misɛn na worodugu yanfan fɛ. O kɛra a worodugu yanfan dancɛ ye.
[20] Jurdɛn ba kɛra a kɔrɔn yanfan dancɛ ye. Olu tun ye Benjamɛn bɔnsɔn ciyɛnw ye. O kɛra u dancɛ ye u fan bɛɛ la ka kɛɲɛ ni u ka gwaw ye.
[21] Benjamɛn bɔnsɔn siya ka duguw filɛ ninw ye ka kɛɲɛ ni u ka gwaw ye, Jeriko ni Bɛt-Hogila ni Emɛk-Keziz
[22] ni Bɛt-Araba ni Zemarayim ni Bɛtɛl
[23] ani Avim ni Para ni Ofira
[24] ni Kefar-Amonai ni Ofni ani Geba, o ye dugu tan ni fila ye ani u dafɛ dugu misɛnw.
[25] Gabaon ni Rama ni Beɛrɔt
[26] ni Mizpe ni Kefira ni Moza
[27] ani Rekɛm ni Jirpeɛl ni Tareala
[28] ni Zela ni Elɛf ni Jebus, o ye Jerusalɛm ye, ani Gibeat ni Kirjat, o ye dugu tan ni naani ye ani u dafɛ dugu misɛnw. O kɛra Benjamɛn bɔnsɔn ciyɛn ye ka kɛɲɛ ni u ka gwaw ye.