[1] Josue solila ka wuli. A ni Israɛl bɔnsɔn bɛɛ bɔra Sitim ka taa Jurdɛn ba da la. U tora yen sani u ka ba tigɛ.
[2] Tile saba tɛmɛnnen kɔ, kuntigiw ye bugufyɛ yaala
[3] ka nin ci fɔ mɔgɔw ye ko: «Ni aw ye Matigi, aw ka Ala ka layidu wagande talen ye sarakalasebaaw Levitew fɛ tuma min na, aw ka bɔ aw ka yɔrɔ la ka tugu a nɔ fɛ.
[4] Aw ka kilomɛtɛrɛ kelenɲɔgɔn to aw ni wagande cɛ, aw kana gɛrɛ a la. A na aw ka sira jira aw la, k'a masɔrɔ aw ma tɛmɛn nin sira fɛ fɔlɔ.»
[5] Josue y'a fɔ mɔgɔw ye ko: «A' ye aw yɛrɛw saniya, k'a masɔrɔ Matigi na kabakow kɛ aw cɛma sini.»
[6] Josue y'a fɔ sarakalasebaaw ye ko: «Aw ka layidu wagande ta ka tɛmɛn mɔgɔw ɲɛ.» U ye layidu wagande ta ka taa mɔgɔw ɲɛ.
[7] Matigi y'a fɔ Josue ye ko: «Ne n'a daminɛ ka i kɔrɔta Israɛl bɛɛ ɲɛ na bi, walisa u k'a dɔn ko ne na to i fɛ i ko ne tora Musa fɛ cogo min na.
[8] Sarakalasebaa minw bɛ layidu wagande doni, i ka nin ci fɔ olu ye ko ni u sera Jurdɛn baji ma tuma min na, u ka u jɔ Jurdɛn ji la yen.»
[9] Josue y'a fɔ Israɛl bɔnsɔn ye ko: «A' ye aw madon yan ka Matigi, aw ka Ala ka kumaw lamɛn.»
[10] Josue ko: «Aw n'a dɔn nin de la ko Ala ɲɛnama bɛ aw cɛma, ko siga t'a la, a na Kanankaw ni Hɛti bɔnsɔn ni Hev siya ni Ferɛz siya ni Girgaskaw ni Amɔr siya ani Jebuskaw gɛn ka bɔ aw ɲɛ.
[11] A filɛ, Dugukolobɛɛtigi ka layidu wagande na tɛmɛn aw ɲɛ ka don Jurdɛn baji la.
[12] Sisan aw ka cɛ tan ni filaɲɛnatɔmɔ ka bɔ Israɛl siyaw la, siya kelen, cɛ kelen.
[13] Sarakalasebaa minw bɛ Matigi, Dugukolobɛɛtigi ka layidu wagande doni, ni olu senw donna Jurdɛn baji la tuma min na, Jurdɛn baji na tigɛ. Ji min bɛ woyo ka bɔ sanfɛ, o na jɔ yen ka lajɛɲɔgɔn kan.»
[14] Mɔgɔw bɔra u ka finisow la ko u bɛ Jurdɛn ba tigɛ. Sarakalasebaa minw tun bɛ layidu wagande ta, olu ye mɔgɔw ɲɛ minɛ.
[15] Ayiwa Jurdɛn ba bɛ kari ka taa gwele kan suman tigɛ waati bɛɛ la. Sarakalasebaa minw bɛ wagande ta, olu sera Jurdɛn ba ma ka u senw don ji la tuma min na,
[16] ji min tun bɛ woyo ka bɔ sanfɛ, o jɔra ka ton fo ka se yɔrɔ jan Adam dugu ma, o bɛ Zaritan kɛrɛ fɛ. Ji min tun bɛ woyo ka taa jɛkɛnɛ la Kɔgɔji Misɛn fan fɛ, o tigɛra pewu. Mɔgɔw ye ba tigɛ Jeriko kuntilenna la.
[17] Sarakalasebaa minw tun bɛ Matigi ka layidu wagande doni, olu senw jɔlen bamalen tora gwele kan Jurdɛn ba cɛmancɛ la ka Israɛl bɛɛ tɛmɛntɔ to gwele kan, fo o siya bɛɛ ka Jurdɛn ba tigɛ ka ban.