[1] Ayiwa Josue ye Rubɛn siya ni Gad siya ani Manase siya tilancɛ wele ka kuma u fɛ.
[2] A y'a fɔ u ye ko: «Matigi ka jɔnkɛ Musa ye ci minw fɔ aw ye, aw ye olu bɛɛ kɛ. Ne ye ci minw fɔ aw ye, aw ye ne kan minɛ fɛn bɛɛ la.
[3] Aw ma ban aw balimaw la nin waati jan kɔnɔ fo ka na se bi ma. Matigi, aw ka Ala ye ci minw fɔ aw ye, aw ye olu bɛɛ kɛ.
[4] Ayiwa sisan Matigi aw ka Ala ye lafiya di aw balimaw ma i ko a y'a fɔ u ye cogo min na. A' ye segin sa ka taa aw ka jamana la aw ciyɛn kun na aw ka finisow kɔnɔ, Matigi ka jɔnkɛ Musa ye o min di aw ma Jurdɛn ba kɔrɔn yanfan fɛ.
[5] Nka Matigi ka jɔnkɛ Musa ye ci fɔlen ni sariya minw fɔ aw ye, aw ka olu mara kosɛbɛ ka u kɛ, ka Matigi aw ka Ala kanu ka a ka siraw bɛɛ taama ka a ka ci fɔlenw mara ka nɔrɔ a la ka baara kɛ a ye ni aw dusukun bɛɛ ni aw ni bɛɛ ye.»
[6] Josue tilalen kɔ dubaw tali la u ye ka u bila ka taa, u kɔseginna ka taa u ka finisow kɔnɔ.
[7] Musa tun ye ciyɛn dɔ di Manase siya tilancɛ ma Basan jamana la. Josue ye o ciyɛnɲɔgɔn di o siya tɔ ma u balimaw kɛrɛ fɛ Jurdɛn ba fan dɔ fɛ tilebi yanfan fɛ. Josue ye u bila ka taa u ka finisow la tuma min na, a ye duba ta u ye.
[8] A ko: «Aw fɛn tigilamaba ka segin aw ka finisow kɔnɔ ni bagankulu barikama caman ani warijɛ ni sanu ni nsiranɛgɛ ni nɛgɛfin ani fini caman ye. Aw ka aw juguw ka fɛn cɛlenw tilatila aw balimaw cɛ.»
[9] O tuma la Rubɛn bɔnsɔn ni Gad bɔnsɔn ani Manase siya tilancɛ bɔra Israɛl bɔnsɔn cɛma Silo, Kanan jamana la ka taa u ciyɛn kun na Galad jamana la ka u ciyɛn ta ka kɛɲɛ ni Matigi ka ci dilen ye Musa fɛ.
[10] U sera Jurdɛn mara la Kanan jamana la tuma min na, Rubɛn bɔnsɔn ni Gad bɔnsɔn ani Manase siya tilancɛ ye saraka bɔlan belebeleba kabakoma dɔ jɔ Jurdɛn ba da la.
[11] Israɛl bɔnsɔn y'a mɛn ko Rubɛn bɔnsɔn ni Gad bɔnsɔn ani Manase siya tilancɛ ye saraka bɔlan dɔ jɔ Kanan jamana kuntilenna la Jurdɛn mara la, Israɛl bɔnsɔn kɛrɛ fɛ.
[12] Israɛl bɔnsɔn ye o mɛn tuma min na, Israɛl bɔnsɔn jama bɛɛ y'u lajɛ Silo ka u labɛn u kama.
[13] Israɛl bɔnsɔn ye sarakalasebaa Eleazar denkɛ Fineɛs ni kuntigi tan ci ka bɔ siyaw bɛɛ la ka taa Rubɛn bɔnsɔn ni Gad bɔnsɔn ani Manase siya tilancɛ sɛgɛrɛ Galad jamana la. Kuntigi kelen bɔra Israɛl siyaw bɛɛ kelen-kelen na.
[15] U sera Rubɛn bɔnsɔn ni Gad bɔnsɔn ani Manase siya tilancɛ yɔrɔ ka kuma olu fɛ ko:
[16] «Matigi ka jama bɛɛ y'a fɔ ko aw ye mun kanntanya kɛ Israɛl ka Ala la, mun na aw murutira ka fara ka bɔ an Matigi la bi ka saraka bɔlan jɔ aw yɛrɛw ye?
[17] Tilenbaliya ko min kɛra Peɔr, o ka dɔgɔ an ɲɛ na wa? An ma saniya ka bɔ o ko la halibi k'a sɔrɔ fiɲɛbana ye Matigi ka jama bɛɛ sɔrɔ.
[18] Nka sisan aw dun b'a fɛ ka segin kɔ fɛ ka muruti Matigi ma. K'a sɔrɔ ni aw murutira Matigi ma bi, a na tɔɔrɔ lase Matigi ka jama bɛɛ ma sini.
[19] Ni nin jamana nɔgɔlen don aw ɲɛ na, Matigi ka finiso bɛ yɔrɔ min na, aw ka taa Matigi ka jamana la ka sigi an cɛma yen. Nka aw kana muruti Matigi ma, aw kana fara an na fewu ka saraka bɔlan jɔ Matigi, an ka Ala ta kɛrɛ fɛ.
[20] Zerak denkɛ Akan ye tilenbaliya ko kɛ Matigi ka fɛn bilalenw ko la tuma min na, Matigi ka dimiya ma wuli Israɛl jama bɛɛ kama wa? O cɛ kelen ma halaki a ka tilenbaliya kosɔn.»
[21] Nka Rubɛn bɔnsɔn ni Gad bɔnsɔn ani Manase siya tilancɛ ye Israɛl siyaw waa caman kuntigiw jaabi ko:
[22] «Matigi, Sebaayatigi Ala, Matigi, Sebaayatigi Ala, o y'a dɔn, Israɛl fana na a dɔn. Ni a kɛ kun ye murutili wala Matigi hakɛ tali ye, Matigi kana an kisi bi.
[23] Ni a y'a sɔrɔ an ye saraka bɔlan jɔ an yɛrɛ ye walisa ka muruti Matigi ma, ni a kɛ kun ye saraka jenitaw ni mugu sarakaw ni nisɔndiya sarakaw laseli ye, Matigi yɛrɛ ka o jate.
[24] An ye o kɛ hami min kosɔn, o filɛ nin ye, ko an bɛ siran, ko aw denw kana na a fɔ an denw ma don nataw la ko: ‹Niyɔrɔ jumɛn bɛ aw fɛ Matigi, Israɛl ka Ala la?
[25] Matigi ye Jurdɛn ba kɛ an ni aw Rubɛn bɔnsɔn ni Gad bɔnsɔn dancɛ ye. Niyɔrɔ si tɛ aw fɛ Matigi la.› O cogo la aw denw na an denw bali Matigi ɲɛsiran na.
[26] O de y'a to an y'a fɔ ko an ka saraka bɔlan jɔ an yɛrɛw ye, nka o tɛ jɔ saraka jenitaw ni saraka tɔw kosɔn,
[27] nka walisa a ka kɛ seere ye an ni aw cɛ ani an bɔnsɔn ni aw bɔnsɔn cɛ an kɔ. Ko an b'a fɛ ka baara kɛ Matigi ɲɛ kɔrɔ ni saraka jenitaw ni saraka fagataw ani nisɔndiya sarakaw ye, walisa aw denw kan'a fɔ an denw ye don nataw la ko niyɔrɔ si tɛ an denw fɛ Matigi la.
[28] An yɛrɛw y'a fɔ ko ni u ye o kuma fɔ an wala an bɔnsɔn ye don nataw la, an n'a fɔ ko Matigi ka saraka bɔlan bisigi filɛ nin ye, an bɛnbaw ye o kɛ. O kɛ kun tɛ saraka jenita ni saraka laseli ye, nka walisa a ka kɛ seere ye an ni aw cɛ.
[29] Miirili min b'a to an bɛ muruti Matigi ma ka fara Matigi la bi ka saraka bɔlan jɔ saraka jenitaw ni mugu sarakaw ni saraka fagataw kosɔn, wala ka saraka bɔ saraka bɔlan wɛrɛ kan, ni min tɛ Matigi, an ka Ala ta ye a ka finiso da la, Ala ma an kisira o ma.»
[30] Sarakalasebaa Fineɛs ni jamala mɔgɔbaw ani Israɛl bɔnsɔn waa caman kuntigi minw tun bɛ a fɛ, olu ye o kumaw mɛn ka bɔ Rubɛn bɔnsɔn ni Gad bɔnsɔn ni Manase siya fɛ tuma min na, o ye u wasa.
[31] O tuma la, sarakalasebaa Eleazar denkɛ Fineɛs y'a fɔ Rubɛn bɔnsɔn ni Gad bɔnsɔn ani Manase bɔnsɔn ye ko: «An y'a dɔn bi ko Matigi bɛ an cɛma, sabu aw ma tilenbaliya ko si kɛ Matigi la, ani fana aw ye Israɛl bɔnsɔn tila ka bɔ Matigi bolo.»
[32] Sarakalasebaa Eleazar denkɛ Fineɛs ni kuntigiw bɔra Rubɛn bɔnsɔn ni Gad bɔnsɔn kɔrɔ Galad jamana la ka taa Kanan jamana la Israɛl bɔnsɔn yɔrɔ. Ko minw kɛra, u ye olu bɛɛ lakali u ye.
[33] O ko diyara Israɛl bɔnsɔn ye. U ye Ala tanu. U ma wuli Rubɛn bɔnsɔn ni Gad bɔnsɔn kama ko u bɛ u kɛlɛ ka u ka jamana halaki tun.
[34] Rubɛn bɔnsɔn ni Gad bɔnsɔn ye o saraka bɔlan tɔgɔ da ko Seere. U ko: «O ye seere ye an cɛ ko Matigi kelenpe ye Ala ye.»