[1] Jerusalɛm masakɛ Adoni-Zedɛk y'a mɛn ko Josue ye Ayi minɛ ka a mɔgɔw halaki ka u ban, ko a ye min kɛ Jeriko ni a masakɛ la, a ye o bɔɲɔgɔnko fana kɛ Ayi ni a masakɛ la. A y'a mɛn fana ko Gabaonkaw taara hɛrɛ ɲini Israɛl fɛ ka sigi u cɛma.
[2] O tuma la u siranna kosɛbɛ, katuguni Gabaon tun ye duguba ye, i n'a fɔ masa duguba. A tun ka bon ni Ayi ye, a cɛw tun ye cɛ farinmaw ye.
[3] Ayiwa Jerusalɛm masakɛ Adoni-Zedɛk ye ci bila ka taa Heborɔn masakɛ Hoham ani Jarmut masakɛ Piream ni Lakis masakɛ Jafia ani Egilɔn masakɛ Debir sɛgɛrɛ k'a fɔ olu ye ko:
[4] «A' ye na ne yɔrɔ ka ne dɛmɛ. An ka Gabaon kɛlɛ sabu a ye hɛrɛ ɲini Josue ni Israɛl bɔnsɔn fɛ.»
[5] Amɔr siya ka masakɛ duuru, Jerusalɛm masakɛ ni Heborɔn masakɛ ni Jarmut masakɛ ni Lakis masakɛ ani Egilɔn masakɛ, olu bɛɛ ye ɲɔgɔn lajɛ ka taa ni u ka kɛlɛbolow ye ka daga Gabaon da la ka o kɛlɛ.
[6] Gabaonkaw ye ci bila ka taa a fɔ Josue ye bugufyɛ la Gilgal, ko: «I kana i ka jɔnw bila. I tɛliya ka na an fɛ ka an kisi. I ka an dɛmɛ, katuguni Amɔr siya ka masakɛ minw sigilen bɛ kuluw la, olu bɛɛ ye ɲɔgɔn lajɛ an kama.»
[7] Josue ni kɛlɛkɛ cɛw bɛɛ ani cɛ farinmaw bɛɛ bɔra Gilgalɲɔgɔn fɛ ka taa.
[8] Matigi y'a fɔ Josue ye ko: «I kana siran u ɲɛ, ne na u don i bolo. U la mɔgɔ si tɛna se ka jɔ ka i bali.»
[9] Josue taara cun u kan, sabu u bɔra Gilgal ka su bɛɛ kɛ taama la.
[10] Matigi ye u ja tigɛ Israɛl ɲɛ, a ye u tiɲɛn kosɛbɛ Gabaon ka u gɛn Bɛt-Horɔn kulu yɛlɛn sira fɛ. A ye u caman faga ka taa se Azeka ni Makeda.
[11] Ka u bolitɔ to Israɛl ɲɛ Bɛt-Horɔn jiginjigin fɛ, Matigi ye bɛlɛkisɛ kunbabaw bɔ sankolo la ka u bon ni olu ye fo ka taa se Azeka. U sara. Mɔgɔ minw fagara sanbɛlɛ fɛ, olu tun ka ca ni npan ka fagalenw ye Israɛl bɔnsɔn fɛ.
[12] Matigi ye Amɔr siya don Israɛl bɔnsɔn bolo don min na, o don na Josue kumana Matigi fɛ. A y'a fɔ Israɛl ɲɛ na ko: «Tile, i ka i jɔ Gabaon kun na. E kalo, i ka i jɔ Ajalɔn jɛkɛnɛ la.»
[13] Tile jɔra, kalo fana jɔra, fo o siya ka u mɔnɛ bɔ u juguw la. O kow bɛɛ sɛbɛnnen tɛ Jusite ka kitabu la wa? Tile sera kuncɛ ka jɔ yen, ka tile kelenɲɔgɔn kɛ. A ma tɛliya ka bi.
[14] O bɔɲɔgɔnko ma kɛ o donɲɛ, a bɔɲɔgɔnko ma kɛ o don kɔ, ko Matigi ye mɔgɔw kan minɛ. Matigi ye kɛlɛ kɛ Israɛl ye.
[15] Josue ni Israɛl bɛɛ kɔseginnaɲɔgɔn fɛ bugufyɛ la Gilgal.
[16] O masakɛ duuru bolila ka u dogo Makeda farawo kɔnɔ.
[17] A fɔra Josue ye ko: «O masakɛ duuru yera, u dogolen bɛ Makeda farawo kɔnɔ.»
[18] Josue y'a fɔ ko: «Aw ka kabakurun belebelebaw kolonkolon ka farawo da tugu ka mɔgɔw bila a da la ka u kɔlɔsi,
[19] nka aw kana aw jɔ. A' ye aw juguw nɔgɛn ka u kɔ mɔgɔw gosi. Aw kana a to u ka don u ka duguw kɔnɔ, katuguni Matigi, aw ka Ala ye u don aw bolo.»
[20] Josue ni Israɛl bɔnsɔn ye u tiɲɛn kosɛbɛ ka se sɔrɔ u kan. Minw sera ka dan kɛ, olu bolila ka don duguw lamini kogomaw kɔnɔ.
[21] O tuma la mɔgɔw bɛɛ kɔseginna hɛrɛ la Josue fɛ bugufyɛ la Makeda. Mɔgɔ si ma a nɛnkun lamaga Israɛl bɔnsɔn kama.
[22] Ayiwa Josue ko: «Aw ka farawo da yɛlɛ ka o masakɛ duuru labɔ ka na ni u ye ne fɛ yan.»
[23] U y'a kɛ ten ka o masakɛ duuru labɔ farawo kɔnɔ ka taa ni u ye a yɔrɔ, Jerusalɛm masakɛ ni Heborɔn masakɛ ni Jarmut masakɛ ni Lakis masakɛ ani Egilɔn masakɛ.
[24] U taara ni o masakɛw ye Josue yɔrɔ tuma min na, Josue ye Israɛl cɛw bɛɛ wele. Kɛlɛbolo kuntigi minw tun taara a fɛ, a y'a fɔ olu ye ko: «A' ye aw madon ka aw sen da nin masakɛw tɔn na.» U ye u madon ka u sen da u tɔn na.
[25] Josue y'a fɔ u ye ko: «Aw kana siran, aw ja kana tigɛ. A' ye aw barika bonya ka aw ja gɛlɛya, katuguni aw bɛ aw jugu minw kɛlɛ, Matigi na nin bɔɲɔgɔnko kɛ olu bɛɛ la.»
[26] O kɔ, Josue ye o masakɛw gosi ka u faga ka u dulon jiri duuru la. U dulonnen tora jiriw la fo wula da fɛ.
[27] Tile bi tuma la Josue ko u ka u lajigin ka bɔ jiriw la ka u fili farawo kɔnɔ, u tun dogora yɔrɔ min na. U ye kabakurun belebelebaw kɛ ka farawo da tugu, u bɛ yen halibi.
[28] O don yɛrɛ la, Josue ye Makeda minɛ ka npan kɛ k'a ci ka a masakɛ faga. A ye dugu ni a mɔgɔw bɛɛ halaki ka u ban. A ma mɔgɔ si to. A ye min kɛ Jeriko masakɛ la, a ye o bɔɲɔgɔnko kɛ Makeda masakɛ la.
[29] Josue ni Israɛl bɛɛ bɔra Makedaɲɔgɔn fɛ ka taa Libina, ka Libina kɛlɛ.
[30] Matigi ye Libina fana ni a masakɛ don Israɛl bolo. Josue ye npan kɛ k'a ci k'a kɔnɔ mɔgɔw bɛɛ faga, a ma mɔgɔ si to. A ye min kɛ Jeriko masakɛ la, a ye o bɔɲɔgɔnko kɛ o masakɛ fana la.
[31] Josue ni Israɛl bɛɛ bɔra Libinaɲɔgɔn fɛ ka taa Lakis ka daga a da la k'a kɛlɛ.
[32] Matigi ye Lakis don Israɛl bolo. U ye a minɛ tile filanan la ka npan kɛ k'a ci k'a kɔnɔ mɔgɔw bɛɛ faga i ko a y'a kɛ Libina la cogo min na.
[33] O tuma la Gezɛr masakɛ Horam taara ka Lakis dɛmɛ. Josue ye ale ni a ka mɔgɔw bɛɛ faga, a ma u si to.
[34] Josue ni Israɛl bɛɛ bɔra Lakisɲɔgɔn fɛ ka taa Egilɔn ka daga a da la k'a kɛlɛ.
[35] O don yɛrɛ la u y'a minɛ ka npan kɛ k'a ci k'a kɔnɔ mɔgɔw bɛɛ halaki ka u ban o don kelen na, i ko a y'a kɛ Lakis la cogo min na.
[36] Josue ni Israɛl bɛɛ bɔra Egilɔnɲɔgɔn fɛ ka taa Heborɔn k'a kɛlɛ.
[37] U y'a minɛ ka npan kɛ ka a ni a dafɛ duguw bɛɛ ci ka u ka masakɛ ni duguw kɔnɔ mɔgɔw bɛɛ faga. A ye min kɛ Egilɔn na, a ye o ɲɔgɔn bɛɛ kɛ yen na fana. A ma mɔgɔ si to. A ye o dugu ni a kɔnɔ mɔgɔw bɛɛ halaki ka u ban.
[38] Josue ni Israɛl bɛɛ seginnaɲɔgɔn fɛ ka taa Debir k'o kɛlɛ.
[39] U ye a ni a masakɛ ani a dafɛ duguw bɛɛ minɛ ka npan kɛ ka u ci ka u kɔnɔ mɔgɔw bɛɛ halaki ka u ban, u ma mɔgɔ si to. U ye min kɛ Heborɔn ni Libina ani u masakɛw la, u ye o bɔɲɔgɔnko kɛ Debir ni a masakɛ la.
[40] Ayiwa Josue ye o jamana bɛɛ tiɲɛn, a kulu yɔrɔ ni a worodugu yanfan ni a kɛnɛba ni a kulu jiginjigin ani u masakɛw bɛɛ, a ma u si to. A ye fɛnɲɛnamaw bɛɛ halaki ka u ban ka kɛɲɛ ni Matigi, Israɛl ka Ala ka ci fɔlen ye.
[41] Josue ye u tiɲɛn ka bɔ Kadɛs-Barnea fo ka taa se Gaza ani Gosɛn jamana bɛɛ la fo ka taa se Gabaon.
[42] Josue ye o masakɛw ni u ka jamana bɛɛ minɛ o yɔrɔ nin kelen na katuguni Matigi, Israɛl ka Ala ye kɛlɛ kɛ Israɛl ye.
[43] Josue ni Israɛl bɛɛ kɔseginna ka taa bugufyɛ la Gilgal.