[1] Jeriko dondaw sɛbɛkɔrɔ tugura Israɛl bɔnsɔnɲɛ fo mɔgɔ si tun tɛ don.
[2] Matigi y'a fɔ Josue ye ko: «A filɛ, ne ye Jeriko ni a masakɛ ani a ka kɛlɛkɛ cɛ ja gɛlɛnw don i bolo.
[3] Aw kɛlɛkɛ cɛw bɛɛ ka dugu lamini siɲɛ kelen don o don tile wɔɔrɔ kɔnɔ.
[4] Sarakalasebaa wolonwula ka taa wagandeɲɛ ni sagajigi biɲɛ buru fyɛta wolonwula ye u bolo. Tile wolonwulanan don, aw ka dugu lamini siɲɛ wolonwula, sarakalasebaaw ka buruw fyɛ.
[5] Ni u ye sagajigi biɲɛ buru fyɛ kosɛbɛ, ni aw ye o burukan mɛn tuma min na, mɔgɔ bɛɛ ka kulokanba ci. O tuma la dugu lamini kogo na bi, mɔgɔw bɛɛ kelen-kelen ka don u yɛrɛw kuntilenna fɛ.»
[6] Nun denkɛ Josue ye sarakalasebaaw wele k'a fɔ u ye ko: «Aw ka layidu wagande ta. Sarakalasebaa wolonwula ka taa Matigi ka wagandeɲɛ ni sagajigi biɲɛ buru fyɛta wolonwula ye u bolo.»
[7] A y'a fɔ mɔgɔw ye ko: «A' ye taama ka dugu lamini. Kɛlɛkɛ minantigiw ka tɛmɛn Matigi ka wagandeɲɛ.»
[8] Josue tilalen kɔ kuma la mɔgɔw fɛ, sarakalasebaa wolonwula minw tun bɛ sagajigi biɲɛ buru fyɛta wolonwula ta Matigi ɲɛ kɔrɔ, olu taaraɲɛ ka buruw fyɛ. Matigi ka layidu wagande tugura u kɔ.
[9] Kɛlɛkɛ minantigiw taara sarakalasebaa buru fyɛlaw ɲɛ. Kɔfɛ mɔgɔw tugura wagande kɔ. U taamatɔ ye buruw fyɛ.
[10] Josue tun y'a fɔ mɔgɔw ye ko: «Aw kana kulo, aw kan kana mɛn, kuma si kana bɔ aw da la fo ne k'a fɔ aw ye don min na, ko aw ka kulo. O tuma la aw ka kulo.»
[11] Josue y'a to Matigi ka wagande ka dugu lamini siɲɛ kelen. O kɔ, u seginna bugufyɛ la ka si yen.
[12] Josue solila ka wuli. Sarakalasebaaw ye Matigi ka wagande ta.
[13] Sarakalasebaa wolonwula minw tun bɛ sagajigi biɲɛ buru fyɛta wolonwula ta Matigi ka wagandeɲɛ, olu taaraɲɛ ka buru fyɛ. Kɛlɛkɛ minantigiw taara u ɲɛ. Kɔfɛ mɔgɔw tugura Matigi ka wagande kɔ. U taamatɔ tun bɛ buruw fyɛ.
[14] A tile filanan don, u ye dugu lamini siɲɛ kelen. O kɔ, u seginna bugufyɛ la. U ye o kɛ tile wɔɔrɔ kɔnɔ.
[15] Tile wolonwulanan don, u solila ka wuli kɛnɛtigɛ da fɛ ka dugu lamini siɲɛ wolonwula i ko u delila k'a kɛ cogo min na. U ye dugu lamini siɲɛ wolonwula o tile kelen kɔnɔ.
[16] A siɲɛ wolonwulanan la sarakalasebaaw tun bɛ buru fyɛ tuma min na, Josue y'a fɔ mɔgɔw ye ko: «A' ye kulo. Matigi ye dugu don aw bolo.
[17] Dugu ni a kɔnɔ fɛnw bɛɛ ka bila pewu u dan na Matigi ye. Jatɔmuso Rahab ani a ka mɔgɔ minw bɛ a ka so kɔnɔ, olu bɛɛ ɲɛnama ka to, k'a masɔrɔ a ye an ka cidenw dogo.
[18] Fɛn minw bilara pewu, aw ka aw yɛrɛw kɔlɔsi olu la, k'a masɔrɔ fɛn minw bilara pewu, ni aw ye o dɔ ta, aw na danga lase Israɛl ka bugufyɛ ma ka a tɔɔrɔ.
[19] Warijɛ bɛɛ ni sanu bɛɛ ani fɛn minw dilara ni nsiranɛgɛ ni nɛgɛfin ye, olu na bila pewu u dan na Matigi ye, olu ka don Matigi ka nafolo mara yɔrɔ la.»
[20] Mɔgɔw ye kulokan ci, sarakalasebaaw ye buruw fyɛ. Mɔgɔw ye burukan mɛn tuma min na, u ye kulokanba ci, dugu lamini kogo bira. Mɔgɔw bɛɛ kelen-kelen donna dugu kɔnɔ u yɛrɛw kuntilenna fɛ. U ye dugu minɛ.
[21] Fɛn o fɛn tun bɛ dugu kɔnɔ, cɛ wo, muso wo, denmisɛn wo, mɔgɔkɔrɔba wo, fo ka ta'a bila misiw ni sagaw ni faliw la, u ye npan kɛ ka olu bɛɛ faga ka u ban.
[22] Cɛ fila minw tun ye jamana ko lajɛ, Josue y'a fɔ olu ye ko: «A' ye don jatɔmuso ka so kɔnɔ ka ale ni a ka mɔgɔw bɛɛ labɔ ka kɛɲɛ ni aw ka kalili ye a ye.»
[23] Kamalen minw tun taara jamana ko lajɛ, olu donna ka Rahab ni a fa ni a ba ni a balimaw ani a ka fɛnw bɛɛ labɔ. U ye a ka so mɔgɔw bɛɛ labɔ ka u bila Israɛl ka bugufyɛ kɔ fɛ.
[24] U ye dugu ni a kɔnɔ fɛnw bɛɛ jeni ni tasuma ye, nka warijɛ ni sanu ani fɛn minw dilara ni nsiranɛgɛ ni nɛgɛfin ye, u ye olu bila Matigi ka nafolo mara yɔrɔ la a ka so kɔnɔ.
[25] Josue ye jatɔmuso Rahab ni a fa ka so mɔgɔw ani a ka mɔgɔw bɛɛ ɲɛnama to. Rahab sigira Israɛl cɛma fo ka na se bi ma, sabu Josue ye ciden minw ci ka taa Jeriko ko lajɛ, a ye olu dogo.
[26] O tuma la Josue ye dangali kɛ ko: «Ni mɔgɔ o mɔgɔ wulila ka Jeriko dugu jɔ ko kura, o tigi ka danga Matigi ɲɛ kɔrɔ. Ni a ye o dugu ju sigi, a na bɔnɛ a denkɛ fɔlɔ la. Ni a ye konw don a daw la, a na bɔnɛ a denkɛ sinnaban la.»
[27] Matigi tora Josue fɛ, a tɔgɔ bɔra o jamana bɛɛ la.