[1] Israɛl bɔnsɔn ye ciyɛn minw ta Kanan jamana la, olu filɛ ninw ye. Sarakalasebaa Eleazar ni Nun denkɛ Josue ani Israɛl siyaw la gwaw kuntigiw ye o tilatila u cɛ.
[2] O tilatilali kɛra ni kala ye siya kɔnɔntɔn ni siya tilancɛ cɛ, ka kɛɲɛ ni Matigi ka ci fɔlen ye Musa fɛ.
[3] Musa tun ye ciyɛn di siya fila ni siya tilancɛ ma Jurdɛn ba kɔ fɛ, nka a ma niyɔrɔ si di Levitew ma olu cɛma.
[4] Yusufu denkɛw kɛra siya fila ye, o ye Manase ni Efrayim ye. Niyɔrɔ si ma di Levitew ma o jamana kɔnɔ fo u sigi duguw ni u lamini dugukolo ka kɛ u ka baganw ni u bolo fɛnw mara yɔrɔ ye.
[5] Israɛl bɔnsɔn ye o ciw bɛɛ kɛ i ko Matigi tun y'a fɔ Musa ye cogo min na. U ye jamana tilatila.
[6] Juda bɔnsɔn taara Josue sɛgɛrɛ Gilgal. Kenaz bɔnsɔn Jefune denkɛ Kalɛb y'a fɔ a ye ko: «Matigi ye min fɔ Ala ka cɛ Musa ye ka an to Kadɛs-Barnea ne ni e ko la, i bɛ o dɔn.
[7] Ne si san binaaninan la, Matigi ka jɔnkɛ Musa ye ne ci ka bɔ Kadɛs-Barnea ka taa jamana ko lajɛ. Ne kɔseginna ka ne dan tigɛ a ye ni ne dusukun jɛlen ye.
[8] Ne balima minw taara ne fɛ, olu ye jama fari faga, nka ne, ne tugura Matigi ne ka Ala nɔ fɛ ni kantigiya ye.
[9] Musa y'i kali o don na ko ne sentɛgɛ dara yɔrɔ o yɔrɔ kan, o na kɛ ne ni ne bɔnsɔn ta ye badaa, k'a masɔrɔ ne tugura Matigi, ne ka Ala la ni kantigiya ye.
[10] Ayiwa sisan a filɛ, kabini Matigi ye o kuma fɔ Musa ye ka Israɛl to taama la kungokolon kɔnɔ, Matigi ye ne ɲɛnama to san binaani ni duuru kɔnɔ i ko a y'a fɔ cogo min na. A filɛ, ne ye san bisegin ni duuru sɔrɔ bi.
[11] Musa ye ne ci don min na, sisan ne barika bɛ o don ta bɔ. Barika bɛ ne la i ko o don, ka kɛlɛ kɛ ka taa ka segin kɛ.
[12] Ayiwa sisan, i ka nin kulu di ne ma, Matigi kumana ne fɛ o min ko la o don tɛmɛnnen na, k'a masɔrɔ i y'a mɛn ko Anak bɔnsɔn bɛ yen, ko dugubaw ni kɛlɛ kunbɛn kogow kɛra ka o duguw lamini. A dɔrɔ Matigi na to ne fɛ, ne na u gɛn i ko Matigi y'a fɔ cogo min na.»
[13] O tuma la Josue ye dubaw kɛ Jefune denkɛ Kalɛb ye ka Heborɔn di a ma ka kɛ a ciyɛn ye.
[14] Jefune denkɛ Kalɛb, min tun ye Kenaz siya mɔgɔ dɔ ye, o ye Matigi, Israɛl ka Ala ka sira taama k'a dafa. O de kosɔn Heborɔn kɛra ale niyɔrɔ ye fo ka taa se bi ma.
[15] Heborɔn tɔgɔ tun ye Kirjat-Araba ye fɔlɔ. Araba tun ka bon ni Anak bɔnsɔn tɔw bɛɛ ye. Kɛlɛ banna, jamana ye lafiya sɔrɔ.