[1] Manase bɔnsɔn niyɔrɔ kala dara, ale tun ye Yusufu denkɛ fɔlɔ ye. Manase denkɛ fɔlɔ Makir min tun ye Galad fa ye, o de ye Galad ni Basan sɔrɔ katuguni ale tun ye kɛlɛkɛ cɛ ye.
[2] Kala dara Manase denkɛ tɔw bɔnsɔn ye ka kɛɲɛ ni u ka gwaw ye. Abiezɛr bɔnsɔn ni Helɛk bɔnsɔn ni Asiriɛl bɔnsɔn ni Sisɛm bɔnsɔn ni Hefɛr bɔnsɔn ni Semida bɔnsɔn, olu tun ye Yusufu denkɛ Manase bɔnsɔn ye ka kɛɲɛ ni u ka gwaw ye.
[3] Denkɛ si tun tɛ Hefɛr denkɛ Zelofisad fɛ nka a ye denmusow sɔrɔ. A denmusow tɔgɔw filɛ ninw ye, Makila ni Noa ni Hogila ni Milika ani Tirza. Hefɛr tun ye Galad denkɛ ye. Galad tun ye Makir denkɛ ye. Makir tun ye Manase denkɛ ye.
[4] O denmusow taara sarakalasebaa Eleazar ni Nun denkɛ Josue ani kuntigiw ɲɛ kɔrɔ k'a fɔ ko: «Matigi ye ci fɔ Musa ye ko a ka ciyɛn di an ma an balimaw cɛma.» O de y'a to ciyɛn dira u ma u fa balimaw cɛma ka kɛɲɛ ni Matigi ka ci fɔlen ye.
[5] Manase ye niyɔrɔ tan sɔrɔ ka fara Jurdɛn ba kɔ jamanaw Galad ni Basan kan,
[6] k'a masɔrɔ Manase bɔnsɔn musomaw ye ciyɛn sɔrɔ a bɔnsɔn cɛmaw cɛma. Galad jamana kɛra Manase denkɛ tɔw bɔnsɔnw ta ye.
[7] Manase dancɛ daminɛna Asɛr ka taa se Mikmetat, Sisɛm kuntilenna la, ka taa kinin yanfan fɛ fo ka taa se En-Tapuakkaw fan fɛ.
[8] Tapuak jamana tun ye Manase ta ye, nka Tapuak min bɛ Manase dancɛ fan fɛ, o tun ye Efrayim ta ye.
[9] O dancɛ bɔra yen ka jigin ka taa Kana kɔji worodugu yanfan fɛ. O duguw kɛra Efrayim ta ye Manase ka duguw cɛma. Manase dancɛ tun ye kɔji saheli yanfan ye, ka taa bila kɔgɔji la.
[10] Minw tun bɛ worodugu yanfan fɛ, olu tun ye Efrayim ta ye, minw tun bɛ saheli yanfan fɛ, olu tun ye Manase ta ye. Kɔgɔji tun ye u dancɛ ye. O dan dɔ sera Asɛr ma saheli yanfan fɛ ka taa se Isakar ma kɔrɔn yanfan fɛ.
[11] Manase ye Bɛt-Sean lamini duguw ani Isakar ni Asɛr dugukolo fana sɔrɔ ani Jibleam ni a lamini duguw, ani Dor ni En-Dor ni Tanak ani Megido ni u mɔgɔw ani u dafɛ duguw, o ye mara saba ye.
[12] Manase bɔnsɔn ma se ka o duguw mɔgɔw gɛn ka bɔ yen. Kanankaw ma sɔn ka bɔ o jamana la.
[13] Israɛl bɔnsɔn ye fanga sɔrɔ tuma min na, u ye Kanankaw kɛ u ka jɔnw ye, nka u ma u gɛn ka bɔ yen.
[14] Yusufu bɔnsɔn kumana Josue fɛ ko: «Mun na i ye niyɔrɔ kelen di an ma k'a sɔrɔ an ka ca, Matigi dubara an ye, fo ka na se bi ma?»
[15] Josue y'a fɔ u ye ko: «Ni aw ka mɔgɔw ka ca, aw ka taa tu la ka dɔ tigɛ aw yɛrɛw ye yen, Ferɛz siya ni Refaim siya ka jamana la, sabu Efrayim kulu yɔrɔ ka dɔgɔ aw la.»
[16] Yusufu bɔnsɔn y'a fɔ ko: «Kulu jamana tɛ an bɔ. Kananka minw sigilen bɛ jɛkɛnɛ jamana la, ani minw bɛ Bɛt-Sean ni a dafɛ duguw kɔnɔ, ani minw bɛ Jizreɛl jɛkɛnɛ la, nɛgɛ wotorow bɛ olu fɛ.»
[17] Nka Josue y'a fɔ Yusufu ka so ye, Efrayim ni Manase kɔni, a ko: «Aw ye siya caman ye, aw barika ka bon, yɔrɔ kelen dɔrɔn tɛna kɛ aw ta ye.
[18] Kulu jamana na kɛ aw ta ye. Hali ni tu yɔrɔ don, aw na a tigɛ. A dan yɔrɔw na kɛ aw ta ye. Hali ni nɛgɛ wotorow bɛ Kanankaw fɛ, hali ni u barika ka bon, aw na u gɛn ka bɔ yen.»