[1] O siya bɛɛ tilara Jurdɛn ba tigɛli la tuma min na, Matigi y'a fɔ Josue ye ko:
[2] «Aw ka cɛ tan ni filaɲɛnatɔmɔ nin mɔgɔw la, siya kelen, cɛ kelen.
[3] I ka nin ci fɔ u ye ko: ‹Sarakalasebaaw senw bamanen tun bɛ yɔrɔ min na Jurdɛn ba cɛmancɛ la, ko u ka kabakurun tan ni fila ta ka bɔ yen, ko aw bɛ si yɔrɔ min na bi su in na, u ka taa n'u ye ka u bila yen.›»
[4] Josue ye cɛ tan ni fila minw ɲɛnatɔmɔ ka bɔ Israɛl siyaw bɛɛ la, siya kelen, cɛ kelen, a ye olu wele.
[5] Josue y'a fɔ u ye ko: «Aw ka tɛmɛn Matigi, aw ka Ala ka layidu wagandeɲɛ fɛ fo ka se Jurdɛn ba cɛmancɛ la. Aw bɛɛ kelen-kelen ka kabakurun kelen ta aw kaman kan ka kɛɲɛ ni Israɛl bɔnsɔn siyaw dama ye,
[6] walisa o ka kɛ taamashyɛn ye aw cɛma. Ni aw denw ye ɲininkali kɛ don nataw la ko: ‹Nin kabakurunw kɔrɔ ye mun ye?›
[7] o tuma la aw n'a fɔ u ye ko: ‹Jurdɛn baji cɛ tigɛra ka bɔ Matigi ka layidu wagandeɲɛ. A ye Jurdɛn ba tigɛ tuma min na, Jurdɛn baji cɛ tilara fila ye.› Nin kabakurunw na kɛ hakilijigin fɛn ye Israɛl bɔnsɔn ye badaa.»
[8] Josue ye min fɔ Israɛl bɔnsɔn ye, u ye o kɛ. U ye kabakurun tan ni fila ta ka bɔ Jurdɛn ba cɛmancɛ la ka kɛɲɛ ni Israɛl bɔnsɔn siyaw dama ye, i ko Matigi tun y'a fɔ Josue ye cogo min na. U taara ni olu ye fo ka se u si yɔrɔ la ka u bila yen.
[9] Sarakalasebaa minw ye layidu wagande doni, olu senw jɔlen tun bɛ Jurdɛn ba cɛmancɛ la yɔrɔ min na, Josue ye kabakurun tan ni fila sogolonɲɔgɔn kan o yɔrɔ la yen fana. U bɛ yen halibi.
[10] Sarakalasebaa minw tun bɛ wagande doni, olu jɔlen tora Jurdɛn ba cɛmancɛ la fo Matigi ye ci min fɔ Josue ye, o bɛɛ ka kɛ ka dafa. O bɛɛ kɛra ka kɛɲɛ ni Musa ka ci fɔlen ye. Mɔgɔw tɛliyara ka ba tigɛ.
[11] Mɔgɔw bɛɛ tɛmɛnna ka ban tuma min na, Matigi ka wagande ani sarakalasebaaw tɛmɛnna mɔgɔw ɲɛ fɛ.
[12] Rubɛn bɔnsɔn ni Gad bɔnsɔn ani Manase siya tilancɛ tɛmɛnna Israɛl bɔnsɔn tɔw ɲɛ ni kɛlɛkɛ minanw ye u bolo i ko Musa y'a fɔ u ye cogo min na.
[13] Cɛ waa binaaniɲɔgɔn tɛmɛnna Matigi ɲɛ kɔrɔ Jeriko jɛkɛnɛw la, u labɛnnen ni kɛlɛkɛ minanw ye.
[14] O don na Matigi ye Josue kɔrɔta Israɛl bɔnsɔn bɛɛ ɲɛ na. U siranna a ɲɛ i ko u tun bɛ siran Musaɲɛ a si bɛɛ la cogo min na.
[15] Matigi y'a fɔ Josue ye ko:
[16] «Sarakalasebaa minw bɛ seereya wagande doni, i k'a fɔ olu ye ko u ka bɔ Jurdɛn ba la.»
[17] Josue y'a fɔ sarakalasebaaw ye ko: «Aw ka bɔ Jurdɛn ba la.»
[18] Sarakalasebaa minw bɛ Matigi ka layidu wagande doni, olu bɔra Jurdɛn ba cɛmancɛ la ka u senw da gwele kan tuma min na, Jurdɛn baji seginna a nɔ na ka cɛrin gwele kan a fan bɛɛ la i ko fɔlɔ cogo.
[19] Mɔgɔw bɔra Jurdɛn ba la san kalo fɔlɔ tile tannan don. U ye buguw turu Gilgal, Jeriko da fɛ kɔrɔn yanfan fɛ.
[20] U tun ye kabakurun tan ni fila minw ta ka bɔ Jurdɛn ba kɔnɔ, Josue ye olu sogolon Gilgal.
[21] A y'a fɔ Israɛl bɔnsɔn ye ko: «Ni aw denw ye u faw ɲininka don nataw la ko nin kabakurunw kɔrɔ ye mun ye?
[22] o tuma la aw n'a fɔ aw denw ye ko Israɛl bɔnsɔn ye nin Jurdɛn ba jalen tigɛ.
[23] K'a masɔrɔ Matigi, aw ka Ala ye Jurdɛn ji ja aw ɲɛ, fo aw bɛɛ ka tɛmɛn i ko Matigi, aw ka Ala y'a kɛ Kɔgɔji Bilen na cogo min na. A ye o fana ja an ɲɛ fo an bɛɛ ka tɛmɛn.
[24] O bɛɛ kɛra walisa dugukolo kan mɔgɔw bɛɛ k'a dɔn ko Matigi bolo barika ka bon, ani walisa aw ka siran Matigi, aw ka Ala ɲɛ tuma bɛɛ.»