[1] Nun denkɛ Josue ye kolajɛbaa fila ci dogo la ka bɔ Sitim k'a fɔ u ye ko: «A' ye taa o jamana ni Jeriko ko lajɛ.» U taara ka se jatɔmuso dɔ ka so, o tɔgɔ ko Rahab. U sira yen.
[2] A fɔra Jeriko masakɛ ye ko: «A filɛ, Israɛl bɔnsɔn na cɛ dɔw nana yan bi su in na ka jamana ko lajɛ.»
[3] Jeriko masakɛ ye ci bila k'a fɔ Rahab ye ko: «Cɛ minw nana i yɔrɔ ka don i ka so kɔnɔ, i ka olu labɔ, sabu u nana ka jamana bɛɛ ko lajɛ.»
[4] Muso tun ye o cɛ fila dogo. O kɔ, a ko: «Tiɲɛ don, o cɛw sera ne ka so nka ne tun ma u bɔ yɔrɔ dɔn.
[5] Tile bi tuma la, sani dugu dondaw ka tugu, u bɔra. Ne ma u taa yɔrɔ dɔn. A' ye tɛliya ka taa u nɔ fɛ, aw na kun u la.»
[6] Nka a tun yɛlɛnna ni o cɛw ye so kunna ka u dogo lenkalaw jukɔrɔ. A tun ye u ton so kunna.
[7] O dugu mɔgɔw ye u nɔgɛn Jurdɛn ba sira fɛ fo ka se ba sennatigɛ yɔrɔ ma. Olu bɔlen kɔ, dugu dondaw tugura.
[8] Sani o kolajɛbaaw ka u da, Rahab yɛlɛnna u fɛ so kunna.
[9] A ko: «Ne y'a dɔn ko Matigi ye nin jamana di aw ma. Aw ɲɛsiran ye an minɛ. Jamana mɔgɔw bɛɛ ja tigɛra aw ɲɛ,
[10] k'a masɔrɔ an y'a mɛn ko Matigi ye Kɔgɔji Bilen ja aw ɲɛ aw bɔ tuma la Misira jamana la. Aw ye min kɛ Amɔr siya ka masakɛ fila, Sihon ni Og la Jurdɛn ba kɔrɔn fɛ, an ye olu fana kibaru mɛn.
[11] An ja tigɛra. Dusu ma to an si kɔnɔ tun aw kosɔn, katuguni Matigi, aw ka Ala, o ye sankolola Ala ni dugukolo kan Ala ye.
[12] Ayiwa sisan, ne bɛ aw deli ko aw ka aw kali Matigi la ne ye, ko ne ye ɲumaya min kɛ aw ye, aw na o ɲɔgɔn kɛ ne fa ka so ye.
[13] A' ye taamashyɛn di ne ma min b'a jira ko aw na ne fa ni ne ba ni ne balimakɛw ni ne balimamusow ani u fɛ mɔgɔw bɛɛ ɲɛnama to, ko aw na an kisi saya ma.»
[14] O cɛw y'a jaabi ko: «Ni i ma an ko fɔ mɔgɔ si ye, an na an ni bila i ta nɔ na. Ni Matigi ye jamana di an ma tuma min na, an na ko ɲuman kɛ i ye ni kantigiya ye.»
[15] Ayiwa Rahab ye u lajigin ni juru ye finɛtiri fɛ, k'a masɔrɔ a ka so tun bɛ dugu lamini kogo kan.
[16] A y'a fɔ u ye ko: «A' ye taa kuluw fan fɛ, walisa aw ni aw nɔgɛnbaaw kana kunbɛn. A' ye aw dogo yen ka tile saba kɛ, fo u ka kɔsegin. O kɔ, aw ka sira minɛ ka taa.»
[17] O cɛw y'a fɔ a ye ko: «I y'a to an ka kalili min kɛ, an na hɔrɔnya o ma nin cogo la.
[18] A filɛ, ni an donna jamana kɔnɔ tuma min na, i ye an lajigin finɛtiri min fɛ, i ka nin juru bilenman siri o la. I ka i fa ni i ba ni i balimaw ani i fa ka so mɔgɔw bɛɛ lajɛ i fɛ i ka so kɔnɔ.
[19] Ni u la mɔgɔ dɔ bɔra so kɔnɔ ka taa kɛnɛma, o joli hakɛ na kɛ a yɛrɛ kun, o jalaki tɛ an kan. Nka mɔgɔ o mɔgɔ bɛ i fɛ so kɔnɔ, ni mɔgɔ dɔ bolo sera o dɔ ma, o joli hakɛ na kɛ an kun.
[20] Nka ni i ye an ko fɔ, i y'a to an ka kalili min kɛ, an na hɔrɔnya o ma.»
[21] Rahab ye u jaabi ko: «Aw ye min fɔ, o ka kɛ.» A ye u bila ka taa, u taara. A ye o juru bilenman siri finɛtiri la.
[22] U taara ka se kulu jamana la ka tile saba kɛ yen fo u nɔgɛnbaaw ka kɔsegin. U nɔgɛnbaaw ye u ɲini sira fan bɛɛ la, nka u ma u ye.
[23] O cɛ fila kɔseginna ka jigin ka bɔ kulu jamana la ka Jurdɛn ba tigɛ ka taa Nun denkɛ Josue sɛgɛrɛ. Ko minw kɛra u la, u ye olu bɛɛ lakali a ye.
[24] U y'a fɔ Josue ye ko: «Tiɲɛ la, Matigi ye o jamana bɛɛ don an bolo, fo o jamana mɔgɔw bɛɛ ja tigɛra an ɲɛ.»