[1] Josue salen kɔ, Israɛl bɔnsɔn ye Matigi ɲininka ko: «Siya jumɛn fɔlɔ na bɔ an cɛma ka taa Kanankaw kama ka u kɛlɛ?»
[2] Matigi ko: «Juda siya fɔlɔ ka taa. A filɛ, ne ye jamana don u bolo.»
[3] O tuma la Juda siya y'a fɔ Simeɔn siya ye ko: «Aw ka taa an fɛ an ciyɛn dugukolo la, an ka Kanankaw kɛlɛ, an fana na taa aw fɛ aw ta la.» Simeɔn siya taara u fɛ.
[4] Ayiwa Juda siya wulila ka taa. Matigi ye Kanankaw ni Ferɛz siya don u bolo. U ye olu la mɔgɔ waa tan faga Bezɛk.
[5] U ye Adoni-Bezɛk sɔrɔ yen. U ye Kanankaw ni Ferɛz siya kɛlɛ ka se sɔrɔ u kan.
[6] Adoni-Bezɛk bolila, nka u ye a nɔgɛn ka a minɛ ka a bolonkɔni kunbaw ni a sennkɔni kunbaw tigɛ.
[7] O kɛlen kɔ, Adoni-Bezɛk ko: «Masakɛ biwolonwula bolonkɔni kunbaw ni u sennkɔni kunbaw tigɛlen ye u ka dumuni cɛ ne ka dumuni kɛ tabali jukɔrɔ. Ne ye min kɛ, Ala ye ne sara o la.» U taara n'a ye Jerusalɛm. A sara yen.
[8] Juda bɔnsɔn ye Jerusalɛm kɛlɛ k'a minɛ ka npan kɛ k'a ci ka dugu jeni.
[9] O kɔ, Kananka minw sigilen tun bɛ kulu jamana la worodugu yanfan fɛ ani jɛkɛnɛ la, Juda bɔnsɔn jiginna ka taa olu kɛlɛ.
[10] Kananka minw sigilen tun bɛ Heborɔn, Juda bɔnsɔn taara olu kama ka u kɛlɛ. Heborɔn tɔgɔ tun ye Kirjat-Araba ye ka kɔrɔ. U ye Sesai ni Ahiman ani Talmai ka gwaw tiɲɛn.
[11] U bɔra yen ka taa Debirkaw kama ka u kɛlɛ, o tun bɛ wele Kirjat-Sefɛr ka kɔrɔ.
[12] Ayiwa Kalɛb ko: «Ni min ye Kirjat-Sefɛr kɛlɛ ka se sɔrɔ a kan, ne na ne denmuso Akisa di o ma k'a kɛ a muso ye.»
[13] O tuma la Kalɛb dɔgɔkɛ Kenaz denkɛ Otniɛl taara a minɛ. Kalɛb ye a denmuso Akisa di o ma ka kɛ a muso ye.
[14] Akisa sera Otniɛl ka so tuma min na, a ye a cɛ kɔnɔnasu ko a ka foro dɔ deli a fa fɛ. Akisa jiginna ka bɔ a ka fali kan tuma min na, Kalɛb y'a fɔ a ye ko: «I bɛ mun fɛ?»
[15] A ye a fa jaabi ko: «I ka ne sɔn, sabu i ye worodugu yanfan dugukolo jintan dɔ di ne ma. I ka ji boyi yɔrɔ dɔw fana di ne ma.» Kalɛb ye sanfɛ ji boyi ani duguma ji boyi dɔw di a ma.
[16] Musa birankɛ tun ye Keni siya ye. O bɔnsɔn ni Juda bɔnsɔn bɔra ntamaro sunw dugu Jeriko laɲɔgɔn fɛ ka taa Juda kungokolon kɔnɔ ka sigi o mɔgɔw fɛ yen. O bɛ Arad worodugu yanfan fɛ.
[17] O kɔ, Juda siya taara a kɔrɔkɛ Simeɔn siya fɛ ka Kanankaw kɛlɛ, olu minw sigilen tun bɛ Zefat. U ye o yɔrɔ halaki ka ban pewu ka o dugu wele ko Horma.
[18] Juda siya ye Gaza ni Askalɔn ani Ekirɔn ni u lamini dugukolow fana minɛ.
[19] Matigi kɛra Juda siya fɛ. Juda ye kulu jamana minɛ, nka a ma se ka jɛkɛnɛ la mɔgɔw gɛn, sabu nɛgɛ wotorow tun bɛ olu bolo.
[20] O kɔ, Heborɔn dira Kalɛb ma ka kɛɲɛ ni Musa ka kuma fɔlen ye. Ale ye Anak denkɛ saba bɔnsɔn gɛn ka bɔ yen.
[21] Jebuska minw sigilen tun bɛ Jerusalɛm, Benjamɛn bɔnsɔn ma se ka olu gɛn. O Jebuskaw sigira Benjamɛn bɔnsɔn cɛma Jerusalɛm fo ka na se bi ma.
[22] Yusufu bɔnsɔn taara Bɛtɛl kama k'a kɛlɛ. Bɛtɛl tɔgɔ tun ye Luz ye ka kɔrɔ. Matigi tora u fɛ. Yusufu bɔnsɔn ye Bɛtɛl ko lajɛ.
[24] Kolajɛbaaw ye cɛ dɔ bɔtɔ ye dugu kɔnɔ. U y'a fɔ a ye ko: «An b'i deli, i ka dugu donda jira an na, an na ko ɲuman kɛ i ye.»
[25] A ye dugu donda jira u la. U ye o dugu ci ni npan ye. U ye o cɛ ni a ka so mɔgɔw bɛɛ bila ka taa.
[26] O tuma la, o cɛ taara Hɛti bɔnsɔn ka jamana la ka dugu sigi ka o tɔgɔ da ko Luz. O ye o dugu tɔgɔ ye halibi.
[27] Manase siya ma se ka Bɛt-Seankaw ni o lamini duguw mɔgɔw gɛn. A ma se ka Tanakkaw ni o lamini duguw mɔgɔw ni Dɔrkaw ni o lamini duguw mɔgɔw ni Jibleamkaw ni o lamini duguw mɔgɔw ani Megidokaw ni o lamini duguw mɔgɔw fana gɛn. Kanankaw ja gɛlɛyalen sigilen tun bɛ o jamana la.
[28] Israɛl bɔnsɔn ye barika sɔrɔ tuma min na, u ye Kanankaw kɛ jɔnw ye nka u ma u gɛn ka bɔ yen.
[29] Kananka minw sigilen tun bɛ Gezɛr, Efrayim bɔnsɔn ma se ka olu gɛn fewu, nka Kanankaw sigira u cɛma Gezɛr.
[30] Zabulɔn bɔnsɔn ma se ka Kitrɔnkaw gɛn ani Nahalolkaw. Kanankaw sigira u cɛma, nka u kɛra u ka jɔnw ye.
[31] Asɛr bɔnsɔn ma se ka Akokaw ni Sidɔnkaw ni Akilalkaw ni Akizibkaw ni Helibakaw ni Afikkaw ani Rehɔbkaw gɛn ka bɔ yen.
[32] Asɛr bɔnsɔn sigira o jamana kɔnɔ Kanankaw cɛma, k'a masɔrɔ u ma se ka u gɛn.
[33] Nefitali bɔnsɔn ma se ka Bɛt-Semɛskaw ni Bɛt-Anatkaw gɛn, nka u sigira o jamana kɔnɔ Kanankaw cɛma. O Bɛt-Semɛskaw ni Bɛt-Anatkaw ye diyagoya baara kɛ u ye.
[34] Amɔr siya ye Dan bɔnsɔnɲɔni ka yɛlɛn kulu kan. U ye Dan bɔnsɔn bali ka jigin jɛkɛnɛ la.
[35] O Amɔr siya sigilen tora Herɛs kulu ni Ajalɔn ani Salibim, nka Yusufu ka so bolo digira u la ka u bila diyagoya baara la.
[36] Amɔr siya ka jamana dan bɔra Akirabim yɛlɛn yɔrɔ la ka taa se Sela ka tɛmɛn ka taa ɲɛ fɛ.