[1] Matigi y'a fɔ Josue ye ko,
[2] a k'a fɔ Israɛl bɔnsɔn ye ko: «Aw ka bolibaa kalifadon duguɲɛnatɔmɔ aw ka duguw la, ne ye o min fɔ aw ye Musa fɛ,
[3] walisa ni mɔgɔ min filila ka mɔgɔ faga k'a sɔrɔ a ma i tugu k'a kɛ, o tigi ka boli ka taa yen, o na aw kisi aw joli hakɛbɔbaa ma.
[4] Mɔgɔ fagala na taa o dugu kelen na, ka i jɔ dugu donda la ka a ka koɲɛ fɔ o dugu cɛkɔrɔbaw ye. Olu na a ladon u fɛ dugu kɔnɔ ka sigi yɔrɔ di a ma u cɛma.
[5] Ni joli hakɛbɔbaa taara a nɔ fɛ, u kana o mɔgɔ fagala don a bolo, k'a masɔrɔ a ma i tugu k'a mɔgɔɲɔgɔn faga, sabu a tun ma a koniya ka kɔrɔ.
[6] O mɔgɔ fagala ka to o dugu kɔnɔ fo a ka kiri ka tigɛ kiritigɛjamaɲɛ kɔrɔ. A ka to yen fo o waati sarakalasebaaw kuntigi ka sa. O kɔ, o mɔgɔ fagala bolila ka bɔ dugu min na, a na segin ka taa yen, a yɛrɛ ka dugu la a ka so kɔnɔ.»
[7] U ye dugu minw bila, olu filɛ: Kedɛs min bɛ Galile jamana la Nefitali kulu jamana la, ani Sisɛm min bɛ Efrayim kulu jamana la, ani Kirjat-Araba, o kɔrɔ ko Heborɔn, Juda kulu jamana la.
[8] Jurdɛn ba kɔ fɛ Jeriko kɔrɔn yanfan fɛ Rubɛn bɔnsɔn cɛma, o ye Bezɛr ye kungokolon kɔnɔ jɛkɛnɛ la ani Ramɔt min bɛ Galad, Gad bɔnsɔn cɛma ani Golan min bɛ Basan, Manase bɔnsɔn cɛma.
[9] Olu ye o duguɲɛnatɔmɔlenw ye Israɛl siya bɛɛ ani u ka siginfɛ bɛɛ ye, walisa mɔgɔ o mɔgɔ ye mɔgɔ faga, ni a ma a dabɔ a kama, o ka taa i dogo yen, a na kisi joli hakɛbɔbaa ma sani a ka ko kaɲɛnabɔ kiritigɛjamaɲɛ kɔrɔ.