[1] Kabini tuma jan Matigi tun ye Israɛl bɔnsɔn tila ka bɔ u lamini juguw bolo ka lafiya di u ma. Josue kɔrɔla ka si jan sɔrɔ tuma min na,
[2] a ye Israɛl bɛɛ wele, u ka cɛkɔrɔbaw ni u ka kuntigiw ni u ka kiritigɛlaw ani u ka jalatigibaw, k'a fɔ u ye ko: «Ne kɛra cɛkɔrɔba ye, ne ye si jan sɔrɔ.
[3] Matigi, aw ka Ala ye min bɛɛ kɛ o siyaw la aw ɲɛ na, aw ye o bɛɛ ye, k'a masɔrɔ Matigi aw ka Ala ye kɛlɛ kɛ aw ye.
[4] A filɛ, jamana tɔ minw ma minɛ fɔlɔ, ani ne ye siya minw halaki k'a daminɛ Jurdɛn ba la fo ka taa se Kɔgɔjiba ma tilebi yanfan fɛ, ne ye olu bɛɛ tilatila aw cɛ ni kala dali ye ka kɛ aw ka siyaw ciyɛn ye ka kɛɲɛ ni aw ka gwaw ye.
[5] Matigi, aw ka Ala na u gɛn ka bɔ aw ɲɛ ka olu tigiya di aw ma. Aw na u ka jamana minɛ ka kɛ ciyɛn ye i ko Matigi aw ka Ala y'a fɔ cogo min na.
[6] Ko minw sɛbɛnnen bɛ Musa ka sariya kitabu la, aw nɔrɔlen ka to olu la ka a ci fɔlenw mara k'a kow bɛɛ kɛ. Aw kana fara ka taa kinin wala numan fɛ.
[7] Siya minw sigilen bɛ aw cɛma, aw kana aw yɛrɛw nɔgɔ olu fɛ. Aw kana u ka bato fɛnw tɔgɔ fɔ. Aw kana aw kali u la, aw kana baara kɛ u ye, aw kana biri u kɔrɔ fewu.
[8] Nka aw nɔrɔlen ka to Matigi aw ka Ala la i ko aw y'a kɛ cogo min na fo ka na se bi ma.
[9] K'a masɔrɔ Matigi ye siyaba barikamaw gɛn ka bɔ aw ɲɛ. Mɔgɔ si ma se ka jɔ aw ɲɛ fo ka na se bi ma.
[10] Aw la mɔgɔ kelen ye mɔgɔ waa kelen gɛn, sabu Matigi, aw ka Ala ye kɛlɛ kɛ aw ye i ko a y'a fɔ aw ye cogo min na.
[11] Ayiwa a' ye aw yɛrɛw kɔlɔsi ka Matigi, aw ka Ala kanu.
[12] «Ayiwa ni aw murutira, siya minw bɛ aw cɛma, ni aw nɔrɔla olu la, ni aw ni olu kɛra furuɲɔgɔn ye, ni aw jɛra olu fɛ,
[13] aw k'a dɔn ko Matigi, aw ka Ala tɛna to ka o siyaw gɛn ka bɔ aw ɲɛ tun, nka u na kɛ minɛli juru ni jan ye aw kama. U na kɛ gɛɲɛ ye aw kɛrɛw la ka kɛ ŋɔniw ye aw ɲɛw la, fo ka aw halaki ka aw ban ka bɔ o jamana la, Matigi aw ka Ala ye o min di aw ma.
[14] «A filɛ, ne bɛ taa dugukolo kan mɔgɔ bɛɛ taa sira fɛ bi. Aw y'a dɔn aw dusukunw ni aw niw la sisan ko Matigi aw ka Ala tun ye kumaɲuman minw fɔ aw ye, ko hali o kelen ma to ni a ma min dafa aw ye. A ye o bɛɛ kɛ k'a dafa.
[15] K'a masɔrɔ Matigi aw ka Ala ye o bɛɛ kɛ k'a dafa aw ye cogo min na, o cogo la Matigi na ko jugu kɛ aw la ni siran kow ye fo ka aw halaki ka aw ban ka bɔ o jamanaɲuman la, Matigi aw ka Ala ye o min di aw ma.
[16] Matigi aw ka Ala ye layidu minw di aw ma, ni aw ye olu tiɲɛn ka taa ka baara kɛ bato fɛn wɛrɛw ye ka aw biri olu kɔrɔ, Matigi ka dimiya na wuli aw kama ka aw halaki ka aw ban ka bɔ o jamanaɲuman la, a ye o min di aw ma.»