[1] Yusufu denkɛw ye niyɔrɔ min sɔrɔ kala dali la, o dan bɔra Jurdɛn ba da la Jeriko da fɛ, Jeriko jiman yɔrɔ kɔrɔn yanfan fɛ, ka tɛmɛn kungokolon fɛ ka bɔ Jeriko ka yɛlɛn kulu fɛ fo ka se Bɛtɛl.
[2] A dan tɛmɛnna Luz fɛ ka taa ka surunya Arkakaw ka dancɛ Atarɔt la.
[3] A jiginna ka taa tilebi yanfan fɛ fo ka taa se Jafalɛt bɔnsɔn dancɛ ma, ka taa se duguma Bɛt-Horɔn dancɛ ma fo ka taa se Gezɛr ka taa bila kɔgɔji la.
[4] O tun ye Yusufu denkɛw Manase ni Efrayim niyɔrɔ ye.
[5] Efrayim bɔnsɔn niyɔrɔ dugukolo filɛ nin ye ka kɛɲɛ ni u ka gwaw ye. U ciyɛn kɔrɔn yanfan dancɛ daminɛna Atarɔt-Adar ka taa se sanfɛ Bɛt-Horɔn ma.
[6] A tilebi yanfan dancɛ daminɛna Mikmetat saheli yanfan fɛ. O dancɛ farala ka taa kɔrɔn yanfan fɛ ka tɛmɛn Tanat-Silo kɛrɛ fɛ ka taa se Janoak kɔrɔn yanfan fɛ.
[7] O kɔ, a jiginna ka bɔ Janoak ka taa Atarɔt ni Narata fo ka taa se Jeriko, ka taa se Jurdɛn ba da la.
[8] Ka bɔ Tapuak, a dancɛ tɛmɛnna tilebi yanfan fɛ fo ka taa se Kana kɔji ma ka taa bila kɔgɔji la. O kɛra Efrayim bɔnsɔn ciyɛn ye ka kɛɲɛ ni u ka gwaw ye.
[9] Dugu dɔw fana ni u dafɛ dugu misɛnw bɔra Manase bɔnsɔn ciyɛn na ka di Efrayim bɔnsɔn ma.
[10] Kananka minw sigilen tun bɛ Gezɛr, u ma olu gɛn. O Kanankaw sigilen bɛ Efrayim cɛma halibi, nka u kɛra u ka jɔnw ye.