[1] Amɔr siya ka masakɛ minw sigilen tun bɛ Jurdɛn ba tilebi yanfan fɛ, ani Kanankaw ka masakɛ minw sigilen tun bɛ kɔgɔji da la, olu bɛɛ y'a mɛn ko Matigi ye Jurdɛn ji ja Israɛl bɔnsɔnɲɛ fo u ka tɛmɛn tuma min na, u ja tigɛra. Dusu si ma to u kɔnɔ tun Israɛl bɔnsɔnɲɛsiran kosɔn.
[2] O tuma la Matigi y'a fɔ Josue ye ko: «I ka kɛrɛbɔ fara kɛ muruw ye ka Israɛl bɔnsɔn boloko ko kura a siɲɛ filanan la.»
[3] Josue ye kɛrɛbɔ fara kɛ muruw ye ka Israɛl bɔnsɔn boloko Aralot tintin kan.
[4] U boloko kun filɛ nin ye Josue fɛ: kɛlɛkɛ cɛ minw bɔra Misira jamana la, olu bɛɛ sara kungokolon kɔnɔ ka u to sira la, u bɔlen kɔ Misira.
[5] Mɔgɔ minw bɔra Misira jamana la, olu bɛɛ bolokolen tun don, nka mɔgɔ minw bangera kungokolon kɔnɔ ka u to sira la u bɔlen kɔ Misira, olu si tun ma boloko.
[6] Israɛl bɔnsɔn ye san binaani taama kɛ kungokolon kɔnɔ, o siyaw la kɛlɛkɛ cɛ minw bɔra Misira, fo olu bɛɛ ka halaki ka ban, sabu u ma Matigi kan minɛ. Matigi tun ye i kali u bɛnbaw ye, ko a na jamana min di an ma, ni o falen bɛ nɔnɔ ni di la fo ka woyo, a y'i kali olu ye ko u tɛna o jamana ye.
[7] A ye u den minw bila u nɔ na, Josue ye olu boloko, sabu u bolokobali tun don. Ka u to sira la, u tun ma boloko.
[8] U tilara siya bɛɛ bolokoli la tuma min na, u tora u nɔ na bugufyɛ la fo u ka kɛnɛya.
[9] Matigi y'a fɔ Josue ye ko: «Ne ye Misira maloya ko kolonkolon ka bɔ aw kun bi.» O de kosɔn o yɔrɔ tɔgɔ dara ko Gilgal fo ka na se bi ma.
[10] Israɛl bɔnsɔn sigira Gilgal. U ye Tɛmɛnkan seli kɛ o kalo tile tan ni naaninan don wula da fɛ Jeriko jɛkɛnɛw la.
[11] Tɛmɛnkan seli dugusajɛ, u ye o jamana suman dun. U ye buuru fununbali ni sumankisɛ jirannen dun o don yɛrɛ la.
[12] U ye o jamana suman dun don min na, o dugusajɛ manɛ ma bɔ tun. Israɛl bɔnsɔn ma manɛ sɔrɔ tun, nka u ye Kanan jamana suman dun o san na.
[13] Ka Josue to Jeriko da fɛ, a ye a ɲɛ kɔrɔta ka filɛli kɛ. Cɛ dɔ jɔlen filɛ a ɲɛ fɛ, o ka npankisɛ tun bɛ a bolo. Josue taara a yɔrɔ k'a fɔ a ye ko: «I bɛ an fɛ wa, wala an juguw?»
[14] O cɛ y'a jaabi ko: «Ayi, nka ne ye Matigi ka kɛlɛbolo kuntigi ye. Ne nana sisan.» Josue y'i bi k'a ɲɛ biri duguma k'a bato k'a fɔ a ye ko: «Ne matigi, i bɛ mun fɔ i ka jɔnkɛ ye?»
[15] Matigi ka kɛlɛbolo kuntigi y'a fɔ Josue ye ko: «I ka sabara bɔ i sen na, sabu i jɔlen bɛ yɔrɔ min na, o ye yɔrɔ senuma de ye.» Josue y'o kɛ.