[1] Jurdɛn ba tilebi fɛ masakɛw bɛɛ, kulu jamana masakɛw ani kɛnɛba ni kɔgɔji da la masakɛ minw bɛ Liban kuntilenna la, Hɛti bɔnsɔn ni Amɔr siya ani Kanankaw ni Ferɛz siya ni Hev siya ani Jebuskaw, olu ye o kibaru mɛn tuma min na,
[2] u ye ɲɔgɔn lajɛ ka u kan kɛ kelen ye ko u bɛ Josue ni Israɛl kɛlɛ.
[3] Josue ye min kɛ Jeriko ni Ayi la, Gabaonkaw ye o ko mɛn tuma min na, u ye keguya kɛ.
[4] U ye dugu taa minanw labɛn ka taa. U ye bɔrɛ kɔrɔw da u ka faliw kan ka diwɛn foroko kɔrɔ faralen kalalen ta.
[5] U ye sabara kɔrɔ barilenw don u sen na ka fini kɔrɔw don u kan na. U ka sirafana buuru bɛɛ jalen mugumugulen tun don.
[6] U taara Josue sɛgɛrɛ Gilgal bugufyɛ la k'a fɔ ale ni Israɛl bɛɛ ye ko: «An bɔra jamana jan na. Sisan aw ka layidu ta an ye.»
[7] Israɛl mɔgɔw ye o Hev bɔnsɔn jaabi ko: «A dɔrɔ aw ka so bɛ an cɛma. An bɛ se ka layidu ta aw ye cogo di?»
[8] U y'a fɔ Josue ye ko: «An ye i ka jɔnw ye.» Josue ye u ɲininka ko: «Aw ye jɔniw ye? Aw bɔra min?»
[9] U y'a jaabi ko: «I ka jɔnw bɔra jamana jan na ka na Matigi, i ka Ala tɔgɔba kosɔn, k'a masɔrɔ an ye a ko mɛn ani a ye min kɛ Misira jamana la.
[10] A ye min kɛ Amɔr siya ka masakɛ fila la Jurdɛn ba kɔ fɛ, Hesibɔn masakɛ Sihon ani Basan masakɛ Og kɔni, olu minw tun bɛ Astarɔt, an ye o kow bɛɛ mɛn.
[11] An ka cɛkɔrɔbaw ni an ka jamana mɔgɔw bɛɛ y'a fɔ an ye ko an ka sirafana ta ka na aw kunbɛn k'a fɔ aw ye ko, an ye aw ka jɔnw ye. Sisan aw ka layidu ta an ye.
[12] An ka buuru filɛ. An bɔra an ka sow kɔnɔ don min na, ko an bɛ na aw fɛ yan, an ye o kalaman ta ka kɛ an ka sirafana ye. Sisan a jalen mugumugulen don.
[13] An ye nin diwɛn foroko kurakuraw fa, u faralen filɛ. An ka finiw ni an ka sabara bɛɛ kɔrɔla taama yɔrɔ janya kosɔn.»
[14] Israɛl mɔgɔw ye u ka sirafana dɔ ta, nka u ma Matigi ɲininka o ko la.
[15] Josue ye hɛrɛ don a ni olu cɛ ka layidu ta u ye ko u ɲɛnama na to. Jamala kuntigiw ye u kali u ye.
[16] U ka layidu talen kɔ tile saba, Israɛl bɔnsɔn y'a mɛn ko o mɔgɔw ye u sigiɲɔgɔnw ye, ko u ka so bɛ u cɛma.
[17] O tuma la Israɛl bɔnsɔn taara ka se u ka duguw ma a tile sabanan don. U ka duguw tun ye Gabaon ni Kefira ni Beɛrɔt ani Kirjat-Jearim ye.
[18] Israɛl bɔnsɔn ma u faga, katuguni jamala kuntigiw tun ye u kali u ye Matigi, Israɛl ka Ala la. Jama bɛɛ ye dajukɔrɔ kuma fɔ kuntigiw ma.
[19] Kuntigiw bɛɛ y'a fɔ jama bɛɛ ye ko: «An ye an kali u ye Matigi, Israɛl ka Ala la. Sisan an tɛ se ka maga u la tun.
[20] An na u kɛ cogo min na, o filɛ. An na u ɲɛnama to walisa dimiya kana na bi an kan an ka kalili kosɔn.»
[21] Kuntigiw y'a fɔ u ye ko: «U ɲɛnama ka to.» Ayiwa u kɛra dɔgɔ ɲininaw ni ji bɔlaw ye jama bɛɛ ye, i ko kuntigiw y'a fɔ u ye cogo min na.
[22] Josue ye Gabaonkaw wele ka kuma u fɛ ko: «Mun y'a to aw ye an lafili k'a fɔ ko aw bɔra yɔrɔ jan na, k'a sɔrɔ aw ka so bɛ an cɛma?
[23] Sisan aw dangalen bɛ, aw tɛna bɔ jɔnya la abada. Aw na kɛ dɔgɔ ɲininaw ni ji bɔlaw ye ne ka Ala ka so ye.»
[24] U ye Josue jaabi ko: «A fɔra i ka jɔnw ye ko Matigi, i ka Ala ye ci fɔ a ka jɔnkɛ Musa ye ko a na jamana bɛɛ di aw ma ka jamana mɔgɔw bɛɛ halaki aw ɲɛ. O de kosɔn an siranna aw ɲɛ kosɛbɛ an yɛrɛw ni kosɔn, fo an ye nin kɛ.
[25] A filɛ, an bɛ i bolo sisan. Ko min ka di i ye, ani min tilennen bɛ i ɲɛ na, i ka o kɛ an na.»
[26] Min tun latigɛra u ta fan fɛ, Josue y'o kɛ. A ye u tila ka bɔ Israɛl bɔnsɔn bolo, u ma u faga.
[27] O don yɛrɛ la, Josue ye u kɛ dɔgɔ ɲininaw ni ji bɔlaw ye jama ni Matigi ka saraka bɔlan ye a ka yɔrɔɲɛnatɔmɔlen na. U bɛ o kɛ halibi.