[1] Ayiwa sisan Josue kɔrɔla, a ye si jan sɔrɔ. Matigi y'a fɔ a ye ko: «I kɛra cɛkɔrɔba ye, i ye si jan sɔrɔ, nka jamana minɛta tɔ ka ca.
[2] Jamana tɔ min tora, o filɛ nin ye, Filisitikaw ka jamana bɛɛ ani Gesurkaw ka jamana bɛɛ.
[3] A bɛ daminɛ Sikɔr ba la, o min bɛ woyo ka tɛmɛn Misira jamana kɛrɛ fɛ fo ka taa se Ekirɔn dancɛ ma saheli yanfan fɛ, o bɛ jate Kanan jamana ye. Filisitikaw ka masakɛ duuru sigi duguw tun bɛ yen, olu tun ye Gaza ni Asdɔd ni Askalɔn ni Gat ani Ekirɔn ye. Avakaw fana sigilen tun bɛ yen.
[4] Worodugu yanfan bɛɛ tun ye Kanankaw ka jamana ye ani Sidɔnkaw, ka bɔ Meara fo ka taa se Afɛk Amɔr siya dancɛ ma.
[5] Gebalkaw ka jamana ani Liban bɛɛ min bɛ tilebɔ fan fɛ, ani Bal-Gad min bɛ Hermɔn kulu kɔrɔ, k'a daminɛ o la fo ka taa se Hamat donda la,
[6] ani kulu jamana mɔgɔw bɛɛ k'a daminɛ Liban fo ka taa se Misirefɔt-Maim, Sidɔnkaw bɛɛ. Ne na olu bɛɛ gɛn ka bɔ Israɛl bɔnsɔnɲɛ. I ka o jamana tilatila Israɛl bɔnsɔn cɛ ni kala ye k'a kɛ ciyɛn ye, i ko ne y'a fɔ i ye cogo min na.
[7] Ayiwa i ka o jamana tilatila siya kɔnɔntɔn ani Manase siya tilancɛ cɛ.»
[8] Rubɛn siya ni Gad siya ani Manase siya tilancɛ dɔ ye u niyɔrɔ sɔrɔ Musa fɛ Jurdɛn ba kɔ kɔrɔn yanfan fɛ, i ko Matigi ka jɔnkɛ Musa y'a tilatila u cɛ cogo min na.
[9] O bɛ daminɛ Arnɔn kɔ da la Aroɛr yɔrɔ la jɛkɛnɛ cɛmancɛ dugu la ani Medeba kɛnɛ bɛɛ fo ka taa se Dibɔn.
[10] Amɔr siya ka masakɛ Sihon, min sigilen tun bɛ Hesibɔn, u ye o ka duguw bɛɛ sɔrɔ fo ka taa se Amɔn bɔnsɔn dancɛ ma.
[11] U ye Galad ni Gesurkaw ni Makakaw ka jamana ani Hermɔn kulu yɔrɔ bɛɛ ni Basan yɔrɔ bɛɛ sɔrɔ fo ka taa se Salika,
[12] o tun ye Basan masakɛ Og ka mara bɛɛ ye. Ale ye Astarɔt ni Edreyi mara. Ale kelen tun tora ka bɔ Refaim siya la. Musa ye olu bɛɛ gosi ka u gɛn,
[13] nka Israɛl bɔnsɔn ma Gesurkaw ni Makakaw gɛn. Gesurkaw ni Makakaw sigira Israɛl bɔnsɔn cɛma fo ka na se bi ma.
[14] Nka Musa ma niyɔrɔ si di Levi bɔnsɔn dama ma. Matigi, Israɛl ka Ala ka tasuma la sarakaw na kɛ olu niyɔrɔ ye, i ko a tun y'a fɔ Musa ye cogo min na.
[15] Musa ye niyɔrɔ kelen di Rubɛn bɔnsɔn ma ka kɛɲɛ ni u ka gwaw ye.
[16] U dancɛ daminɛna Arnɔn kɔ da la Aroɛr yɔrɔ la jɛkɛnɛ cɛmancɛ dugu la ani Medeba kɛrɛ fɛ kɛnɛ bɛɛ,
[17] ani Hesibɔn ni a kɛnɛ la duguw bɛɛ ani Dibɔn ni Bamɔt-Bal ni Bɛt-Bal-Mɛon
[18] ni Jahaz ni Kedemɔt ani Mefat
[19] ni Kirjatayim ni Sibma ni Zerat-Hasakar min bɛ jɛkɛnɛ la kulu kan
[20] ani Bɛt-Peɔr ni Pisiga kulu jiginjiginw ni Bɛt-Jesimɔt
[21] ani kɛnɛba la duguw bɛɛ ani Amɔr siya ka masakɛ Sihon min sigilen tun bɛ Hesibɔn ani o ka maraw bɛɛ. Musa ye ale ni Madian masakɛw Evi ni Rekɛm ni Zur ni Hur ani Reba fana faga, olu tun ye Sihon ka masakɛw ye. U sigilen tun bɛ o jamana kɔnɔ.
[22] Israɛl bɔnsɔn ye mɔgɔ minw faga ni npan ye, Beɔr denkɛ filɛlikɛla Balam tun ye olu dɔ ye.
[23] Jurdɛn ba da kɛra Rubɛn bɔnsɔn dancɛ ye. Olu tun ye Rubɛn bɔnsɔn ka dugubaw ni u ka dugu misɛnw ye ka kɛɲɛ ni u ka gwaw ye.
[24] Musa ye niyɔrɔ kelen di Gad bɔnsɔn fana ma ka kɛɲɛ ni u ka gwaw ye.
[25] U ye Jaezɛr jamana sɔrɔ ani Galad dugubaw bɛɛ ni Amɔn bɔnsɔn ka jamana tilancɛ fo ka taa se Aroɛr, o bɛ Raba kuntilenna la,
[26] k'a daminɛ Hesibɔn fo ka taa se Ramat-Mizpe ni Betonim, ka bɔ Mahanayim fo ka taa se Debir dancɛ ma,
[27] ani kɛnɛba la Bɛt-Haram ni Bɛt-Nimra ni Sukɔt ani Zafɔn, olu tun ye Hesibɔn siya ka masakɛ Sihon ka mara tɔ ye, ka dan Jurdɛn ba da la ka tɛmɛn fo ka taa se Kinerɛt ba dan yɔrɔ ma Jurdɛn kɔrɔn yanfan fɛ.
[28] O dugubaw ni u dafɛ dugu misɛnw kɛra Gad bɔnsɔn niyɔrɔ ye ka kɛɲɛ ni u ka gwaw ye.
[29] Musa ye niyɔrɔ kelen di Manase siya tilancɛ ma ka kɛ Manase bɔnsɔn tilancɛ niyɔrɔ ye ka kɛɲɛ ni u ka gwaw ye.
[30] Olu niyɔrɔ daminɛna Mahanayim, Basan bɛɛ ani Basan masakɛ Og ka mara bɛɛ ani Basan na Jayir ka bugufyɛ biwɔɔrɔ bɛɛ
[31] ani Galad jamana tilancɛ ni Astarɔt ni Edreyi. Olu tun ye Basan masakɛ Og ka dugubaw ye. U kɛra Manase denkɛ Makir bɔnsɔn ta ye. Olu dira Manase denkɛ Makir bɔnsɔn tilancɛ ma ka kɛɲɛ ni u ka gwaw ye.
[32] Musa ye o jamana tilatila u cɛ k'a to Moab kɛnɛw la Jurdɛn ba kɔ kɔrɔn yanfan fɛ Jeriko kuntilenna la.
[33] Nka Musa ma niyɔrɔ si di Levi bɔnsɔn ma. Matigi, Israɛl ka Ala kɛra u niyɔrɔ ye, i ko a y'a fɔ u ye cogo min na.