[1] Matigi diminna Israɛl bɔnsɔn kɔrɔ ko kura. A ye Dawuda lawuli u kama k'a fɔ a ye ko: «I ka Israɛl bɔnsɔn ni Juda bɔnsɔn dan.»
[2] O tuma la masakɛ y'a fɔ Joab ni a fɛ kɛlɛbolo kuntigiw ye ko: «A' ye taa Israɛl jamana yɔrɔ bɛɛ la ka bɔ Dan fo ka taa se Beɛr-Seba ka a mɔgɔw jate walisa ne ka Israɛl bɔnsɔn dama dɔn.»
[3] Joab ye masakɛ jaabi kɔ: «A tun ka di ne ye ko Matigi i ka Ala ka nin mɔgɔ caya siɲɛ kɛmɛ ka tɛmɛn bi ta kan walisa ne matigi masakɛ ka o ye a yɛrɛ ɲɛ la, nka mun kosɔn ne matigi masakɛ bɛ miiri nin ɲɔgɔn ko la?»
[4] O bɛɛ n'a ta masakɛ ka kuma fɔlen ye se sɔrɔ Joab ni a ka kɛlɛbolo kuntigiw ka kuma kan. O tuma la Joab ni kɛlɛbolo kuntigiw bɔra masakɛ ɲɛ kɔrɔ ka taa Israɛl bɔnsɔn dan.
[5] U ye Jurdɛn ba tigɛ ka taa ka bugu turu Aroɛr dugu kinin yanfan fɛ Gad jɛkɛnɛ cɛmancɛ la, o kɔ, u taara Jaezɛr.
[6] U bɔra yen ka taa Galad jamana la ka bɔ yen ka taa Taktim-Hotsi jamana dugumala la. O kɔ, u taara Dan-Jan ka munumunu ka taa se Sidɔn.
[7] U bɔra yen ka taa Tir kɛlɛ kunbɛn so la ka taa Hev siya ka duguw bɛɛ la ani Kanankaw ka duguw bɛɛ la. U ka taama danna Juda worodugu yanfan fɛ Beɛr-Seba.
[8] U ye jamana yɔrɔw bɛɛ yaala kalo kɔnɔntɔn ni tile mugan kɔnɔ ka kɔsegin Jerusalɛm.
[9] O tuma la Joab taara mɔgɔ dannenw dama fɔ masakɛ ye. Israɛl bɔnsɔn na cɛ dannenw kɛra cɛ npan samabaa waa kɛmɛ segin ye. Juda bɔnsɔn cɛw kɛra cɛ waa kɛmɛ duuru ye.
[10] Mɔgɔw dannen kɔ, Dawuda dusukun y'a yɛrɛ jalaki. A y'a fɔ Matigi ye ko: «Ne ye jurumuba kɛ nin ko la. Ne b'i deli Matigi, i ka i ka baaraden ka tilenbaliya yafa a ma. Ne ye hakilintanya kɛ.»
[11] O dugusajɛ Dawuda wulilen ka bɔ sunɔgɔ la, Matigi ka kuma sera Dawuda ka yelikɛla kira Gad ma,
[12] ko a ka taa kuma Dawuda fɛ ko Matigi ko: «Tɔɔrɔ ko saba bɛ ne fɛ ka jira i la, i ka u la kelen ɲɛnatɔmɔ. Ne na o kɛ i la.»
[13] Ayiwa Gad taara Dawuda sɛgɛrɛ ka o kuma fɔ a ye ko: «I b'a fɛ nin tɔɔrɔ jumɛn ka lase i ma? I b'a fɛ san wolonwula kɔngɔba ka don i ka jamana la wala ka boli i juguw ɲɛ kalo saba kɔno, olu ka i nɔgɛn, wala tile saba fiɲɛbana ka kɛ i ka jamana kɔnɔ? I ka i miiri sisan, ne ka kan ka min fɔ ne cibaa ye, i ka o fɔ ne ye.»
[14] Dawuda ye Gad jaabi ko: «Ne tɔɔrɔlen bɛ kosɛbɛ. An na an yɛrɛw bila Matigi bolo k'a masɔrɔ ale ka dimiya na ban, nka ne kana bila mɔgɔw bolo.»
[15] O tuma la Matigi ye Israɛl bɔnsɔn gosi ni fiɲɛbana ye k'a daminɛ sɔgɔma fo ka waati latigɛlen se. K'a daminɛ Dan fo ka taa se Beɛr-Seba, cɛ waa biwolonwula halakira ka bɔ Israɛl bɔnsɔn na.
[16] Mɛlɛkɛ y'a bolo mɔɔnɔbɔ Jerusalɛm yanfan fɛ, ko a b'a halaki tuma min na, Matigi y'a fɔ mɛlɛkɛ ye ko: «O b'a bɔ, i ka i bolo kɔsegin sisan.» O tuma la Matigi ka mɛlɛkɛ tun bɛ Jebus Aravna ka gendekɛnɛ da fɛ.
[17] Dawuda ye mɛlɛkɛ kɛtɔ ye ka mɔgɔw gosi minkɛ, a kumana Matigi fɛ ko: «Ne de ye jurumu kɛ, ne de jalakira, nka nin mɔgɔw ye mun ko jugu kɛ? I bolo ka se ne ni ne fa ka so ma.»
[18] Gad taara Dawuda sɛgɛrɛ o don na k'a fɔ a ye ko: «I ka yɛlɛn ka taa saraka bɔlan jɔ Matigi ye Aravna ka gendekɛnɛ la.»
[19] O tuma la Dawuda wulila ka taa ka kɛɲɛ ni Matigi ka kuma fɔlen ye Gad ye.
[20] Aravna y'a ɲɛ kɔrɔta ka masakɛ ni a ka baaradenw natɔ ye a yɔrɔ la. A bɔra ka i biri k'a ɲɛ biri duguma masakɛ ɲɛ kɔrɔ.
[21] O kɔ, Aravna ko: «Mun kosɔn ne matigi masakɛ bɛ na a ka jɔn ka so?» Dawuda y'a jaabi ko: «Walisa ne ka i ka gendekɛnɛ san ka saraka bɔlan jɔ Matigi ye walisa fiɲɛbana ka ban ka bɔ mɔgɔw la.»
[22] Aravna y'a fɔ Dawuda ye ko: «Saraka min ka di ne matigi masakɛ ye, i ka o bɔ. Misiw filɛ ka kɛ saraka jenita ye, wotoro ni zuw na kɛ a dɔgɔw ye.
[23] Masakɛ, ne Aravna na o fɛnw bɛɛ di i ma.» Aravna ko: «Matigi i ka Ala ka sɔn i ka saraka la.»
[24] Masakɛ ye Aravna jaabi ko: «Ayi, ne b'a fɛ ka o bɛɛ san i fɛ warijɛ la. Ne ma fɛn o fɛn san, ne t'a fɛ ka o si kɛ saraka ye Matigi ne ka Ala ye.» O tuma la Dawuda ye o gendekɛnɛ ni o misiw san warijɛ sikle biduuru la.
[25] Dawuda ye saraka bɔlan jɔ Matigi ye yen ka saraka jenitaw ani nisɔndiya sarakaw bɔ. Matigi ka dimiya madara jamana ta fan fɛ. Fiɲɛbana banna ka bɔ Israɛl bɔnsɔn na.