[1] Saul denkɛ Isbosɛt y'a mɛn ko Abinɛr sara Heborɔn tuma min na, a dusu fagara. Israɛl bɛɛ hakili ɲaamina.
[2] O y'a sɔrɔ kɛlɛbolo kuntigi fila tun bɛ Saul denkɛ fɛ, kelen tɔgɔ ko Baana, kelen togɔ ko Rekab, olu tun ye balimaw ye. Benjamɛn bɔnsɔn Rimɔn denkɛw tun don ka bɔ Beɛrɔt dugu kɔnɔ. Beɛrɔt tun jatera Benjamɛn ta ye.
[3] Beɛrɔtkaw bolila ka taa u sigi Gitayim, u bɛ yen halibi.
[4] Denkɛ kelen tun bɛ Saul denkɛ Jonatan fɛ, o tɔgɔ ko Mefibosɛt, o sen tiɲɛnnen tun don. O si tun ye san duuru ye Saul ni Jonatan sa tuma la. Olu saya kibaru bɔra Jizreɛl ka se yen tuma min na, Mefibosɛt lamɔbaa y'a ta ka boli. A bira ka bɔ a lamɔbaa bolo k'a sen tiɲɛn.
[5] Rimɔn min bɔra Beɛrɔt, o denkɛ Rekab ni Baana sera Isbosɛt ka so tile gwan fɛ. A dalen tun bɛ tile gwan fɛ lafiya la.
[6] U donna so kɔnɔ k'a kɛ i ko u bɛ alikama ta. U ye Isbosɛt gosi a kɔnɔbara cɛmancɛ la, o kɔ, Rekab ni a balimakɛ bolila.
[7] U donna so kɔnɔ ka Isbosɛt dalen sɔrɔ a ka dalan kan a ka bon kɔnɔ. U y'a gosi k'a faga, o kɔ, ka a kunkolo tigɛ ka taa n'o ye u bolo. U ye su bɛɛ kɛ taama la ka kɛnɛba cɛ tigɛ.
[8] U taara ni Isbosɛt kunkolo ye fo Heborɔn ka o jira masakɛ Dawuda la, k'a fɔ ko: «I jugu Saul min tun b'a fɛ ka i faga, o denkɛ Isbosɛt kunkolo filɛ nin ye. Matigi ye ne matigi masakɛ mɔnɛ bɔ Saul ni a bɔnsɔn na bi.»
[9] Nka Dawuda ye Beɛrɔt Rimɔn denkɛw Rekab ni a balimakɛ Baana jaabi ko: «Matigi ɲɛnama tɔgɔ kosɔn, o min ye ne tila ne degun kow bɛɛ la,
[10] mɔgɔ dɔ nana a fɔ ne ye ko Saul sara. A tun b'a kɔnɔ ko o na kɛ kibaru ɲuman ye. Ne y'a minɛ k'a faga Ziklag. Ne ye o kɛ a kibaru fɔbaa sara ye.
[11] Ni ne y'o kɛ, ni mɔgɔ jugu dɔ nana mɔgɔ ɲuman faga a ka dalan kan a ka so kɔnɔ, yala ne man kan ka o joli sɔngɔ ɲininkali kɛ aw la ka aw halaki ka aw bɔ dugukolo kan wa?»
[12] O tuma la Dawuda ye u di a ka mɔgɔw ma ko olu ka o mɔgɔ fagalaw faga. U ye olu bolow ni u senw tigɛ ka u dulon Heborɔn dingɛ jiman kɛrɛ fɛ. O kɔ, u ye Isbosɛt kunkolo ta k'a don Abinɛr kaburu kɔnɔ Heborɔn.