[1] Dawuda ye a fɛ mɔgɔw bɛɛ lajɛ ka mɔgɔ dɔw sigi ka kɛ cɛ waa kelen-kelen kuntigiw ni cɛ kɛmɛ-kɛmɛ kuntigiw ye.
[2] A ye u tila kulu saba ye ka tila kelen di Joab ma ka tila filanan di Joab balimakɛ Zeruja denkɛ Abisai ma, Itai min bɔra Gat, ka a tila sabanan di o ma. O tuma la masakɛ y'a fɔ mɔgɔw ye ko: «Ne fana bɛ taa aw fɛ.»
[3] Nka jama y'a jaabi ko: «I tɛna taa k'a masɔrɔ ni an bolila, o tɛ foyi ye an juguw ɲɛ na. Hali ni an tilancɛ fagara, u tɛna o jate foyi ye, nka e ka fisa kɛlɛkɛ cɛ waa tan ye. O de kosɔn a ka fisa i yɛrɛ labɛnnen ka to dugu kɔnɔ, walisa i ka bɔ ka an dɛmɛ.»
[4] Masakɛ ko: «Min ka ɲi aw ɲɛ na, ne na o kɛ.» O tuma la masakɛ ye i jɔ dugu donda la. O mɔgɔw bɛɛ bɔra ka tɛmɛn kɛmɛ-kɛmɛ ni waa kelen-kelen.
[5] A ye nin ci di Joab ni Abisai ani Itai ma ko: «Aw ka kamalen Absalɔm kɔlɔsi ne kosɔn.» Masakɛ ye min fɔ kuntigiw ye Absalɔm ko la, mɔgɔw bɛɛ y'o mɛn.
[6] Dawuda ka mɔgɔw bɔra ka taa ɲɛ fɛ ka Absalɔm ka kɛlɛkɛ cɛw kunbɛn. Kɛlɛ kɛra Efrayim kungokolon tu kɔnɔ.
[7] Dawuda ka kɛlɛkɛ cɛw ye Absalɔm ka kɛlɛkɛ cɛw gosi, o kɛra tiɲɛnniba ye yen. Cɛ waa mugan fagara o don na.
[8] Kɛlɛ jɛnsɛnna jamana fan bɛɛ la. Mɔgɔ minw tununna tu kɔnɔ o don na, olu ka ca ni npan ka mɔgɔ fagalenw ye.
[9] Dawuda ka kɛlɛkɛ cɛw ni Absalɔm bɛnna. A yɛlɛlen tun bɛ faliba kan. Faliba donna terebente jiri jukɔrɔ. Absalɔm kunkolo balanna terebente sun bolow furancɛ la k'a dulon san ni dugu cɛ. Faliba taara k'a to yen.
[10] Cɛ dɔ y'o ye ka taa o fɔ Joab ye ko: «Ne ye Absalɔm dulonnen ye terebente sun bolow la.»
[11] Min nana o kibaru fɔ Joab ye, Joab y'a fɔ o kibaru fɔbaa ye ko: «I y'a ye cogo di? Mun kosɔn i m'a faga o yɔrɔ nin bɛɛ? Ne tun na warijɛ tan ni cɛ sirilan di i ma.»
[12] Nka o cɛ y'a fɔ Joab ye ko: «Hali ni i ye warijɛ waa kelen di ne ma, ne tun tɛna ne bolo se masakɛ denkɛ ma, k'a masɔrɔ an y'a fɔkan mɛn masakɛ fɛ i ni Abisai ani Itai ye ko: ‹A' ye aw yɛrɛw kɔlɔsi, aw kana se kamalen Absalɔm ma.›
[13] Ni ne tun y'a faga, o ko si tun tɛna dogo masakɛ la. E yɛrɛ tun na kɛ ne sendonbaa ye.»
[14] Joab y'a jaabi ko: «Ne tɛna ne jɔ ka mɛn yan ka i lamɛn.» O tuma la Joab ye tama saba ta ka taa olu turu Absalɔm ɲɛnama disi la jiribolow cɛma.
[15] O kɔ, Joab ka kɛlɛkɛ minan tabaa kamalen tan ye Absalɔm lamini k'a faga.
[16] O kɔ, Joab ye buru fyɛ. Dawuda ka kɛlɛkɛ cɛw ye Absalɔm ka kɛlɛkɛ cɛw nɔgɛnni dabila, k'a masɔrɔ Joab ye u bali.
[17] U ye Absalɔm ta k'a fili dingɛba dɔ kɔnɔ kungo kɔnɔ yen ka kabakurun sogolon a kan. Israɛl bɔnsɔn bɛɛ bolila ka taa u ka yɔrɔw la.
[18] Absalɔm tun ye samasen dɔ jɔ masakɛ ka jɛkɛnɛ la k'a ɲɛnama to sabu a ko: «Denkɛ si tɛ ne fɛ ka ne tɔgɔ lawuli.» A ye o tɔgɔ da ko: «Absalɔm ka samasen.» O bɛ wele Absalɔm ka samasen fo ka na se bi ma.
[19] Zadɔk denkɛ Akimaz y'a fɔ Joab ye ko: «A to, ne ka boli ka taa nin kibaru fɔ masakɛ ye ko Matigi ye a hakɛ bɔ a juguw la.»
[20] Joab y'a jaabi ko: «I kana taa kibaru fɔ masakɛ ye bi. I na taa don wɛrɛ. Kibaru man di bi sabu masakɛ denkɛ sara.»
[21] O kɔ, Joab y'a fɔ Kusi ye ko: «I ye min ye, i ka taa o lakali masakɛ ye.» Kusi y'i biri Joab kɔrɔ, o kɔ, ka boli ka taa.
[22] Zadɔk denkɛ Akimaz y'a fɔ Joab ye ko kura ko: «A kɛra cogo o cogo, a to ne ka boli ka taa Kusi nɔ fɛ.» Joab ko: «Mun y'a to i b'a fɛ ka taa, ne denkɛ? O ci fɔli tɛna foyi ɲɛ i ye.»
[23] Akimaz ko: «A kɛra cogo o cogo, ne b'a fɛ ka taa.» Joab y'a fɔ a ye ko: «Ayiwa, i ka taa.» O tuma la Akimaz bolila ka jɛkɛnɛ cɛ tigɛ ka tɛmɛn Kusi la.
[24] Dawuda sigilen tun bɛ donda fila furancɛ la. Kɔlɔsilikɛla tun yɛlɛnna san fɛ ka i jɔ da kunna kogo san fɛ. O y'a ɲɛ kɔrɔta ka filɛli kɛ. A ye mɔgɔ kelen bolitɔ ye.
[25] Kɔlɔsilikɛla pɛrɛnna ka masakɛ lasɔmi. Masakɛ ko: «Ni a kelen don, a bɛ na ka kibaru duman fɔ.» O cɛ bolitɔ tun bɛ surunya yen na.
[26] O kɔ, kɔlɔsilikɛla ye cɛ wɛrɛ bolitɔ ye o kɔ fɛ. A pɛrɛnna k'a fɔ dakɔlɔsibaa ye ko: «Mɔgɔ wɛrɛ bolitɔ filɛ.» Masakɛ ko: «O fana bɛna kibaru duman fɔ.»
[27] Kɔlɔsilikɛla ko: «Ne bɛ miiri ko ɲɛ fɛ mɔgɔ boli cogo bɔlen bɛ Zadɔk denkɛ Akimaz boli cogo fɛ.» Masakɛ ko: «O ye mɔgɔ ɲuman ye, a bɛ na ni kibaru ɲuman ye.»
[28] O tuma la Akimaz pɛrɛnna k'a fɔ masakɛ ye ko: «Hɛrɛ bɛ.» O ye i biri masakɛ kɔrɔ k'a ɲɛ biri duguma k'a fɔ ko: «Matigi i ka Ala ka fo. Mɔgɔ minw tun murutira ne matigi masakɛ ma, a ye i tila ka bɔ olu bolo.»
[29] Nka masakɛ ko: «Kamalen Absalɔm ko bɛ di?» Akimaz ko: «Joab ye masakɛ ka jɔn ni ne bila ka na tuma min na, ne ye jamaba ye ka mankanba mɛn nka ne ma o kun dɔn.»
[30] Masakɛ y'a fɔ a ye ko: «I ka jɔ kɛrɛ fɛ yan.» A ye i jɔ kɛrɛ fɛ ka makɔnɔli kɛ.
[31] O tuma la Kusi sera. O pɛrɛnna k'a fɔ ko: «Kibaru duman bɛ ne fɛ k'a fɔ ne matigi masakɛ ye. Matigi ye i mɔnɛbɔ i juguw la bi.»
[32] Masakɛ y'a fɔ Kusi ye ko: «Kamalen Absalɔm bɛ hɛrɛ la wa?» Kusi ko: «Ne matigi masakɛ, i juguw ani minw bɛ wuli i kama, olu bɛɛ ka kɛ i ko o kamalen.»
[33] O tuma la masakɛ yɛrɛyɛrɛla ka yɛlɛn ka taa a ka so kɔnɔ dugu donda san fɛ ka kasi. A taatɔ tun b'a fɔ ko: «Ne denkɛ Absalɔm, ne denkɛ, ne denkɛ Absalɔm! Ne tun ka kan ka sa i nɔ na, ne denkɛ Absalɔm, ne denkɛ.»