[1] Ayiwa Israɛl bɔnsɔn bɛɛ taara Dawuda sɛgɛrɛ Heborɔn k'a fɔ a ye ko: «A filɛ, an ye i kolo dɔ ni i farisogo dɔ ye.
[2] Waati tɛmɛnnen na, ka Saul to masaya la an kun na, e de tun bɛ Israɛl bɔnsɔn ɲɛ minɛ kɛlɛ la. Matigi tun y'a fɔ i ye ko: ‹I na ne ka mɔgɔw Israɛl ɲɛ minɛ ka kɛ u kuntigi ye.›»
[3] O tuma la Israɛl bɔnsɔn cɛkɔrɔbaw bɛɛ taara masakɛ sɛgɛrɛ Heborɔn. Masakɛ Dawuda ye layidu ta u ye Matigi ɲɛ kɔrɔ yen. U y'a mun k'a kɛ Israɛl bɔnsɔn ka masakɛ ye.
[4] Dawuda si tun ye san bisaba ye a ka masaya daminɛ tuma la.
[5] A ye san binaani kɛ masaya la. A ye san wolonwula ni kalo wɔɔrɔ kɛ masaya la Juda bɔnsɔn kun na Heborɔn, ka san bisaba ni saba kɛ masaya la Israɛl bɔnsɔn bɛɛ ni Juda bɔnsɔn bɛɛ kun na Jerusalɛm.
[6] Masakɛ ni a ka kɛlɛkɛ cɛw taara Jebuskaw kama Jerusalɛm, olu minw sigilen tun bɛ o jamana la. Olu y'a fɔ Dawuda ye ko: «I tɛ don yan, fiyentɔw ni sen kelenw dama na aw lasegin.» U tun bɛ miiri ko Dawuda tɛ se ka don yen.
[7] Nka Dawuda taara Sion kɛlɛ kunbɛn so minɛ. O ye Dawuda ka dugu ye.
[8] Dawuda y'a fɔ o don na ko: «Ni mɔgɔ min b'a fɛ ka se sɔrɔ Jebuskaw kan o ka taa fo ka se ji woyo yɔrɔ ma ka Dawuda juguw gosi, olu ye sen kelenw ni fiyentɔw ye.» O de kosɔn a fɔra ko: «Fiyentɔ wala sen kelen tɛna don Matigi ka so kɔnɔ.»
[9] Dawuda ye o kɛlɛ kunbɛn so kɛ a yɛrɛ ka so ye ka o tɔgɔ da ko: «Dawuda ka dugu.» Dawuda ye sow jɔ a laminiw bɛɛ la, k'a daminɛ Milo ka taa dugu kɔnɔ la fan fɛ.
[10] Dawuda barika tun bɛ bonya ka taa a fɛ. Kɛlɛbolow Matigi Ala tun b'a fɛ.
[11] Tir masakɛ Hiram ye cidenw bila ka taa Dawuda sɛgɛrɛ ni sedere jiriw ni mininsiyew ni masɔnw ye, olu ka taa Dawuda ka so jɔ.
[12] O tuma la Dawuda y'a dɔn ko Matigi y'a ka masaya sabati Israɛl bɔnsɔn kosɔn.
[13] Dawuda bɔlen kɔ Heborɔn, a ye Jerusalɛm muso dɔw fara a ka jɔnmusow ni a furumusow kan. Dawuda ye denkɛw ni denmuso wɛrɛw sɔrɔ.
[14] Dawuda denkɛ minw sɔrɔla o musow fɛ Jerusalɛm, olu tɔgɔw filɛ ninw ye: Samua ni Sobab ni Natan ni Solomani
[15] ni Jibar ni Elisua ni Nefɛg ni Jafia
[16] ni Elisama ni Eliada ani Elifelɛt.
[17] Filisitikaw y'a dɔn ko Dawuda munna ka kɛ Israɛl bɔnsɔn ka masakɛ ye minkɛ, u taara a kama k'a kɛlɛ. Dawuda y'o mɛn minkɛ, a taara a ka kɛlɛ kunbɛn so kɔnɔ.
[18] Filisitikaw tun taara u fɛnsɛ Refaim jɛkɛnɛ la.
[19] O tuma la Dawuda ye Matigi ɲininka ko: «Ne ka taa Filisitikaw kunbɛn wa? I na u don ne bolo wa?» Matigi ye Dawuda jaabi ko: «I ka taa, k'a masɔrɔ ne na Filisitikaw don i bolo, siga t'a la.»
[20] O tuma la Dawuda taara fo Bal-Perazim ka u gosi yen k'a fɔ ko: «Matigi ye ne juguw jɛnsɛn ne ɲɛ i ko ba woyo karilen.» O de kosɔn a ye o yɔrɔ tɔgɔ da ko Bal-Perazim.
[21] Filisitikaw ye u ka boliw fili, Dawuda ni a fɛ cɛw ye olu ta ka taa ni u ye.
[22] Filisitikaw seginna ka taa u fɛnsɛ Refaim jɛkɛnɛ la ko kura.
[23] Dawuda ye Matigi ɲininka, o y'a jaabi ko: «I tɛ se ka taa. I ka i munumunu ka taa u kɔ fɛ, i na u gosi mur jiriw kɛrɛ fɛ.
[24] Ni i ye senkan mɛn o jirisunw na tuma min na, o tuma la i ka i tɛliya ka taa, sabu Matigi bɛ i ɲɛ fɛ ka bi Filisitikaw ka daga kan.»
[25] Matigi ye min fɔ Dawuda ye, a ye o kɛ. A ye Filisitikaw gosi ka bɔ Geba fo ka taa se Gezɛr donda la.