[1] O kow kɔ, Amɔn bɔnsɔn ka masakɛ Nakas sara. A denkɛ Hanun kɛra masakɛ ye a nɔ na.
[2] Dawuda ko: «Ne na ko ɲuman kɛ Nakas denkɛ Hanun ye, i ko a fa ye ko ɲuman kɛ ne ye cogo min na.» Dawuda ye a ka baaradenw ci ka taa ka Hanun fa sanga fo. Dawuda ka baaradenw sera Amɔn bɔnsɔn ka jamana la,
[3] nka Amɔn bɔnsɔn kuntigiw y'a fɔ u kuntigi Hanun ye ko: «I bɛ miiri ko Dawuda ye a ka baaradenw bila ka na foli kɛ i fa saya ko la wa? Yala i m'a dɔn ko u bɛ na ka dugu kɔnɔna kɔlɔsi k'a ko lajɛ walisa u ka a halaki wa? O tɛ Dawuda ka baaradenw ci kun ye wa?»
[4] O tuma la Hanun ye Dawuda ka baaradenw minɛ ka u bonbonsi tilancɛ di ka u ka dulɔkiw tilancɛ tigɛ fo u woro la, o kɔ, ka u bila ka taa.
[5] Mɔgɔ dɔw y'o fɔ Dawuda ye. Dawuda ye mɔgɔ dɔw ci ka taa u kunbɛn k'a masɔrɔ o mɔgɔw tun maloyara. Masakɛ y'a fɔ u ye ko: «A' ye to Jeriko fo aw bonbonsi ka bɔ, o kɔ, aw na segin so.»
[6] Amɔn bɔnsɔn y'a ye ko u ye Dawuda dusu dimin minkɛ, u ye Sirikaw ka kɛlɛkɛ cɛw sara ka olu bɛɛ lajɛ ka bɔ Bɛt-Rehɔb ni Zoba, u bɛɛ lajɛlen tun ye kɛlɛkɛ cɛ waa mugan ye. Minw bɔra Maka masakɛ ka yɔrɔ la, olu tun ye cɛ waa kelen ye. Cɛ waa tan ni fila bɔra Tob jamana la.
[7] Dawuda ye o mɛn minkɛ, a ye Joab ni a ka kɛlɛkɛ cɛw bɛɛ ci ka taa olu kama.
[8] Amɔn bɔnsɔn ka kɛlɛkɛ cɛw bɔra ka u labɛn kɛlɛ kama dugu donda la. O y'a sɔrɔ Sirika minw bɔra Zoba ni Rehɔb ani minw bɔra Tob ni Maka, olu lajɛlen tun bɛ u dan na kungo kɔnɔ.
[9] Kɛlɛbolo kuntigi Joab y'a ye ko u juguw dɔw bɛ u ɲɛ fɛ, dɔw bɛ u kɔ fɛ minkɛ, a ye kɛlɛkɛ cɛ ja gɛlɛnw ɲɛnatɔmɔ ka bɔ Israɛl bɔnsɔn na ka olu labɛn Sirikaw kama ka u kɛlɛ.
[10] O kɔ, a ye a balimakɛ Abisai bila kulu tɔw ɲɛ. Olu ka taa Amɔn bɔnsɔn kama.
[11] A y'a fɔ o ye ko: «Ni Sirikaw barika bonyara ni ne ta ye, i ka na ne dɛmɛ, nka ni Amɔn bɔnsɔn barika bonyara ni e ta ye, ne na taa i dɛmɛ.
[12] I ja gɛlɛya, an ka kɛlɛ kɛ ni ja gɛlɛya ye walisa ka an ka mɔgɔw ani an ka Ala ka duguw kisi. Min ka di Matigi ye, a ka o kɛ aw ye.»
[13] O kɔ, Joab ni a fɛ cɛw taara bi Sirikaw kan. Olu bolila Joab ɲɛ.
[14] Ayiwa Amɔn bɔnsɔn y'a ye ko Sirikaw bɛ boli minkɛ, olu fana bolila Abisai ɲɛ ka don u ka dugu kɔnɔ. Joab fana nana ka bɔ Amɔn bɔnsɔn ka kɛlɛ yɔrɔ la ka taa Jerusalɛm.
[15] Sirikaw y'a ye ko Israɛl bɔnsɔn ye se sɔrɔ u kan minkɛ, u bɛɛ ye ɲɔgɔn lajɛ yɔrɔ kelen na.
[16] Sirika minw sigilen tun bɛ ba kɔ fɛ, masakɛ Hadadezɛr ye ci bila ka taa olu nɔ fɛ. U sera Helam, Hadadezɛr ka kɛlɛbolo kuntigi Sobak tun bɛ u kun na.
[17] Dawuda y'o kibaru mɛn minkɛ, a ye Israɛl bɔnsɔn jama bɛɛ lajɛ ka tɛmɛn Jurdɛn ba fɛ ka taa Helam kama. Sirikaw ye u labɛn ka Dawuda kɛlɛ. U ye kɛlɛ daminɛ,
[18] nka u bolila Israɛl bɔnsɔn ɲɛ. Dawuda ye Sirikaw ka kɛlɛkɛ wotorotigi kɛmɛ wolonwula ani sotigi cɛ waa binaani faga. A ye Sirikaw ka kɛlɛbolow kuntigi Sobak fana gosi, a sara yen.
[19] Masakɛ minw tun bɛ masakɛ Hadadezɛr kɔrɔ, olu y'a ye ko Israɛl bɔnsɔn ye se sɔrɔ u kan minkɛ, u taara hɛrɛ ɲini Israɛl bɔnsɔn fɛ ka baara kɛ u ye. Sirikaw ma Amɔn bɔnsɔn dɛmɛ tun.