[1] Ayiwa dɔgɔmuso tun bɛ Dawuda denkɛ Absalɔm fɛ, o tɔgɔ ko Tamar. O cɛ tun ka ɲi kosɛbɛ. A ko tun ka di Dawuda denkɛ Amnɔn ye.
[2] Amnɔn jarabira a dɔgɔmuso Tamar la fo k'a bana, k'a masɔrɔ npogotigi tun don, a tun ka gɛlɛn Amnɔn ma ka ɲɛ a kɔ.
[3] O y'a sɔrɔ terikɛ dɔ tun bɛ Amnɔn fɛ, o tɔgɔ ko Jonadab, Dawuda kɔrɔkɛ Simea denkɛ don. O Jonadab tun ka kegun kosɛbɛ.
[4] O y'a fɔ Amnɔn ye ko: «Masakɛ denkɛ, mun y'a to i bɛ fasa don o don ka ta'a fɛ? I tɛ o kun fɔ ne ye wa?» Amnɔn y'a jaabi ko: «Ne balimakɛ Absalɔm dɔgɔmuso ko bɛ ne la.»
[5] Jonadab y'a fɔ a ye ko: «I da i ka dalan kan ka i yɛrɛ kɛ banabaatɔ ye. Ni i fa nana i lajɛ, i k'a fɔ a ye ko: ‹Ne b'i deli, ne dɔgɔmuso Tamar ka na dumuni di ne ma. A ka na o labɛn ne ɲɛ kɔrɔ, ne na o dumuni dilatɔ ye a fɛ ka o minɛ a bolo k'a dun.›»
[6] O tuma la Amnɔn y'i da ka a yɛrɛ kɛ banabaatɔ ye. Masakɛ taara a lajɛ. Amnɔn y'a fɔ masakɛ ye ko: «Ne b'i deli, ne dɔgɔmuso Tamar ka na ne ɲɛ kɔrɔ yan ka takula fila labɛn ne ɲɛ kɔrɔ, ne ka u minɛ a bolo ka u dun.»
[7] Dawuda ye ci bila ka ta'a fɔ Tamar ye a ka yɔrɔ la ko: «I ka taa i kɔrɔkɛ Amnɔn ka so ka dumuni dɔ labɛn a ye.»
[8] Tamar taara a kɔrɔkɛ Amnɔn ka so ka o dalen sɔrɔ. A ye mugu ta k'a nɔɔni k'a dogi k'a kɛ takula ye ka a jiran Amnɔn ɲɛ kɔrɔ.
[9] O kɔ, a ye minan ta ka o yɛlɛma Amnɔn kɔrɔ, nka Amnɔn ma sɔn ka dumuni kɛ. A y'a fɔ ko: «A' ye mɔgɔ bɛɛ labɔ yan.» Mɔgɔw bɛɛ bɔra.
[10] O tuma la Amnɔn y'a fɔ Tamar ye ko: «I ye dumuni min labɛn, i ka na n'o ye ne fɛ so kɔnɔ walisa ne ka o minɛ i bolo k'a dun.» Tamar ye o takula dilalen ta ka taa n'o ye a balimakɛ Amnɔn ɲɛ kɔrɔ so kɔnɔ.
[11] Tamar ye o di a ma walisa a ka a dun, nka a ye Tamar minɛ k'a fɔ a ye ko: «Na da ne fɛ, ne dɔgɔmuso.»
[12] Tamar y'a jaabi ko: «Ayi, ne kɔrɔkɛ, i kana bi ne kan. O ɲɔgɔn tɛ kɛ Israɛl bɔnsɔn cɛma. I kana o ko juguba kɛ.
[13] Ne ni ne ka maloya na taa min? E fana na kɛ mɔgɔ tɔgɔ tiɲɛnnen ye Israɛl bɔnsɔn cɛma. Ne b'i deli, i ka kuma masakɛ fɛ fɔlɔ, a tɛna ban ka ne di i ma furu la.»
[14] O bɛɛ n'a ta Amnɔn ma sɔn ka o lamɛn. A barika bonyara ni Tamar ta ye, a y'a karaba ka da a fɛ.
[15] O kɛlen kɔ, Amnɔn ɲiginna Tamar la kosɛbɛ. O ɲigin tɛmɛnna fɔlɔ kanuya kan. A y'a fɔ Tamar ye ko: «Wuli ka taa.»
[16] Tamar y'a jaabi ko: «I kana ne gɛn k'a masɔrɔ o na juguya ka tɛmɛn i ka kɛlen kan ne la.» Nka Amnɔn ma sɔn ka a ka kuma lamɛn.
[17] O kɔ, a y'a ka baaraden kamalen wele k'a fɔ o ye ko: «I ka nin muso gɛn ka bɔ ne kɔrɔ, a bɔlen kɔ, i ka da tugu.»
[18] O y'a sɔrɔ dulɔki jan tun bɛ Tamar kan na k'a masɔrɔ masakɛ denmusow tun bɛ o dulɔki sifa don ka u npogotigilama to. O tuma la Amnɔn ka baaraden y'a labɔ ka da tugu.
[19] O kɛlen, Tamar ye bugurijɛ kɛ a kun na ka a ka dulɔki jan fara. O kɔ, ka i bolo da a kun na, a taatɔ tun bɛ kasi.
[20] Tamar kɔrɔkɛ Absalɔm y'a ɲininka ko: «I kɔrɔkɛ Amnɔn dara i fɛ wa? Ayiwa ne dɔgɔmuso, i makun, o ko kana i dusu kasi, i kɔrɔkɛ don. I kana o kɛ koba ye.» Tamar sigira a dan na a kɔrɔkɛ Absalɔm ka so.
[21] Masakɛ Dawuda ye o ko kɛlen mɛn minkɛ, a diminna kosɛbɛ.
[22] Absalɔm ma kuma jugu wala kuma ɲuman fɔ Amnɔn ye. A ye Amnɔn koniya sabu o y'a dɔgɔmuso Tamar tiɲɛn.
[23] San fila tɛmɛnnen kɔ, Absalɔm tun bɛ a ka sagaw si kan Bal-Hazɔr Efrayim dugu kɛrɛ fɛ. A ye masakɛ denkɛw bɛɛ wele.
[24] Absalɔm taara masakɛ sɛgɛrɛ k'a fɔ a ye ko: «Saga si kannaw bɛ i ka baaraden ka yɔrɔ la. Ne b'i deli ko i ka na ni i ka sɔrɔdasiw jalatigiw ye i ka baaraden ka so.»
[25] Nka masakɛ y'a jaabi ko: «Ayi, ne denkɛ, an bɛɛ tɛna taa i ka so, sabu an na kɛ i doni ye.» Absalɔm tora a kan k'a deli, nka Dawuda ma sɔn ka taa, nka a ye dubaw kɛ a ye.
[26] O tuma Absalɔm ko: «Ni i t'a fɛ ka taa, a to ne balimakɛ Amnɔn ka taa an fɛ.» Masakɛ y'a jaabi ko: «Mun kosɔn o ka taa i fɛ?»
[27] Nka Absalɔm tora a kan k'a deli fo a ye Amnɔn ni masakɛ denkɛw bɛɛ bila ka taa.
[28] O y'a sɔrɔ Absalɔm tun y'a fɔ a ka baaradenw ye ko: «Aw k'a kɔlɔsi, ni aw ye Amnɔn falen ye dɔlɔ la, ni ne y'a fɔ aw ye ko aw k'a gosi, o tuma la aw k'a faga. Aw kana siran.»
[29] Absalɔm ka baaradenw ye Amnɔn kɛ i ko a fɔra u ye cogo min na k'a faga. O tuma la masakɛ denkɛ tɔw bɛɛ wulila ka yɛlɛn u ka falibaw kan ka boli.
[30] Ka u to sira kan ka taa, a fɔra Dawuda ye ko Absalɔm ye masakɛ denkɛw bɛɛ faga, ko u si ma dan kɛ.
[31] O tuma la masakɛ wulila ka a ka finiw fara ka i da duguma. A ka baaradenw nana a lamini, olu fana ye u ka finiw fara.
[32] Nka Dawuda kɔrɔkɛ Simea denkɛ Jonadab y'a fɔ ko: «Ne matigi kana miiri a la ko masakɛ denkɛ kamalenw bɛɛ fagara, k'a masɔrɔ Amnɔn kelenpe de fagara. Absalɔm tun y'o latigɛ kabini Amnɔn ye a dɔgɔmuso Tamar tiɲɛn don min na.
[33] Ayiwa sisan, ne matigi masakɛ, i kana miiri ko masakɛ denkɛw bɛɛ fagara, Amnɔn kelenpe de fagara.»
[34] Absalɔm bolila. Dawuda ka baaraden kamalen min tun y'a kɔlɔsibaa ye, o y'a ɲɛw kɔrɔta ka filɛli kɛ, mɔgɔ caman tun bɛ na a kɔ fɛ sira fɛ ka bɔ kulu kan.
[35] Jonadab y'a fɔ masakɛ ye ko: «Ne ɲɛ bɛ masakɛ denkɛw natɔ la. O ko kɛra i ko i ka baaraden y'a fɔ i ye cogo min na.»
[36] A tilalen kɔ o kuma la, masakɛ denkɛw sera, u tun bɛ kasi ka kulo. Masakɛ ni a ka baaradenw fana kasira kosɛbɛ.
[37] Absalɔm bolila ka taa Gesur masakɛ Amihur denkɛ Talmai ka so. Dawuda tun bɛ a denkɛ su kasi don o don.
[38] Absalɔm ye san saba kɛ a dogo yɔrɔ la Gesur.
[39] O kɔ, masakɛ Dawuda dusu sumana a denkɛ Amnɔn saya ko la. A ye Absalɔm nɔ fɛ taali dabila.