[1] O kɔ, Dawuda ye Filisitikaw kɛlɛ ka se sɔrɔ u kan ka o yɔrɔw mara.
[2] A ye se sɔrɔ Moab bɔnsɔn fana kan. A ye u karaba ka u da duguma ka jurukisɛ ɲɛ fila suma, ko olu ka faga, ka jurukisɛ ɲɛ kelen suma, ko olu ɲɛnama ka to. Moab bɔnsɔn kɛra Dawuda ka jɔnw ye ka nisɔngɔ sara.
[3] Dawuda ye se sɔrɔ Zoba masakɛ Hadadezɛr kan. O tun ye Rehɔb denkɛ ye. O tun bɛ sira kan ka taa i sigi a ka jamana la Ufrate ba da la.
[4] Dawuda ye a ka sotigi waa kelen ni kɛmɛ wolonwula ni sennama waa mugan minɛ ka u ka wotoro sama sow bɛɛ kɔ senw fasabaw tigɛ, ka wotoro kɛmɛ la sow to yen.
[5] Siri Damasikaw taara Zoba masakɛ Hadadezɛr dɛmɛ. Dawuda ye olu la cɛ waa mugan ni fila faga.
[6] O kɔ, Dawuda ye kuntigiw sigi Siri jamana mara yɔrɔw kun na. Sirikaw kɛra Dawuda ka jɔnw ye, u tun bɛ nisɔngɔ sara a ye. Matigi ye se di Dawuda ma o yɔrɔw bɛɛ kan.
[7] Dawuda ye masakɛ Hadadezɛr ka jɔnw ka sanu nɛgɛ bɛnnanw ta ka na ni u ye Jerusalɛm.
[8] Masakɛ Dawuda ye nsiranɛgɛ caman sɔrɔ ka bɔ Hadadezɛr ka dugu Betak ni Berotayi kɔnɔ.
[9] Hamat masakɛ Toyi y'a mɛn ko Dawuda ye se sɔrɔ Hadadezɛr ka kɛlɛbolow bɛɛ kan tuma min na,
[10] o y'a denkɛ Joram ci ka taa masakɛ Dawuda sɛgɛrɛ ka foli di a ma masakɛ ka yɔrɔw tiɲɛnni kosɔn, k'a masɔrɔ Hadadezɛr tun bɛ Toyi kɛlɛ tuma bɛɛ. Joram taara ni warijɛ minanw ni sanu minanw ni nsiranɛgɛ minanw ye a bolo.
[11] Masakɛ Dawuda ye olu fana di Matigi ma i ko a ye o siyaw ka warijɛ ni sanu minɛlen di Ala ma cogo min na.
[12] O siyaw tun ye Sirikaw ni Moab bɔnsɔn ni Amɔn bɔnsɔn ni Filisitikaw ni Amalɛk bɔnsɔn ye. A ye fɛn minw cɛ ka bɔ Zoba masakɛ Hadadezɛr ka yɔrɔ la, a ye olu fana di Ala ma.
[13] Dawuda ye se sɔrɔ Sirikaw kan tuma min na, a kɔsegintɔ ye Edɔmkaw ka cɛ waa tan ni segin gosi jɛkɛnɛ kɔgɔma la.
[14] Dawuda ye Edɔmkaw bɛɛ mara ka kuntigiw sigi u kun na. Ayiwa Matigi ye se di Dawuda ma a taa yɔrɔw bɛɛ la.
[15] Dawuda ye Israɛl bɔnsɔn bɛɛ mara ka kuntigiya kɛ a ka mɔgɔw kun na ni tilennenya ye, a ma mɔgɔ bɔ mɔgɔ la.
[16] Zeruja denkɛ Joab kɛra kɛlɛbolo kuntigi ye. Akilud denkɛ Josafat kɛra tilew kibaru sɛbɛnnikɛla ye.
[17] Akitub denkɛ Zadɔk ni Abiatar denkɛ Akimelɛk kɛra sarakalasebaaw ye. Seraja kɛra sɛbɛnnikɛla ye.
[18] Jehojada denkɛ Benaja kɛra Kereti mɔgɔw ni Peleti mɔgɔw kuntigi ye. Dawuda denkɛw kɛra kuntigiw ye.