[1] Dawuda ye Israɛl bɔnsɔn na kɛlɛkɛcɛ jagɛlɛnw bɛɛ lajɛ ko kura, olu kɛra cɛ waa bisaba ye.
[2] A wulila ni o mɔgɔw ye ka taa Baala, Juda ka dugu la walisa u ka kɔsegin ni Ala ka wagande ye. Kɛlɛbolow Matigi min sigilen bɛ serubɛn fila furancɛ la wagande san fɛ, wagande bɛ wele o tɔgɔ la.
[3] U ye Ala ka wagande sigi wotoro kura dɔ kɔnɔ, u bɔra n'a ye Abinadab ka so kulu kan ka taa n'a ye. Abinadab denkɛ Uza ni Akijo tun bɛ o wotoro kura boli.
[4] U y'a ta ka bɔ Abinadab ka so kɔnɔ kulu kan ka taa. Uza tun bɛ taama Ala ka wagande kɛrɛ fɛ, Akijo tun bɛ a ɲɛ fɛ.
[5] Dawuda ni Israɛl ka so bɛɛ ɲagalila Matigi ɲɛ kɔrɔ ka sipere jiri fɔlifɛn sifaw bɛɛ ni nkɔniw ni npɔlɔnw ni ntamaw ni nsiranɛgɛ tɛgɛrɛw fɔ.
[6] U sera Nakɔn ka gendekɛnɛ la tuma min na, Uza y'a bolo kɛ ka Ala ka wagande minɛ sabu misiw sen talonna.
[7] Ala diminna Uza kɔrɔ. Ala y'a gosi a ka filili kosɔn. A sara Ala ka wagande kɔrɔ yen.
[8] Matigi ye Uza faga, o kosɔn Dawuda diminna. O yɔrɔ bɛ wele ko Perɛz-Uza halibi.
[9] Dawuda siranna Matigi ɲɛ o don na k'a fɔ ko: «Matigi ka wagande na don ne ka so cogo di?»
[10] Dawuda tun t'a fɛ Matigi ka wagande ka don a ka dugu kɔnɔ, nka Dawuda farala ka taa ni a ye Gat, Obɛd-Edɔm ka so.
[11] Matigi ka wagande ye kalo saba kɛ Obɛd-Edɔm ka so Gat. Matigi dubara Obɛd-Edɔm ni a ka so mɔgɔw ye.
[12] A fɔra masakɛ Dawuda ye ko: «Matigi dubara Obɛd-Edɔm ka gwa ni a ka fɛnw bɛɛ ye Ala ka wagande kosɔn.» Ayiwa Dawuda ye sira minɛ ka taa Ala ka wagande ta k'a bɔ Obɛd-Edɔm ka so ka taa n'a ye a yɛrɛ ka dugu kɔnɔ. O kɛra ɲagaliba ye.
[13] Minw tun bɛ Ala ka wagande doni, olu ye senda ko wɔɔrɔ kɛ tuma min na, Dawuda ye ntura kelen ni misiden tɔlɔlen kelen kɛ saraka ye.
[14] Dawuda ye dɔn kɛ ni a barika bɛɛ ye Matigi ɲɛ kɔrɔ. Lenfu fini efɔd tun bɛ a kan na.
[15] Ayiwa Dawuda ni Israɛl bɔnsɔn bɛɛ taara ni Matigi ka wagande ye ni mankanba ni ɲagali ni buru fyɛkan ye.
[16] Nka Matigi ka wagande dontɔ Dawuda ka dugu kɔnɔ, Saul denmuso Mikal ye filɛli kɛ finɛtiri fɛ ka masakɛ Dawuda dɔnkɛtɔ pantɔ ye Matigi ɲɛ kɔrɔ. Mikal ye masakɛ mafiɲɛya a yɛrɛ dusukun na.
[17] U taara ni Matigi ka wagande ye k'a sigi a ka yɔrɔ la Dawuda ka finiso jɔlen kɔnɔ. Dawuda ye saraka jenitaw ni nisɔndiya sarakaw bɔ Matigi ye.
[18] Dawuda tilalen kɔ saraka jenitaw ni nisɔndiya sarakaw fagali la, a ye dubaw kɛ mɔgɔw ye Kɛlɛbolow Matigi tɔgɔ la.
[19] A ye buurukun kelen ni sogo dɔ ani rezɛn mɔnen kun kelen-kelen di Israɛl bɔnsɔn jama bɛɛ kelen-kelen ma, cɛ fara muso kan. O kɔ, mɔgɔw bɛɛ taara u ka yɔrɔw la.
[20] Dawuda fana taara a ka so, ko a bɛ dubaw kɛ a ka gwa mɔgɔw ye, nka Saul denmuso Mikal nana a kunbɛn k'a fɔ a ye ko: «Israɛl bɔnsɔn ka masakɛ bonyara bi kosɛbɛ, sabu a y'a farilankolon to a ka jɔnw ka jɔnmusow ɲɛ kɔrɔ k'a kɛ i ko mɔgɔ kunntan.»
[21] Dawuda ye Mikal jaabi ko: «Ɔwɔ, Matigi min ye ne sigi ka kɛ e fa ni a ka so bɛɛ ani Israɛl bɔnsɔn bɛɛ kuntigi ye, ne bɛ dɔn kɛ o ɲɛ kɔrɔ.
[22] Ne na bɔ da la ka tɛmɛn nin kan, nka hali ni o kɛra, i ye baarakɛ muso minw ko fɔ, olu na ne bonya.»
[23] O de y'a to Saul denmuso Mikal ma den si sɔrɔ fo ka taa se a sa don ma.