[1] Ayiwa masakɛ Dawuda kɔrɔla kosɛbɛ. A ye si jan sɔrɔ fo u tun bɛ birifini biri a la, nka hali o, o ma a ka nɛnɛ ban.
[2] A ka baaradenw y'a fɔ a ye ko: «Masakɛ, a to an ka npogotigi dɔ ɲini i ye, o ka i ka baara kɛ ka a janto i la. O npogotigi na da i kɛrɛ fɛ, o tuma la nɛnɛ na bɔ i la.»
[3] U ye npogotigi ɲini Israɛl jamana yɔrɔ bɛɛ la min cɛ ka ɲi. U ye Sunɛm Abisag sɔrɔ ka taa n'o ye masakɛ yɔrɔ.
[4] O npogotigi cɛ tun ka ɲi kosɛbɛ. O ye masakɛ ka baara kɛ ka i janto a la, nka masakɛ ma a dɔn muso ye.
[5] Ayiwa Hajit denkɛ Adonija y'a yɛrɛ bonya k'a fɔ ko: «Ne de na kɛ masakɛ ye.» A ye wotorow ni sotigiw ani cɛ biduuru bila a ɲɛ fɛ ka yɔrɔw bɛɛ boliboli,
[6] nka a fa tun ma a laadi wala k'a kɔrɔfɔ tuma si k'a fɔ ko: «Mun kosɔn i bɛ nin kɛ?» Adonija cɛ tun ka ɲi kosɛbɛ, ale bangera Absalɔm kɔ.
[7] Zeruja denkɛ Joab ni sarakalasebaa Abiatar jɛra ka Adonija dɛmɛ.
[8] Nka sarakalasebaa Zadɔk ni Jehojada denkɛ Benaja ni kira Natan ni Simei ni Rei ni Dawuda ka cɛ farinmaw tun tɛ Adonija fɛ.
[9] Don dɔ la, Adonija ye sagaw ni nturaw ni misiden tɔlɔlenw kɛ saraka ye Zohelɛt farakurun kɔrɔ Rogɛl kɛrɛ fɛ, ka a balimaw, masakɛ denkɛw bɛɛ wele, ani Juda cɛ minw tun bɛ masakɛ ka baara la, ka olu bɛɛ fana wele,
[10] nka a ma kira Natan ni Benaja ni masakɛ ka faamaw ni a balimakɛ Solomani wele.
[11] O tuma la Natan kumana Solomani ba Batseba fɛ ko: «I m'a mɛn ko Hajit denkɛ Adonija ye a yɛrɛ kɛ masakɛ ye k'a sɔrɔ Dawuda ma o dɔn wa?
[12] Ayiwa i ka ne lamɛn sisan. Ne na i laadi walisa i ka i yɛrɛ ni i denkɛ Solomani ni kisi.
[13] Taa masakɛ Dawudaɲɛ kɔrɔ k'a fɔ a ye ko: ‹Ne matigi, masakɛ, yala e tun ma i kali i ka jɔnmuso ye ko ne denkɛ Solomani na da i kan masaya la ka sigi i ka masasigilan kan wa? Mun y'a to Adonija kɛra masakɛ ye?›
[14] O tuma la, ka i to o kuma la masakɛ fɛ, ne yɛrɛ na don yen ka i ka kuma sɛmɛntiya.»
[15] O tuma la Batseba taara masakɛ sɛgɛrɛ a ka bon kɔnɔ. Masakɛ kɔrɔlen tun don kosɛbɛ. A ka baaraden Abisag min bɔra Sunɛm, o tun bɛ masakɛ magoɲɛ.
[16] Batseba y'i biri masakɛ kɔrɔ k'a bonya. Masakɛ ko: «I bɛ mun fɛ?»
[17] Muso y'a jaabi ko: «Ne matigi, i ye i kali Matigi, i ka Ala la i ka jɔnmuso ye ko, siga t'a la, ko ne denkɛ Solomani na kɛ masakɛ ye i kɔ, ko a na sigi i ka masasigilan kan.
[18] O bɛɛ n'a ta Adonija kɛra masakɛ ye sisan, k'a sɔrɔ ne matigi, masakɛ tɛ foyi dɔn o la.
[19] A ye nturaw ni misiden tɔlɔlenw ni sagaw caman faga ka masakɛ denkɛw ni sarakalasebaa Abiatar ni kɛlɛbolo kuntigi Joab wele, nka a ma i ka baaraden Solomani wele.
[20] O bɛɛ n'a ta, Israɛl bɛɛ bɛ ne matigi, masakɛ filɛ. Min na sigi i nɔ na masaya la i kɔ, Israɛl bɛɛ bɛ i makɔnɔ o la.
[21] Ni o ma kɛ, ni ne matigi, masakɛ kafora a bɛnbaw kan tuma min na, tɔɔrɔba na ne ni ne denkɛ Solomani sɔrɔ.»
[22] Ka muso to kuma la masakɛ fɛ, kira Natan sera yen.
[23] A fɔra masakɛ ye ko: «Kira Natan filɛ.» Natan donna masakɛ ɲɛ kɔrɔ ka i biri k'a ɲɛ biri duguma,
[24] k'a fɔ ko: «Ne matigi, masakɛ, e de ye nin ci fɔ ko Adonija ka sigi masaya la i kɔ ka sigi i ka masasigilan kan wa?
[25] Ayiwa a taara nturaw ni misiden tɔlɔlenw ni sagaw caman kɛ saraka ye bi. A ye masakɛ denkɛw bɛɛ ni kɛlɛbolo kuntigiw ni sarakalasebaa Abiatar wele, olu filɛ dumuni ni minni la ka pɛrɛn a ɲɛ kɔrɔ yen k'a fɔ ko: ‹Masakɛ Adonija ka si sɔrɔ!›
[26] Nka a ma i ka baaraden, ne ni sarakalasebaa Zadɔk ni Jehojada denkɛ Benaja ni i ka baaraden Solomani si wele.
[27] O ye ne matigi, masakɛ nɔ ye wa? K'a sɔrɔ min ka kan ka sigi matigi, masakɛ ka masasigilan kan a kɔ, i ma o jira i ka jɔnw la.»
[28] Masakɛ Dawuda y'a jaabi ko: «I ka Batseba wele ne ye.» O donna ka i jɔ masakɛ ɲɛ kɔrɔ.
[29] O tuma la Dawuda y'i kali ko: «A bɛ ne ni ne Matigi Ala ɲɛnama cɛ, o min ye ne tila ne degun kow bɛɛ la.
[30] Ne ye layidu min ta i ye, Matigi, Israɛl ka Ala tɔgɔ la, ko siga t'a la, i denkɛ Solomani na sigi masaya la ne kɔ, ko a na sigi ne ka masasigilan kan ne nɔ na. Ne na o dafa bi.»
[31] Batseba y'i biri k'a ɲɛ biri duguma masakɛ ɲɛ kɔrɔ k'a fɔ ko: «Ne matigi, masakɛ Dawuda, i ka si sɔrɔ badaa.»
[32] O kɔ, masakɛ Dawuda ko: «A' ye sarakalasebaa Zadɔk ni kira Natan ani Jehojada denkɛ Benaja wele ka na ne fɛ yan.» Olu nana u jɔ masakɛ ɲɛ kɔrɔ.
[33] Masakɛ y'a fɔ u ye ko: «A' ye taa ni aw matigi ka baaradenw ye aw fɛ ka ne denkɛ Solomani yɛlɛn ne ka faliba kan ka taa Gihɔn ji boyi da la.
[34] Sarakalasebaa Zadɔk ni kira Natan ka Israɛl bɔnsɔn ka masakɛ mun yen, o kɔ, aw na buru fyɛ k'a fɔ ko: ‹Masakɛ Solomani ka si sɔrɔ!›
[35] O kɔ, aw ka tugu a nɔ fɛ ka na a sigi ne ka masasigilan kan ka kɛ masakɛ ye ne nɔ na. Ne ye ale de sigi ka kɛ Israɛl bɔnsɔn ni Juda bɔnsɔn ka masakɛ ye.»
[36] Jehojada denkɛ Benaja ye masakɛ jaabi ko: «Amiina, Matigi, i ka Ala ka o sɛmɛntiya.
[37] Matigi tora ne matigi, masakɛ fɛ cogo min na, a ka to Solomani fɛ o cogo la ka a ka masaya kɔrɔta ka tɛmɛn ne matigi, masakɛ Dawuda ta kan.»
[38] O kɔ, sarakalasebaa Zadɔk ni kira Natan ni Jehojada denkɛ Benaja ni Kereti mɔgɔw ni Peleti mɔgɔw taaraɲɔgɔn fɛ. U ye Solomani layɛlɛn masakɛ Dawuda ka faliba kan ka taa n'a ye Gihɔn ji boyi da la.
[39] Sarakalasebaa Zadɔk ye biɲɛkolo tuluma ta ka bɔ finiso kɔnɔ ka Solomani mun. U ye buru fyɛ, jama bɛɛ pɛrɛnna ko: «Masakɛ Solomani ka si sɔrɔ!»
[40] Mɔgɔw bɛɛ tugura a nɔ fɛ, u tun bɛ file fyɛ. Mɔgɔw sewara kosɛbɛ. U pɛrɛnkan ye dugukolo yɛrɛyɛrɛ.
[41] Adonija ni a nɔ fɛ mɔgɔw tila tuma la dumuni la, u ye o mankan mɛn. A ye buru fyɛkan mɛn minkɛ, Joab pɛrɛnna ko: «Mun na nin mankan ni nin sewakanba bɛ bɔ dugu kɔnɔ?»
[42] K'a to kuma la sarakalasebaa Abiatar denkɛ Jonatan nana. Adonija y'a fɔ a ye ko: «I ka don, k'a masɔrɔ i ye mɔgɔ sɛbɛ ye. I nana ni kibaruɲuman ye.»
[43] Nka Jonatan ye Adonija jaabi ko: «Ayi, katuguni an matigi, masakɛ Dawuda ye Solomani kɛ masakɛ ye.
[44] Masakɛ Dawuda y'a fɔ ko sarakalasebaa Zadɔk ani kira Natan ni Jehojada denkɛ Benaja ni Kereti mɔgɔw ni Peleti mɔgɔw ka a layɛlɛn masakɛ ka faliba kan ka taa n'a ye.
[45] O kɔ, sarakalasebaa Zadɔk ni kira Natan y'a mun Gihɔn ka taa n'a ye niɲagali ye. Dugu bɛɛ nisɔndiyara o la. Aw tulo bɛ mankan min na, o kun filɛ o ye.
[46] Ka fara o bɛɛ kan, Solomani sigira masasigilan kan.
[47] Masakɛ ka baaradenw nana dubaw kɛ an matigi, masakɛ ye, u ko: ‹Dawuda ka Ala ka Solomani kɔrɔta ka tɛmɛn Dawuda yɛrɛ kan ka a ka masaya bonya ka tɛmɛn a ta kan.› O kɔ, Dawuda y'i biri a ka dalan kan.
[48] A ye min fɔ, o filɛ nin ye, ko: ‹Matigi, Israɛl ka Ala ka tanu, o min ye mɔgɔ dɔ sigi ne ka masasigilan kan bi, ne ye o ye ne yɛrɛɲɛ la.›»
[49] O tuma la Adonija fɛ mɔgɔw bɛɛ ja tigɛlen wulila, u bɛɛ kelen-kelen taara u ɲɛ kuntilenna fɛ.
[50] Adonija fana siranna Solomaniɲɛ. A bolila ka taa finiso kɔnɔ ka saraka bɔlan biɲɛkolo minɛ a bolo.
[51] A fɔra Solomani ye ko Adonija sirannen filɛ masakɛ Solomaniɲɛ. A ye saraka bɔlan biɲɛkolo minɛ a bolo k'a fɔ ko: «Masakɛ Solomani k'a kali ne ye ko a tɛna a ka baaraden faga.»
[52] Solomani ko: «Ni a kɛra mɔgɔɲuman ye, hali a kunsigiden kelen tɛna bi duguma, nka ni a ye jalakima ko kɛ, a na faga.»
[53] Ayiwa masakɛ Solomani ye mɔgɔ dɔ ci ka taa a minɛ ka bɔ saraka bɔlan na. A taara i biri masakɛ Solomani kɔrɔ. O y'a fɔ a ye ko: «Segin ka taa i ka so.»