[1] A fɔra Joab ye ko: «Masakɛ Dawuda bɛ kasi Absalɔm saya kosɔn.»
[2] O de y'a to o se sɔrɔli yɛlɛmana ka kɛ ɲɛnasisi ye Israɛl bɔnsɔn fɛ o don na, k'a masɔrɔ mɔgɔw bɛɛ y'a mɛn ko masakɛ ɲɛnasisilen don a denkɛ saya kosɔn.
[3] Mɔgɔw bɛɛ donna dugu kɔnɔ dogo la o don na i ko mɔgɔ malolen minw bolila ka bɔ kɛlɛ yɔrɔ la.
[4] Masakɛ ye fini siri a ɲɛda la ka kasi ka kulo ko: «Ne denkɛ Absalɔm! Absalɔm ne denkɛ, ne denkɛ.»
[5] O tuma la Joab donna masakɛ ka so k'a fɔ a ye ko: «I ka baaraden minw ye i ni i denw ni i musow ani i ka jɔnmusow kisi, i ye olu lamalo bi.
[6] I bɛ i juguw kanu ka i kanubaaw koniya, k'a masɔrɔ i y'a jira k'a jɛya bi ko i ka kɛlɛ kuntigiw ni i ka baaradenw tɛ foyi ye i ɲɛ na. Ne ɲɛ b'a la sisan ko ni Absalɔm ɲɛnama tun tora k'an tɔw bɛɛ faga bi, o tun na diya i ye.
[7] I ka wuli sisan ka taa i ka baaradenw dusu saalo. K'a masɔrɔ ne bɛ ne kali Matigi tɔgɔ la ko ni i ma bɔ ka taa, hali mɔgɔ kelen tɛna to i fɛ yan bi su in na. O na juguya i ma ka tɛmɛn i tɔɔrɔ kow bɛɛ kan kabini i denmisɛnma fo ka na se bi ma.»
[8] O tuma la masakɛ wulila ka taa i sigi dugu donda la. A fɔra mɔgɔw bɛɛ ye ko: «Masakɛ sigilen filɛ da la.» Mɔgɔw bɛɛ tɛmɛnna masakɛ ɲɛ kɔrɔ. O tuma la Absalɔm fɛ mɔgɔw bolila ka taa u ka yɔrɔw la.
[9] Israɛl bɔnsɔn siyaw bɛɛ y'a daminɛ k'a fɔ ko: «Masakɛ ye an tila ka bɔ an juguw bolo. Ale de ye an tila ka bɔ Filisitikaw bolo, a tun bolila Absalɔm ɲɛ ka taa jamana kɔnɔ.
[10] Nka an ye Absalɔm min sigi k'a kɛ an ka masakɛ ye, o tora kɛlɛ la. Ayiwa sisan, mun kosɔn an tɛ kuma ka masakɛ kɔsegin a sigi yɔrɔ la?»
[11] Israɛl bɔnsɔn ka kumaw bɛɛ sera masakɛ ma fo a ka so. Dawuda ye ci bila ka ta'a fɔ sarakalasebaaw Zadɔk ni Abiatar ye ko: «Aw ka taa kuma Juda cɛkɔrɔbaw fɛ ko: ‹Mun y'a to mɔgɔ wɛrɛw bɛɛ kɔnna aw ɲɛ masakɛ kɔseginni ko la a ka yɔrɔ la?
[12] Aw de ye ne balimaw ye, aw ye ne kolo ni ne sogo dɔ ye. Mun y'a to mɔgɔ wɛrɛw kɔnna aw ɲɛ masakɛ kɔseginni ko la?›
[13] Aw k'a fɔ Amasa fana ye ko: ‹Yala e tɛ ne kolo ni ne sogo dɔ ye wa? Ni ne ma i kɛ ne ka kɛlɛ kuntigi ye Joab nɔ na, Ala ka ne gosi ka ne faga.›»
[14] Ayiwa Dawuda ye Juda bɔnsɔn bɛɛ dusukun sɔrɔ i ko cɛ kelen. U ye ci bila ka taa fɔ masakɛ ye ko: «I ni i ka jɔnw bɛɛ ka segin ka na.»
[15] O tuma la masakɛ seginna ka taa Jurdɛn ba da la. Juda cɛw taara masakɛ kunbɛn Gilgal ka a tigɛ Jurdɛn ba la.
[16] Benjamɛn bɔnsɔn Gera denkɛ Simei min bɔra Bakurim, o ni Juda cɛw tɛliyara ka taa masakɛ Dawuda kunbɛn.
[17] Benjamɛn bɔnsɔn cɛ waa kelen ni Saul ka so kɔnɔ jɔnkɛ Ziba taara ɲɔgɔn fɛ. A denkɛ tan ni duuru ni a ka jɔn mugan sera Jurdɛn ba ma masakɛ ɲɛ.
[18] Kurun min tun bilara masakɛ ni a ka so mɔgɔw ye, o sera ba kɔ. O tuma la ba tigɛlen kɔ Dawuda fɛ, Gera denkɛ Simei y'i bi masakɛ sen kɔrɔ.
[19] A y'a fɔ masakɛ ye ko: «Ne matigi masakɛ kana tilenbaliya jate ne kun. Ne matigi masakɛ bɔra Jerusalɛm don min na, ne ye filili min kɛ a la o don na, a kana miiri o la. Masakɛ kana o jate tun.
[20] I ka baaraden y'a dɔn ko a ye jurumu kɛ, o de kosɔn ne fɔlɔ nalen filɛ ka bɔ Yusufu ka so la bi walisa ne ka jigin ka taa ne matigi masakɛ ɲɛ kɔrɔ.»
[21] Nka Zeruja denkɛ Abisai y'a fɔ ko: «Yala Simei ye min kɛ, a tun man kan ka faga o kosɔn wa? A ye Matigi ka munlen neni.»
[22] Nka Dawuda y'a fɔ a ye ko: «Ne ye mun kɛ aw la, Zeruja denkɛw, fo aw bɛ ne kama i ko aw jugu? Israɛl bɔnsɔn dɔ ka kan ka faga bi wa? Ne hakili bɛ se ka bɔ a kɔ, ko ne kɛra Israɛl bɔnsɔn ka masakɛ ye sɛbɛ la bi wa?»
[23] O kɔ, masakɛ y'a fɔ Simei ye ko: «I tɛna faga.» Dawuda y'i kali Simei ye.
[24] Saul denkɛ Mefibosɛt fana taara masakɛ kunbɛn. O tun ma a sen ko, a tun ma a bonbonsi labɛn, a tun m'a ka finiw ko kabini masakɛ taa don fo ka se a kɔseginni ma so hɛrɛ la.
[25] A selen masakɛ ɲɛ kɔrɔ Jerusalɛm, Dawuda y'a fɔ a ye ko: «Mefibosɛt, mun y'a to i ma taa ne fɛ?»
[26] A ko: «E, ne matigi masakɛ, ne ka baaraden tun ye ne lafili, k'a masɔrɔ ne tun y'a fɔ ko ne na tɛrɛfɛ da ne ka fali la walisa ne ka yɛlɛn o kan ka taa masakɛ kunbɛn sabu i ka baaraden sen man ɲi.
[27] A ye ne tɔgɔ tiɲɛn ne matigi masakɛ ɲɛ na, nka ne matigi masakɛ bɛ i ko Ala ka mɛlɛkɛ. Min ka di i ye, i ka o kɛ ne la.
[28] Mɔgɔ si tɛ ne fa ka so min tun man kan ka faga ne matigi masakɛ ɲɛ kɔrɔ, o bɛɛ n'a ta i ye i ka baaraden sigi i yɛrɛ ka dumunikɛlaw cɛma i ka tabali la. Ne dun ka kan ka mun wɛrɛ ɲini masakɛ fɛ ka tɛmɛn o kan?»
[29] O tuma la masakɛ ko: «I bɛ o kuma fɔ mun kosɔn? Ne ye min latigɛ, o filɛ nin ye, ko e ni Ziba na dugukolow tila ɲɔgɔn cɛ.»
[30] Mefibosɛt ye masakɛ jaabi ko: «Ziba ka a bɛɛ ta, sabu ne matigi masakɛ nana a ka so hɛrɛ la.»
[31] Barzilai min bɔra Galad jamana la, o fana tun jiginna ka taa Rogelim. O ye Jurdɛn ba tigɛ masakɛ fɛ, walisa k'a bilasira.
[32] Barzilai tun kɔrɔla kosɛbɛ, a tun ye san bisegin sɔrɔ. A ye masakɛ balo bɛɛ bɔ k'u to Mahanayim, katuguni fɛntigi tun don.
[33] Masakɛ y'a fɔ Barzilai ye ko: «I ka taa ne fɛ Jurdɛn ba kɔ, ne na i mago bɛɛ ɲɛ ne ka so Jerusalɛm.»
[34] Nka Barzilai ye masakɛ jaabi ko: «Ne si tɔ ye joli ye fo ne ka taa masakɛ fɛ Jerusalɛm tun?
[35] Ne san bisegin ye ɲinan ye. Ko ɲuman wala ko jugu bɛ se ka ne nisɔndiya tun wa? I ka baaraden bɛ se ka minni fɛn ni dumuni fɛn faranfasi tun wa? Dɔnkili dalaw kan bɛ se ka diya ne tulo rɔ tun wa? Mun y'a to i ka baaraden bɛ kɛ ne matigi masakɛ doni ye?
[36] I ka baaraden na i bilasira ka Jurdɛn ba tigɛ nka mun y'a to masakɛ b'a fɛ ka ne bonya nin cogo la?
[37] A to ne ka segin ka taa walisa ne ka sa ne yɛrɛ ka dugu kɔnɔ, ne fa ni ne ba ka kaburu kɛrɛ fɛ. Nka a filɛ, i ka baaraden Kimham na Jurdɛn ba tigɛ ne matigi masakɛ fɛ. Min ka di i ye, i ka o kɛ a ye.»
[38] Masakɛ ko: «Kimham na taa ne fɛ, min ka di i ye, ne na o kɛ a ye. I bɛ min ɲini ne fɛ, ne na o kɛ i ye.»
[39] Ayiwa mɔgɔ bɛɛ ni masakɛ ye Jurdɛn ba tigɛ. O kɔ, masakɛ ye Barzilai da susu ka dubaw kɛ a ye. A seginna ka taa a ka so.
[40] O kɔ, masakɛ sinna ka taa Gilgal fan fɛ. Kimham ni Juda ka kɛlɛbolow bɛɛ taara a fɛ ani Israɛl bɔnsɔn ka kɛlɛbolo tilancɛ.
[41] O tuma la Israɛl bɔnsɔn bɛɛ taara masakɛ sɛgɛrɛ k'a fɔ a ye ko: «Mun y'a to an balimaw, Juda bɔnsɔn ye i sonya ka taa ni masakɛ ni a so mɔgɔw ni a nɔ fɛ mɔgɔw bɛɛ ye ka Jurdɛn ba tigɛ?»
[42] Juda bɔnsɔn ye Israɛl bɔnsɔn jaabi ko: «An y'a kɛ sabu a ka surun an na. Mun kosɔn aw bɛ dimin? Masakɛ ye an balo wa? An ye nili fɛnw sɔrɔ a fɛ wa?»
[43] Nka Israɛl bɔnsɔn ye Juda bɔnsɔn jaabi ko: «An ta don siɲɛ tan ka tɛmɛn aw kan, hali ni a kɛra aw dɔ ye. Mun y'a to aw ye an mafiɲɛya? Aw m'a dɔn ko an fɔlɔ de ye masakɛ kɔseginni ko fɔ wa?» Nka Juda cɛw ka kuma fariyara ka tɛmɛn Israɛl bɔnsɔn ta kan.