[1] Kɛlɛ mɛnna Saul ka so ni Dawuda ka so cɛ, nka Dawuda barika tun bɛ bonya ka ta'a fɛ, k'a sɔrɔ Saul ka so barika tun bɛ dɔgɔya.
[2] Dawuda ye denkɛ dɔw sɔrɔ k'a to Heborɔn. Dawuda denkɛ fɔlɔ tɔgɔ ko Amnɔn, Akinoam min bɔra Jizreɛl, o denkɛ don.
[3] Denkɛ filanan tɔgɔ ko Kileab, Abigail min tun ye Nabal muso kɔrɔ ye ka bɔ Karmɛl, o denkɛ don. A sabanan tɔgɔ ko Absalɔm, o ba tun ye Gesur masakɛ Talmai denmuso Maka ye.
[4] A naaninan tɔgɔ ko Adonija, o tun ye Hajit denkɛ ye. A duurunan tɔgɔ ko Sefatiya, o tun ye Abital denkɛ ye.
[5] A wɔɔrɔnan tɔgɔ ko Jitream, o tun ye Dawuda muso Egila denkɛ ye. Olu tun ye Dawuda denkɛw ye, a ye minw sɔrɔ k'a to Heborɔn.
[6] Ayiwa ka kɛlɛ to Saul ka so ni Dawuda ka so cɛ, Abinɛr ye Saul ka so dɛmɛ kosɛbɛ.
[7] Saul tun ye muso dɔ ta, o tɔgɔ ko Rizpa, Aja denmuso tun don. Isbosɛt y'a fɔ Abinɛr ye ko: «Mun y'a to i taara ne fa ka muso talen ka so?»
[8] Abinɛr diminna Isbosɛt kɔrɔ kosɛbɛ k'a fɔ a ye ko: «I bɛ miiri ko ne ye wulu kunkolo ye ka baara kɛ Juda ka so kɔnɔ wa? Ne min ye ko ɲuman kɛ i fa Saul ni a ka so ni a balimaw ani a teriw ye, ne ma i don Dawuda bolo. O bɛɛ n'a ta i ye ne jalaki o muso ko la bi.
[9] Ala ye layidu minw ta Dawuda ye, ni ne ma se ka olu dafa a ye, Ala ka o ko jugu bɛɛ lase ne ma.
[10] Ala y'a fɔ ko a ye masaya bɔ Saul ka so kɔnɔ ka Dawuda kɛ Juda bɔnsɔn ni Israɛl bɔnsɔn ka masakɛ ye ka bɔ Dan fo ka taa se Beɛr-Seba.»
[11] Isbosɛt ma se ka foyi fɔ Abinɛr ye, k'a masɔrɔ a tun bɛ siran a ɲɛ.
[12] Abinɛr ye cidenw bila ka taa Dawuda sɛgɛrɛ k'a fɔ a yɛrɛ ko la, ko: «Jamana ye jɔn ta ye? I ka layidu ta ne ye, ne na i dɛmɛ ka Israɛl bɔnsɔn bɛɛ yɛlɛma i fan fɛ.»
[13] Dawuda y'a jaabi ko: «A ɲɛna, ne na layidu ta i ye. Ne bɛ fɛn kelen dɔrɔn ɲini i fɛ, ko i kana na ne kɔrɔ ni i ma na ni Saul denmuso Mikal ye.»
[14] O tuma la Dawuda ye cidenw bila ka taa Saul denkɛ Isbosɛt sɛgɛrɛ k'a fɔ a ye ko: «I ka ne muso Mikal segin ne ma. Ne y'a furu ni Filisitikaw bolokobali wolo kɛmɛ tigɛlenw ye.»
[15] Isbosɛt taara k'a minɛ a cɛ Paltiɛl la, o ye Lais denkɛ ye.
[16] A cɛ kasitɔ taara a fɛ fo ka se Bakurim. O kɔ, Abinɛr y'a fɔ a ye ko: «I ka segin ka taa so.» A kɔseginna.
[17] Abinɛr ye Israɛl cɛkɔrɔbaw wele k'a fɔ u ye ko: «Kabini tuma jan, aw b'a fɛ Dawuda ka kɛ aw ka masakɛ ye.
[18] Ayiwa aw ka o kɛ sisan, k'a masɔrɔ Matigi kumana Dawuda fɛ k'a fɔ a ye ko: ‹Ne na Filisitikaw ni u juguw bɛɛ don ne ka mɔgɔw bolo ne ka baaraden Dawuda bolo.›»
[19] Abinɛr ye o kuma kelen fɔ Benjamɛn bɔnsɔn ye, o kɔ, a taara Heborɔn ka Israɛl bɔnsɔn ka ko latigɛlen ni Benjamɛn ka ko latigɛlen fɔ Dawuda ye.
[20] Dawuda ye dumuni labɛn Abinɛr ni a fɛ mɔgɔ mugan ye.
[21] O kɔ, Abinɛr y'a fɔ Dawuda ye ko: «Ne bɛ taa ka Israɛl bɔnsɔn bɛɛ lajɛ ne matigi masakɛ kɔrɔ walisa u ka layidu ta i ye. I na kɛ Israɛl bɔnsɔn bɛɛ ka masakɛ ye i ko i dusukun sɔnna a ma cogo min na.» Ayiwa Dawuda ye Abinɛr bila ka taa hɛrɛ la.
[22] Ayiwa Dawuda fɛ cɛw ni Joab kɔseginna ka bɔ cɛli yɔrɔ la ni nafolo cɛlenw caman ye u bolo. Nka Abinɛr tun tɛ Dawuda fɛ Heborɔn yen, k'a masɔrɔ Dawuda tun y'a bila ka taa hɛrɛ la.
[23] O y'a sɔrɔ mɔgɔ dɔ y'a fɔ Joab ye ko: «Ner denkɛ Abinɛr tun nana masakɛ yɔrɔ, o y'a bila ka taa. A taara hɛrɛ la.»
[24] O tuma la Joab taara masakɛ sɛgɛrɛ k'a fɔ a ye ko: «I ye mun kɛ tan? A filɛ Abinɛr tun nana i ka so. Mun kosɔn i y'a bila ka taa?
[25] I bɛ Ner denkɛ Abinɛr cogo dɔn. A ma na foyi la fɔ ka i lafili ka i bɔ cogo ni i don cogo dɔn ka i ka kɛtaw fana dɔn.»
[26] O kɔ, Joab bɔra Dawuda kɔrɔ ka cidenw bila ko u ka taa Abinɛr sɛgɛrɛ ka na n'a ye ka bɔ Sira ji dingɛ da la, nka Dawuda ma bɔ o seere ma.
[27] Abinɛr kɔseginna ka taa Heborɔn tuma min na, Joab taara n'a ye kɛrɛ fɛ dugu donda la i ko a bɛ kuma a fɛ dogo la. A y'a gosi a kɔnɔbara la yen k'a faga ka Joab balimakɛ Asaɛl joli hakɛ bɔ a la.
[28] O kɔ, Dawuda y'o mɛn, a ko: «Ayi, Matigi tɛ sɔn ka Ner denkɛ Abinɛr joli hakɛ lase ne ni ne ka masaya ma fewu.
[29] O joli hakɛ ka bi Joab ni a fa ka so bɛɛ kan. Damajalantɔ wala kunatɔ wala min bɛ sinsin bere la, wala npan ka fagali wala balo dɛsɛ ka sɔrɔ Joab ka so la tuma bɛɛ.»
[30] O cogo la Joab ni a balimakɛ Abisai ye Abinɛr faga, sabu a tun ye u balimakɛ Asaɛl faga Gabaon kɛlɛ bannen kɔ.
[31] Joab ni jama minw tun bɛ Dawuda fɛ yen, a y'a fɔ olu ye ko: «A' ye aw ka finiw fara ka cafu finiw don aw la ka Abinɛr su kasi ka taa su ɲɛ.» Masakɛ Dawuda tugura su kɛsu kɔ.
[32] U ye Abinɛr su don Heborɔn tuma min na, masakɛ ye kasikanba bɔ Abinɛr kaburu la. Mɔgɔ bɛɛ fana kasira.
[33] Masakɛ ye Abinɛr su kasi, a ko: «Abinɛr tun ka kan ka faga i ko hakilintan wa?
[34] E bolo sirilen tun tɛ, i senw tun tɛ nɛgɛ la. I bira i ko mɔgɔ bɛ bi kojugukɛlaw bolo cogo min na.» O tuma la mɔgɔw bɛɛ kasira ko kura.
[35] O kɔ, u bɛɛ gɛrɛla Dawuda la ko a ka dumuni kɛ sani tile ka ban, nka Dawuda ka kalili kosɔn a ma sɔn. A ko: «Ni ne ye dumini kɛ sani tile ka bi, Ala ka tɔɔrɔba lase ne ma.»
[36] Dawuda ka ko kɛ cogo fɔra mɔgɔw ye, o ɲɛna mɔgɔw bɛɛ ɲɛ na. Masakɛ ka kɛtaw bɛɛ diyara mɔgɔw ye.
[37] Ayiwa mɔgɔw bɛɛ ni Israɛl bɔnsɔn bɛɛ y'a faamu o don na ko masakɛ sen tun tɛ Abinɛr fagali la.
[38] Masakɛ y'a fɔ mɔgɔw ye ko: «Yala aw m'a dɔn ko Israɛl bɔnsɔn kuntigiba dɔ bira bi wa?
[39] Ne ta fan fɛ, hali ne min munna ka kɛ masakɛ ye, ne barika ka dɔgɔ bi. O cɛw, Zeruja denkɛw ka farin, ne tɛ se u la. Matigi ka mɔgɔ jugu sara a ka juguya kosɔn.»