[1] Waati dɔ tɛmɛnnen kɔ, Absalɔm ye wotoro ni sow sɔrɔ ani cɛ biduuru ka boli a ɲɛ.
[2] A tun bɛ soli ka wuli ka taa i jɔ dugu donda la sira la. Ni a ye mɔgɔ dɔ taatɔ ye masakɛ yɔrɔ la kiri ko la, a tun bɛ o wele k'a fɔ o ye ko: «E bɔra dugu jumɛn la?» Ni o ko: «I ka baaraden bɔra Israɛl siya dugu nin na,»
[3] Absalɔm tun b'a fɔ ko: «I ka ko ka ɲi, a tilennen don, nka mɔgɔ si tɛ masakɛ ka so min bɛ i lamɛn.»
[4] O kɔ, a b'a fɔ ko: «E, ni ne tun sigira ka kɛ jamana kiritigɛla ye, mɔgɔ o mɔgɔ tun bɛ na ni kiri ko wala ko wɛrɛ ye ne ka so, ne tun na jo di o tigi ma.»
[5] Ni mɔgɔ dɔ nana ko a bɛ i biri Absalɔm kɔrɔ k'a bonya, a tun bɛ o bolo minɛ ka o da susu.
[6] Israɛl bɔnsɔn mɔgɔ minw tun bɛ na kiri ko la masakɛ fɛ, Absalɔm ye olu bɛɛ dusukun yɛlɛma a ta fan fɛ.
[7] San naani tɛmɛnnen kɔ, Absalɔm y'a fɔ masakɛ ye ko: «I k'a to ne ka taa Heborɔn ka ne ka dafale saraka bɔ Matigi ye.
[8] K'a masɔrɔ i ka baaraden tun bɛ Siri jamana la Gesur tuma min na, ne ye ne dafale ko: ‹Ni Matigi taara ni ne ye Jerusalɛm, ne na saraka bɔ Matigi ye.›»
[9] Masakɛ y'a fɔ a ye ko: «I ka taa hɛrɛ la.» O tuma la Absalɔm wulila ka taa Heborɔn.
[10] O kɔ, a ye cidenw bila ka taa a fɔ Israɛl bɔnsɔn siyaw ye ko: «Ni aw ye buru fyɛkan mɛn, o yɔrɔ nin bɛɛ aw k'a fɔ ko: ‹Absalɔm kɛra masakɛ ye Heborɔn.›»
[11] Cɛ kɛmɛ fila bɔra Jerusalɛm ka taa Absalɔm fɛ. A tun ye olu wele. Olu dusu jɛlen taara a fɛ k'a sɔrɔ u ma foyi dɔn o ko la.
[12] Ka Absalɔm to saraka fagali la, a taara Dawuda ka laadibaa Akitofɛl wele ka bɔ o yɛrɛ ka dugu kɔnɔ Gilo. O jɛ sirilen tun ka bon katuguni mɔgɔw tun bɛ fara Absalɔm kan ka ta'a fɛ.
[13] O kibaru nana fɔ Dawuda ye ko: «Israɛl bɔnsɔn bɛɛ dusu yɛlɛmana Absalɔm fan fɛ.»
[14] O tuma la, baaraden minw tun bɛ Dawuda fɛ Jerusalɛm, Dawuda y'a fɔ olu ye ko: «A' ye wuli, an ka boli, n'o tɛ, an tɛna se ka kisi Absalɔm ma tun. A' ye wuli joona, an ka taa. A kana na an sɔrɔ yan ka an bɛɛ gosi ka an ka dugu bɛɛ halaki ni npan ye.»
[15] Masakɛ ka baaradenw y'a fɔ a ye ko: «Fɛn o fɛn ka di an matigi masakɛ ye, i ka o fɔ, i ka baaradenw labɛnnen bɛ ka o kɛ»
[16] O tuma la masakɛ taara a ka so mɔgɔw bɛɛ labɔ, nka a y'a ka jɔnmuso tan to yen ka a ka so kɔlɔsi.
[17] O tuma la masakɛ ni a ka jama bɔra ka taa. U taara u jɔ dugu so laban na.
[18] Masakɛ ka baaradenw bɛɛ tun bɛ taama a kɛrɛ fɛ ani Kereti mɔgɔw ni Peleti mɔgɔw bɛɛ ani Gesurkaw cɛ kɛmɛ wɔɔrɔ minw bɔra Gat. Olu nana masakɛ kunbɛn ka taa a ɲɛ.
[19] O tuma la masakɛ y'a fɔ Gat Itai ye ko: «Mun y'a to i nana an fɛ? Segin ka taa masakɛ kura fɛ sabu i ye dunan ye, i ye siginfɛ ye i ka yɔrɔ la.
[20] E nana kunun, ne k'a to i ka yaalayaala an fɛ bi wa? Ne kɔni, ne tɛ ne taa yɔrɔ dɔn. I ka kɔsegin ka taa ni i balimaw ye i fɛ. Matigi ka ɲumaya ni kantigiya kɛ i ye.»
[21] Nka Itai ye masakɛ jaabi ko: «Matigi ɲɛnama tɔgɔ kosɔn, ne matigi masakɛ bɛ yɔrɔ o yɔrɔ, a kɛra fagali ye wo, a kɛra balo ye wo, i ka baaraden fana na kɛ yen.»
[22] O tuma la Dawuda y'a fɔ Itai ye ko: «Ayiwa, i ka tɛmɛn ɲɛ fɛ.» Gat Itai tɛmɛnna jama ɲɛ fɛ. A fɛ cɛw ni u ka denmisɛnw taara a fɛ.
[23] Jamana mɔgɔw bɛɛ tun bɛ kasi ka kulo o jama tɛmɛn tuma la. Masakɛ ye Sedrɔn kɔ tigɛ. Jama bɛɛ tugura a nɔ fɛ ka taa kungokolon sira fɛ.
[24] U ye sarakalasebaa Zadɔk ni Levitew, Ala ka layidu wagande tabaaw sɔrɔ yen. U ye wagande sigi yen fo mɔgɔw bɛɛ ka bɔ dugu kɔnɔ. Mɔgɔw bɛɛ bɔlen kɔ dugu kɔnɔ, Abiatar ye u ɲɛ minɛ.
[25] O tuma la masakɛ y'a fɔ Zadɔk ye ko: «I ka kɔsegin ni Ala ka wagande ye dugu kɔnɔ. Ni ne ye duba sɔrɔ Matigi ɲɛ kɔrɔ, ne yɛrɛ na kɔsegin ka wagande ni a sigi yɔrɔ ye.
[26] Nka ni a ko, ne ko man di a ye fewu, min ka di a ye, a ka o kɛ ne la.»
[27] Masakɛ y'a fɔ sarakalasebaa Zadɔk ye ko kura ko: «A filɛ, i ka kɔsegin ka taa dugu kɔnɔ hɛrɛ la. Aw denkɛ fila fana ka taa aw fɛ, i denkɛ Akimaz ani Abiatar denkɛ Jonatan.
[28] Ne kɔni, ne na makɔnɔli kɛ jɛkɛnɛw la kungokolon kɔnɔ yan, fo ne ka aw kibaru mɛn tuma min na.»
[29] Ayiwa Zadɔk ni Abiatar taara ni Ala ka layidu wagande ye Jerusalɛm ka to yen.
[30] Dawuda ye Oliviye kulu yɛlɛn ka taa. A yɛlɛntɔ tun bɛ kasi, a kun da tugulen ni a sen lankolon tun don. Minw taara a fɛ, olu bɛɛ fana kun da tugulen tun don, u tun bɛ kasi.
[31] O tuma la a fɔra Dawuda ye ko, Akitofɛl ni Absalɔm jɛ don. Dawuda y'a fɔ ko: «Matigi, ne bɛ i deli, i ka Akitofɛl ka ɲɛjirali kuma bɛɛ yɛlɛma ka kɛ hakilintanya ye.»
[32] Dawuda sera kulu kuncɛ la tuma min na, a ye Ala bato yen. Husai min bɔra Arka, o nana Dawuda kunbɛn. A ka fini faralen tun don, a kunsigi jɛlen tun don buguri la.
[33] Dawuda y'a fɔ a ye ko: «Ni i taara ne fɛ, i na kɛ ne doni ye.
[34] A ka fisa i ka kɔsegin ka taa dugu kɔnɔ k'a fɔ Absalɔm ye ko, ‹Masakɛ, ne bɛ baara kɛ i ye. Ne tun bɛ baara kɛ i fa ye ka kɔrɔ, nka sisan ne b'a fɛ ka baara kɛ e de ye.› O cogo la i na ne dɛmɛ ka Akitofɛl ka laadili kuma bɛɛ tiɲɛn.
[35] Sarakalasebaaw Zadɔk ni Abiatar na kɛ i fɛ yen. I bɛ fɛn o fɛn mɛn ka bɔ masakɛ ka so kɔnɔ, i ka o bɛɛ fɔ sarakalasebaaw Zadɔk ni Abiatar ye.
[36] Olu denkɛ fila, Zadɔk denkɛ Akimaz ni Abiatar denkɛ Jonatan, olu na kɛ u fɛ yen. U na aw kibaru bɛɛ lase ne ma.»
[37] O tuma la Dawuda terikɛ Husai seginna ka taa dugu kɔnɔ. O y'a sɔrɔ Absalɔm dontɔ don dugu kɔnɔ.