[1] Cɛ sɔnkolon dɔ tun bɛ yen, o tɔgɔ ko Seba. Benjamɛn bɔnsɔn Bikri denkɛ don. O ye buru fyɛ k'a fɔ ko: «Dawuda tɛ an ta ye fewu. An tɛna ciyɛn si sɔrɔ Isayi denkɛ fɛ. Mɔgɔw bɛɛ ka taa u ka so.»
[2] O tuma la Israɛl bɔnsɔn cɛw bɛɛ farala Dawuda la ka tugu Bikri denkɛ Seba la. Nka Juda bɔnsɔn cɛw kɛra kantigiw ye. U ni masakɛ bɔra Jurdɛn ba la ka taa ɲɔgɔn fɛ Jerusalɛm.
[3] Dawuda sera a ka yɔrɔ la Jerusalɛm tuma min na, a tun y'a ka so kalifa jɔnmuso tan minw ma, a ye olu bila so dɔ kɔnɔ ka u mago fɛnw di u ma, nka a ma don u fɛ tun. Olu tora u dan na fo ka taa se u sa don ma i ko muso cɛ salenw.
[4] O kɔ, masakɛ y'a fɔ Amasa ye ko: «I ka Juda cɛw lajɛ ne fɛ yan tile saba kɔnɔ. E fana ka kɛ yan.»
[5] O tuma la Amasa taara mɔgɔw lajɛ, nka ale tora kɔ fɛ ka waati fɔlen tɛmɛn.
[6] Dawuda y'a fɔ Abisai ye ko: «Ayiwa sisan Bikri denkɛ Seba na ko jugu kɛ an na ka tɛmɛn Absalɔm kan. O de kosɔn i ka i kuntigi ka baaradenw ta ka Seba nɔgɛn walisa a kana don dugu barikama dɔ kɔnɔ ka tunun an na.»
[7] Abisai ye Joab ka cɛw ni Kereti mɔgɔw ni Peleti mɔgɔw ani cɛ ja gɛlɛnw bɛɛ ɲɛ minɛ ka taa. U bɔra Jerusalɛm ka Bikri denkɛ Seba nɔgɛn.
[8] U selen Gabaon farakurunba ma, Amasa taara ka u kunbɛn. Joab tun ye a yɛrɛ ka kɛlɛkɛ dulɔki don, npan tun bɛ Joab ka cɛ sirilan na. A taatɔ, npan bira ka bɔ a tan la.
[9] Joab y'a fɔ Amasa ye ko: «I ka kɛnɛ wa, ne balimakɛ?» A ye Amasa minɛ a bonbonsi ma ni a kininbolo ye ka a da susu.
[10] Nka Amasa ma Joab bolo kelen la npan kɔlɔsi. Joab ye npan turu a kɔnɔbara la, Amasa nugu bɛɛ bɔnna duguma. A sara, hali a ma a gosi siɲɛ fila. O kɔ, Joab ni a balimakɛ Abisai ye Bikri denkɛ Seba nɔgɛn.
[11] Joab ka kamalen kelen tun tora Amasa kɛrɛ fɛ k'a fɔ ko: «Joab ko ka di min ye ani min bɛ Dawuda fɛ, olu ka tugu Joab la.»
[12] O waati la Amasa tun b'a la ka i kolonkolon a joli la sira cɛmancɛ la. O kamalen y'a ye ko mɔgɔw bɛɛ bɛ u jɔ minkɛ, a ye Amasa su sama ka bɔ sira la ka taa n'a ye foro dɔ la ka fini biri a su la, katuguni a y'a ye ko sira taamabaaw bɛ u jɔ yen.
[13] Su bɔra sira la tuma min na, mɔgɔ si ma u jɔ, u bɛɛ tɛmɛnna ka taa Joab nɔ fɛ ka Bikri denkɛ Seba nɔgɛn.
[14] Joab ye Israɛl ka jamana bɛɛ yaala fo ka taa se Abɛl-Bɛt-Maka. Kɛlɛkɛ cɛ ɲɛnatɔmɔlenw ye ɲɔgɔn lajɛ ka tugu Joab nɔ fɛ.
[15] U taara Seba sɔrɔ Abɛl-Bɛt-Maka dugu kɔnɔ. U ye yɛlɛnyɛlɛnnan jɔ ni bɔgɔmugu ye fo ka se dugu kogo san fɛ. Joab fɛ cɛw ye dugu kogo ju kɔrɔla sen walisa kogo ka bi.
[16] Dugu kɔnɔ muso hakiliman dɔ y'a fɔ ko: «A' ye aw tulo majɔ. A' ye aw tulo majɔ. Ne bɛ aw deli ko aw k'a fɔ Joab ye ko a ka gɛrɛ yan na ko ne b'a fɛ ka kuma a fɛ.»
[17] A y'i madon tuma min na, muso y'a ɲininka ko: «E ye Joab ye wa?» A ko: «Ne don.» Muso ko: «I ka i ka jɔnmuso ka kuma lamɛn.» Joab ko: «Ne b'i lamɛn.»
[18] O tuma la muso y'a fɔ ko: «Laada dɔ bɛ an fɛ yan k'a fɔ ko: ‹A' ye taa Abɛl cɛw ɲininka›, o tuma la o ko tun bɛ ɲɛnabɔ.
[19] An ka yɔrɔ ye Israɛl la yɔrɔ ɲuman dɔ ye. Mun kosɔn i b'a fɛ ka Matigi ka ciyɛn halaki?»
[20] Joab y'a jaabi ko: «Ala ma ne kisira o ma. Ɔwɔ, Ala ma ne kisira nin yɔrɔ halakili miirili ma.
[21] O tɛ an kɔnɔ, nka cɛ dɔ bɔra Efrayim kulu jamana la, o tɔgɔ ko Seba, Bikri denkɛ don. O murutira masakɛ Dawuda ma, a' ye o kelenpe don an bolo, ne na dugu to yen.» Muso ye Joab jaabi ko: «An na a kunkolo fili dugu kogo kɔ fɛ i ye.»
[22] O muso ye o kow fɔ mɔgɔw ye. U ye a ka hakilitigiya laadili kuma lamɛn. U ye Bikri denkɛ Seba kun tigɛ ka o fili Joab ma. Joab ye buru fyɛ, kɛlɛkɛ cɛw y'u mabɔ dugu la. U bɛɛ taara u ka yɔrɔ la. Joab seginna masakɛ yɔrɔ la Jerusalɛm.
[23] Joab tun ye Israɛl bɔnsɔn bɛɛ ka kɛlɛbolow kuntigi ye. Jehojada denkɛ Benaja tun ye Kereti mɔgɔw ni Peleti mɔgɔw ka kɛlɛbolow kuntigi ye.
[24] Adoram bilara jɔnya baarakɛlaw kun na. Akilud denkɛ Josafat tun ye tilew kibaru sɛbɛnnikɛla ye.
[25] Seja tun ye sɛbɛnnikɛla ye. Zadɔk ni Abiatar tun ye sarakalasebaaw ye.
[26] Jair bɔnsɔn Ira tun ye Dawuda ka laadibaa ye.