[1] Don dɔ la Dawuda ye ɲininkali kɛ ko: «Yala mɔgɔ ɲɛnama tora Saul ka so wa? Ne ka kan ka ko ɲuman kɛ o ye ne terikɛ Jonatan kosɔn.»
[2] O y'a sɔrɔ jɔnkɛ dɔ bɛ Saul ka so, o tɔgɔ ko Ziba. U ye o wele ka taa Dawuda kɔrɔ. Masakɛ Dawuda y'a fɔ a ye ko: «E ye Ziba ye wa?» A ye masakɛ jaabi ko: «Ɔwɔ, ne ye i ka baaraden ye.»
[3] Masakɛ ko: «Yala mɔgɔ si tɛ Saul ka so, ne ka kan ka ko ɲuman kɛ min ye Ala ɲɛ kɔrɔ wa?» Ziba ye masakɛ jaabi ko: «Jonatan denkɛ kelen bɛ yen fɔlɔ. O sen fila tiɲɛnnen don.»
[4] Masakɛ y'a fɔ a ye ko: «A bɛ min?» Ziba ye masakɛ jaabi ko: «A bɛ Amiɛl denkɛ Makir ka so Lodebar.»
[5] O tuma la masakɛ Dawuda ye ci bila ka taa a nɔ fɛ Amiɛl denkɛ Makir ka so Lodebar.
[6] Saul denkɛ Jonatan denkɛ Mefibosɛt sera Dawuda yɔrɔ la tuma min na, a ye i bi duguma k'a bonya. Dawuda y'a fɔ ko: «Mefibosɛt.» O ko: «I ka baaraden filɛ.»
[7] Dawuda y'a fɔ a ye ko: «I kana siran. Ne b'a fɛ ka ko ɲuman kɛ i ye i fa Jonatan ka kanuya kosɔn. Ne bɛ i mokɛ Saul ka dugukolo bɛɛ di i ma. I na dumuni kɛ ne ka tabali la tuma bɛɛ.»
[8] O tuma la Mefibosɛt y'i bi k'a ɲɛ biri duguma k'a fɔ ko: «Mun y'a to i bɛ ko ɲuman kɛ i ka jɔn ye, k'a sɔrɔ ne bɛ i ko wulu su?»
[9] O kɔ, Dawuda ye Saul ka jɔnkɛ Ziba wele k'a fɔ a ye ko: «Fɛn minw ye Saul ni a ka so ta ye, ne ye olu bɛɛ di e makɛ denkɛ ma.
[10] E ni i denkɛw ni i ka jɔnw na a ka dugukolo sɛnɛ. I na a sumanw mara walisa i kuntigi denkɛ ka dumuni sɔrɔ. I makɛ denkɛ Mefibosɛt kɔni, ale na dumuni kɛ ne ka tabali la tuma bɛɛ.» O y'a sɔrɔ denkɛ tan ni duuru ni jɔnkɛ mugan tun bɛ Ziba fɛ.
[11] Ziba ye masakɛ jaabi ko: «Ne matigi masakɛ, i bɛ fɛn o fɛn fɔ ne ye, ne na o bɛɛ kɛ.» Ayiwa Mefibosɛt kɔni ye dumuni kɛ Dawuda ka tabali la i ko masakɛ denkɛ dɔ.
[12] Den cɛmani dɔ tun bɛ Mefibosɛt fɛ, o tɔgɔ ko Mika. O kɔ, mɔgɔ o mɔgɔ tun bɛ Ziba ka so kɔnɔ, olu bɛɛ tun ye Mefibosɛt ka jɔnw ye.
[13] Ayiwa Mefibɔsɛt sigira Jerusalɛm k'a masɔrɔ a tun bɛ dumuni kɛ masakɛ fɛ tuma bɛɛ. A sen fila tiɲɛnnen tun don.