[1] Zeruja denkɛ Joab y'a ye ko masakɛ ka miirili yɛlɛmana Absalɔm ta fan fɛ minkɛ,
[2] a ye mɔgɔ dɔ ci ka taa muso dɔ wele Tekoa. O muso tun ka kegun. Joab y'a fɔ o ye ko: «I ka i yɛrɛ kɛ i n'a fɔ i ka mɔgɔ dɔ sara ka sudonfini don i kan na, i kana i mun ni tulu suma duman ye. O kɔ, i ka i yɛrɛ kɛ su kasi muso ye kabini tuma jan.
[3] O kɔ, i ka don masakɛ ka so ka nin kumaw fɔ.» O muso ka kan ka min fɔ, Joab ye o don a da la.
[4] O Tekoaka muso taara kuma masakɛ fɛ. A y'a ɲɛ biri duguma k'a bonya k'a fɔ ko: «Masakɛ, ne dɛmɛ.»
[5] Masakɛ y'a fɔ a ye ko: «I bɛ mun fɛ?» O muso ko: «A filɛ, ne ye muso cɛ salen ye, ne cɛ sara.
[6] Denkɛ fila tun bɛ i ka jɔnmuso fɛ. Olu ye ɲɔgɔn kɛlɛ kungo kɔnɔ. Mɔgɔ si tun tɛ yen ka u tila, kelen ye dɔ gosi k'a faga.
[7] O kɛlen, du kɔnɔ mɔgɔw bɛɛ wulila i ka jɔnmuso kama k'a fɔ ne ye ko: ‹Min ye a balimakɛ faga, i ka o don an bolo. An b'a fɛ k'o faga ka a balimakɛ joli hakɛ bɔ.› Ni o kɛra, u na ne ka takami tɔ tolen faga. U b'a fɛ ka an si tunun ka bɔ dugukolo kan, ni o kɛra, bɔnsɔn tɛna to ne cɛ kɔ dugukolo kan.»
[8] Masakɛ y'a fɔ muso ye ko: «Segin ka taa i ka so. Ne na ci di i ko la.»
[9] O Tekoaka muso ye masakɛ jaabi ko: «Ne matigi ni ne ka masakɛ, ne ni ne fa ka so jalakilen don, masakɛ ni a ka masasigilan jalakibali don.»
[10] Masakɛ ko: «Ni mɔgɔ dɔ ye i lasiran tun, i ka na n'o ye ne fɛ yan. O tɛna i tɔɔrɔ tun.»
[11] Muso ko: «Ne bɛ masakɛ deli ko Matigi a ka Ala ka kɛ a seere ye, walisa joli hakɛbɔbaa kana bɔnɛ lase ne ma ka ne denkɛ faga.» Masakɛ y'a jaabi ko: «Matigi ɲɛnama tɔgɔ kosɔn, hali a kunsigiden kelen tɛna bi duguma.»
[12] Muso ko: «A to i ka jɔnmuso ka kuma kelen fɔ ne matigi masakɛ ye.» Masakɛ ko: «I ka kuma.»
[13] Muso ko: «Ayiwa, mun y'a to i ye o bɔɲɔgɔnko wale kɛ Ala ka mɔgɔw la? Masakɛ, i ye kuma min fɔ sisan, a bɛ i ko i ye i yɛrɛ jalaki, sabu Absalɔm bolila ka taa jamana min na, i ma a lana ka bɔ yen.
[14] An bɛɛ na sa don dɔ, siga t'a la. An na kɛ i ko ji bɔnnen min tɛ se ka cɛ tun. Ala t'a fɛ Absalɔm ka sa sisan, nka a b'a fɛ mɔgɔ gɛnnen ka kɔsegin.
[15] Ayiwa ne nana kuma ne matigi masakɛ fɛ tuma min na, mɔgɔw ye ne lasiran. I ka jɔnmuso ko: ‹Ne na kuma masakɛ fɛ, a dɔrɔ masakɛ na a ka jɔnmuso ka kuma fɔlen kɛ.›
[16] Cɛ min b'a fɛ ka ne ni ne denkɛ halaki ɲɔgɔn fɛ ka an bɔ Ala ka ciyɛn na, masakɛ na ne ka kuma mɛn ka an tila o tigi la.
[17] I ka jɔnmuso y'a miiri ko matigi masakɛ ka kumaw na lafiya di an ma, k'a masɔrɔ ne matigi masakɛ bɛ i ko Ala ka mɛlɛkɛ ka ko ɲuman ni ko jugu faranfasi ka bɔ ɲɔgɔn na. Matigi i ka Ala ka to i fɛ.»
[18] Masakɛ y'a fɔ o muso ye ko: «Ne bɛ i ɲininka ko minw na, i kana o si dogo ne la.» Muso ko: «Ne matigi masakɛ, i ka kuma.»
[19] Masakɛ ko: «Yala Joab ma nin ko bɛɛ fɔ i ye wa?» Muso y'a jaabi ko: «Ka i to ni la, ne matigi masakɛ, i bɛ fɛn o fɛn fɔ ne ye, ne tɛna jɛngɛ ka taa kinin wala numan fɛ ka mabɔ ne matigi masakɛ ka fɔlen na. Ɔwɔ, i ka baaraden Joab de ye o ciw bɛɛ fɔ ne ye ka o ciw bɛɛ don i ka jɔnmuso da la.
[20] I ka baaraden Joab ye o kɛ walisa a ka nin ko yɛlɛma. Hakili bɛ ne matigi masakɛ fɛ i ko Ala ka mɛlɛkɛ ka dugukolo kan ko kɛtaw bɛɛ dɔn.»
[21] O kɔ, masakɛ y'a fɔ Joab ye ko: «E de ye o kow kɛ, o de kosɔn i ka taa ka na ni kamalen Absalɔm ye.»
[22] Joab y'i bi k'a ɲɛ biri duguma ka masakɛ bonya, o kɔ, k'a fɔ ko: «I ka baaraden y'a dɔn bi ko ne ko ka di i ye, ne matigi masakɛ, k'a masɔrɔ masakɛ ka baaraden ye fɛn min ɲini i fɛ, i ye o kɛ.»
[23] O tuma la Joab wulila ka taa Gesur ka na ni Absalɔm ye Jerusalɛm.
[24] O kɛlen, masakɛ ko: «Absalɔm ka to a ka so, a kana na masakɛ ɲɛ kɔrɔ.» Ayiwa Absalɔm taara a ka so, a ma taa masakɛ ɲɛ kɔrɔ.
[25] O y'a sɔrɔ mɔgɔ si tun tɛ Israɛl bɔnsɔn cɛma min bɛ Absalɔm bɔ cɛɲɛ la. K'a daminɛ a sentɛgɛ la fo ka taa bila a kunkolo la, fiɲɛ si tun t'a la.
[26] A tun bɛ a kunsigi tigɛ san o san katuguni a kunsigi tun bɛ janya ka giriya. A kunsigi tigɛlen peselen tun ye kilo fila ani dɔɔnin ye ka kɛɲɛ ni masakɛ ka jateli ye.
[27] Denkɛ saba ni denmuso kelen tun bɛ Absalɔm fɛ. A denmuso tɔgɔ ko Tamar. O kɛra muso cɛ ɲi ye.
[28] Absalɔm ye san fila dafalen kɛ Jerusalɛm, a ma masakɛ ɲɛda ye.
[29] O kɔ, Absalɔm ye Joab wele ko a ka a bila ka taa masakɛ ka so, nka Joab ma sɔn ka taa Absalɔm yɔrɔ la. A ye Joab wele a siɲɛ filanan la nka Joab ma sɔn ka taa.
[30] O tuma la Absalɔm y'a fɔ a ka baaradenw ye ko: «Joab ka orje foro filɛ, a bɛ ne ta kɛrɛ fɛ. A' ye taa tasuma tugu a la.» Absalɔm ka baaradenw taara tasuma tugu o foro la.
[31] O tuma la Joab wulila ka taa Absalɔm nɔ fɛ a ka so k'a fɔ a ye ko: «Mun y'a to i ka baaradenw ye tasuma tugu ne ka foro la?»
[32] Absalɔm ye Joab jaabi ko: «Ne ye ci bila ka taa a fɔ i ye ko i ka na, an ka taa masakɛ yɔrɔ la ka ne fɛtaw fɔ a ye, ko: ‹Mun y'a to ne nana ka bɔ Gesur? A tun ka fisa ne ka to yen halibi.› Ayiwa sisan ne b'a fɛ ka taa ne yɛrɛ jira masakɛ la, ni tilenbaliya ko dɔ bɛ ne la, a ka ne faga.»
[33] Joab taara masakɛ ɲɛ kɔrɔ ka o kumaw fɔ masakɛ ye. O tuma la masakɛ ye Absalɔm wele. O nana a ka so ka a ɲɛ biri duguma masakɛ ɲɛ kɔrɔ. Masakɛ ye Absalɔm da susu.