[1] San yɛlɛma tuma la, masakɛw bɛ taa kɛlɛ la tuma min na, Dawuda ye Joab ni a ka baaradenw ani Israɛl bɔnsɔn ka kɛlɛkɛ cɛw bɛɛ bila ka taa Amɔn bɔnsɔn tiɲɛn ka u sigi Raba da la, nka Dawuda tora Jerusalɛm.
[2] Don dɔ wula da fɛ Dawuda wulila ka bɔ a da yɔrɔ la ka i taamataama a ka sankanso san fɛ. A ye muso dɔ kotɔ ye. O cɛ tun ka ɲi kosɛbɛ.
[3] Dawuda ye ɲininkali kɛ ko o muso ye jɔn ye? A fɔra a ye ko: «O ye Eliam denmuso Bat-Seba ye, Hɛti bɔnsɔn Uri muso don.»
[4] Dawuda ye ci bila ka taa o muso wele. O muso nana Dawuda ka so. Dawuda dara a fɛ, o kɔ, a taara a ka so. O muso tun jɛyara ka bɔ a ka laada nɔgɔlenya la.
[5] O muso ye kɔnɔ ta. A y'a fɔ Dawuda ye ko: «Ne kɔnɔma don.»
[6] O tuma la Dawuda ye ci di Joab ma ko: «I ka Hɛti bɔnsɔn Uri ci ne ma.» O tuma la Joab ye Uri ci ka taa Dawuda fɛ yen.
[7] Uri selen yen, Dawuda y'a ɲininka Joab ni kɛlɛdenw ani kɛlɛ cogo la.
[8] O kɔ, masakɛ y'a fɔ a ye ko: «I ka taa i ka so ka i senw ko.» Uri bɔra masakɛ ka so kɔnɔ, masakɛ ye bonyali fɛn bila ka taa di a ma.
[9] Nka Uri y'i da ka sunɔgɔ masakɛ ka so da la, a makɛ ka baaradenw fɛ. A ma taa a ka so.
[10] A fɔra Dawuda ye ko: «Uri ma taa a ka so.» Dawuda y'a fɔ Uri ye ko: «Yala i ma na ka bɔ dugu taa la wa? Mun kosɔn i dun tɛ taa i ka so?»
[11] Uri ye Dawuda jaabi ko: «Layidu wagande ni Israɛl ni Juda bɔnsɔnw sigilen bɛ finisow kɔnɔ, ne matigi Joab ni ne matigi ka baaradenw sigilen bɛ kungo kɔnɔ, yala ne ka taa ne ka so ka dumuni kɛ ka minni kɛ ka ne da ne muso fɛ wa? Ka i ɲɛnama to, ka i to ni la, ne tɛna o kɛ fewu.»
[12] Dawuda y'a fɔ Uri ye ko: «I ka to yan bi, sini ne na i bila ka taa.» Uri tora Jerusalɛm o don ni o dugusajɛ.
[13] O kɔ, Dawuda y'a wele, a ye dumuni kɛ ka minni kɛ a ɲɛ kɔrɔ. Dawuda y'a fa dɔlɔ la, nka wula da fɛ Uri bɔra ka i da a dayɔrɔ la a makɛ ka baaradenw fɛ. A ma taa so.
[14] O dugusajɛ sɔgɔma da fɛ, Dawuda ye sɛbɛn dɔ kɛ ka o ci ka taa di Joab ma Uri bolo.
[15] Dawuda y'a fɔ o sɛbɛn la ko: «I ka Uri ci kɛlɛ juguman yɔrɔ la ka i yɔrɔ janya a la walisa a ka gosi ka faga.»
[16] Ayiwa, Joab y'a dɔn ko cɛ ja gɛlɛnw bɛ yɔrɔ min na, a ye Uri bila ka taa yen.
[17] Dugu kɔnɔ mɔgɔw bɔra ka bi Joab kan ka Dawuda ka kɛlɛ kuntigi dɔw faga. Hɛti bɔnsɔn Uri fana fagara.
[18] Ko minw kɛra kɛlɛ la, Joab ye ci bila ka taa olu fɔ Dawuda ye.
[19] A y'a fɔ o ciden ye ko: «I ka kɛlɛ kow bɛɛ ɲɛ fɔ masakɛ ye k'a foori.
[20] Ni masakɛ diminna k'a fɔ ko: ‹Mun y'a to aw ye aw madon dugu la k'a kɛlɛ? Yala aw m'a dɔn ko u bɛ aw bon ni biɲɛ ye ka u to dugu kogo san fɛ wa?›
[21] Ni a ko: ‹Jɔn ye Jerubesɛt denkɛ Abimelɛk faga? Aw m'a dɔn ko muso dɔ ye wuguden fili ka bɔ kogo san fɛ k'a bi a kun na ka a faga Tebɛz wa? Mun y'a to aw ye aw madon dugukogo la?› O tuma la i k'a fɔ a ye ko: ‹I ka baaraden Hɛti bɔnsɔn Uri fana sara.›»
[22] Ayiwa, ciden taara. A selen yen, Joab ye ci minw fɔ a ye, a ye olu bɛɛ fɔ Dawuda ye.
[23] Ciden y'a fɔ Dawuda ye ko: «O dugu kɔnɔ mɔgɔw barika tun ka bon ni an ta ye.
[24] Ka u to kogo kun na, u ye i ka baaradenw bon. Masakɛ ka baaraden dɔw sara, i ka baaraden Hɛti bɔnsɔn Uri fana sara.»
[25] Dawuda ye ciden jaabi ko: «I k'a fɔ Joab ye ko o ko kana a dusu kasi, sabu npan tɛ mɔgɔ bɔ mɔgɔ la k'a faga, ko a ka kɛlɛ juguya dugu kama k'a ci. I ka Joab ja gɛlɛya.»
[26] Uri muso y'a mɛn ko Uri sara minkɛ, a ye a cɛ su kasi.
[27] O su kasi donw tɛmɛnnen kɔ, Dawuda ye ci bila ka o muso wele ka taa a fɛ yen. A y'a furu, a ye denkɛ bange. Dawuda ye min kɛ, o ma diya Matigi ye.