[1] Matigi ye Dawuda tila ka bɔ a juguw bɛɛ ni Saul bolo tuma min na, Dawuda ye Matigi tanu ni nin dɔnkili ye ko:
[2] Matigi ye ne ka farakurun ye, ne ka kɛlɛ kunbɛn so ani ne tilabaa.
[3] Ne ka Ala ye ne dogo yɔrɔ farakurun ye, ne bɛ ne kalifa a ma. Ale de ye ne ka nɛgɛ bɛnnan ye, ne barika ni ne kisibaa don. Ne lamini kogo ni ne dogo yɔrɔ don, ne marabaa, e de ye ne tila fariya kow la.
[4] Ne bɛ pɛrɛn k'a fɔ ko: «Matigi ka tanu. Ne tilara ka bɔ ne juguw bolo.»
[5] Saya tun ye ne datugu i ko kɔgɔji kuruw, halakili ye ne ja tigɛ i ko ji woyoba.
[6] Ɔwɔ, kaburu sirilanw tun melekera ne la, saya jan tun ye ne minɛ.
[7] Ne degunnen ye Matigi tɔgɔ wele, ne ye ne ka Ala tɔgɔ wele. A ye ne kan mɛn k'a to a ka masaya so kɔnɔ, ne ka welekan donna a tulo la.
[8] O tuma la dugukolo yuguyugura ka yɛrɛyɛrɛ, sankolo jusigilanw yuguyugura. U yuguyugura k'a masɔrɔ Matigi diminna.
[9] Sisi bɔra a nunwow la ka yɛlɛn san fɛ. Tasuma bɔra a da la ka jenili kɛ ani takami pɛrɛnpɛrɛn.
[10] A ye sankolo jigin ka na, sankaba fin tun bɛ a sen kɔrɔ.
[11] A yɛlɛnnen tun bɛ serubɛn kan k'a pan, a nana fiɲɛ kamanfuraw kan.
[12] A ye dibi kɛ k'a lamini i ko finiso dibima, kabanɔgɔ ni sankaba jiman y'a datugu.
[13] Yeelenba min tun bɛ a ɲɛ, tamana bɔra o la.
[14] Matigi ye sankulukanba bɔ sankolo la, Kɔrɔtalenba ye a kan bɔ.
[15] A ye a ka biɲɛw bon ka ne juguw jɛnsɛn, a ye u gɛn ni san yɛgɛyɛgɛ ye.
[16] O tuma la kɔgɔji jukɔrɔlaw yera, diɲɛ jusigilanw bɔra kɛnɛkan, Matigi ka lasirannikan kosɔn, a nunfiɲɛ de y'o kɛ.
[17] Ala y'a to sanfɛ k'a bolo mɔɔnɔbɔ ka ne minɛ, a ye ne sama ka bɔ jiba cɛma.
[18] A ye ne tila ka bɔ ne jugu barikama bolo, ani ne koniyabaa minw barika tun ka bon ni ne ta ye.
[19] U bira ne kan ne degun don na, nka Matigi nana ne dɛmɛ.
[20] A ye ne hɔrɔnya, a ye ne kisi, a ka kanuyaba kosɔn ne ta fan fɛ.
[21] Matigi ye ne sara ka kɛɲɛ ni ne ka tilennenya ye, a ye ne sara ka kɛɲɛ ni ne bolo ka jɛlenya ye.
[22] K'a masɔrɔ ne ye ne jija ka Matigi ka sira taama, ne ma muruti ne ka Ala ma.
[23] A ka ci fɔlenw bɛɛ bɛ ne ɲɛ kɔrɔ, ne ma jɛngɛ ka mabɔ a ka sariyaw la.
[24] Ne kɛra jalakibali ye a ɲɛ kɔrɔ, ne ye ne yɛrɛ kɔlɔsi ko jugu kɛli ma.
[25] Ɔwɔ, Matigi ye ne sara ka kɛɲɛ ni ne ka tilennenya ye, ka kɛɲɛ ni ne ka jɛlenya ye a ɲɛ kɔrɔ.
[26] I bɛ i ka ɲumaya jira mɔgɔ ɲuman la, ka i ka tilennenya jira mɔgɔ tilennen na.
[27] I bɛ i ka jɛlenya jira mɔgɔ jɛlen na, nka i bɛ mɔgɔ tilenbali sara ka kɛɲɛ ni a ka tilenbaliya ye.
[28] I bɛ mɔgɔ majiginlenw kisi, nka i bɛ kuncɛbaw majigin.
[29] Ɔwɔ, Matigi, i ye ne ka kɛnɛyeelen ye, Matigi de bɛ yeelen bɔ ka ne ka dibi ban.
[30] Ne bɛ girin ka da kɛlɛbolo kan e de barika la, ne bɛ kogo sago ne ka Ala barika la.
[31] Ala ka siraw dafalen don, Matigi ka kumaw ye tiɲɛ ye. Minw bɛ u kalifa a ma, olu bɛɛ ka nɛgɛ bɛnnan don.
[32] Jɔn dun ye Ala ye ni Matigi tɛ? Jɔn ye farakurun ye ni an ka Ala tɛ?
[33] Ala ye ne ka kɛlɛ kunbɛn so barikama de ye, a bɛ ne ka siraw labɛn.
[34] A bɛ ne sen kɛ i ko minan sen, a bɛ ne mara yɔrɔ kɔrɔtalen na.
[35] A bɛ ne bolo barika bonya kɛlɛ la, fo ne bolo bɛ nsiranɛgɛ kala sama.
[36] I ye i ka kisili nɛgɛ bɛnnan di ne ma, i ka ɲumaya bɛ ne bonya.
[37] I ye sira bonya ne sen ye, ne sen tɛ cɛɛnɛ fewu.
[38] Ne na ne juguw nɔgɛn ka u halaki, ne tɛna kɔsegin sani ne ka u halaki ka u ban.
[39] Ne ye u halaki ka u ɲɔɲɔ, u ma se ka wuli tun, u bira ne sen kɔrɔ.
[40] I ye ne cɛ siri ni barika ye kɛlɛ kama, i ye ne juguw kuru ne ɲɛ.
[41] I y'a to ne juguw ka boli ne ɲɛ, ne na ne juguw halaki ka u ban.
[42] U ye fan bɛɛ filɛ, nka mɔgɔ si ma na u dɛmɛ. U kasira Matigi nɔ fɛ, nka a ma u jaabi.
[43] Ne ye u cɔngɔ i ko dugukolo buguri, ne ye u ɲɔɲɔ ka u foroki i ko sira kan bɔgɔ.
[44] I ye ne tila ka bɔ ne ka mɔgɔ murutilenw bolo, i ye ne ɲɛnatɔmɔ ka sigi siyaw kun na. Ne tun ma mɔgɔ minw dɔn, olu bɛ baara kɛ ne ye.
[45] Jamana wɛrɛ denw kɛra ne kan minɛbaaw ye, ni u ye ne kumakan mɛn, u bɛ kolo ne ye.
[46] Jamana wɛrɛ denw jigi bɛ tigɛ ka taa a fɛ, u yɛrɛyɛrɛtɔ na bɔ u ka kɛlɛ kunbɛn sow kɔnɔ.
[47] Matigi ɲɛnama don. Ne ka farakurun ka tanu. Ne kisili farakurun Ala ka kɔrɔta.
[48] Ala de bɛ ne mɔnɛbɔ. A bɛ siyaw kolo ne ye.
[49] A bɛ ne tila ne juguw la! I bɛ ne kɔrɔta ne juguw kun na, i bɛ ne kisi mɔgɔ farinmaw ma.
[50] O de kosɔn Matigi, ne na barika da i ye siyaw cɛma, ka i tɔgɔ tanuli dɔnkili da.
[51] Matigi bɛ se di a ka masakɛ ma, ka a ka ɲumaya jira a ka munlen na, Dawuda ni a bɔnsɔn nataw bɛɛ la.