[1] San saba kɔngɔba kɛra Dawuda tile la. Dawuda ye Matigi ɲininka, o y'a jaabi ko: «O kɔngɔba kɛra Saul ni a ka so ka joli bɔnnen kosɔn, k'a masɔrɔ a ye Gabaonkaw faga.»
[2] Masakɛ ye Gabaonkaw wele ka kuma u fɛ. Gabaonkaw tun tɛ Israɛl bɔnsɔn dɔw ye, Amɔr siya tɔ tolenw tun don. Israɛl bɔnsɔn tun ye layidu ta u ye ni kalili ye, o bɛɛ n'a ta Saul tun bɛ ɲini ka u ban katuguni a tun b'i jija walisa Israɛl bɔnsɔn ni Juda bɔnsɔn ka taa ɲɛ.
[3] Dawuda ye Gabaonkaw ɲininka ko: «Ne ka kan ka mun kɛ aw ye, o ko ka ɲɛnabɔ cogo di walisa aw ka dubaw kɛ Matigi ka ciyɛn ye?»
[4] Gabaonkaw y'a jaabi ko: «Wari ko ni sanu ko tɛ an ni Saul ka so cɛ. Jo tɛ an fɛ ka Israɛl bɔnsɔn mɔgɔ si faga fana.» Dawuda ye u jaabi ko: «Aw b'a fɛ ne ka mun kɛ aw ye?»
[5] U ye masakɛ jaabi ko: «Saul tun y'a latigɛ ko a bɛ an halaki ka an bɔ Israɛl bɔnsɔn cɛma.
[6] Ayiwa, a' ye Saul denkɛ wolonwula don an bolo, an ka olu minɛ ka u dulon Matigi ɲɛ kɔrɔ Matigi ka ɲɛnatɔmɔlen Saul ka dugu kɔnɔ Gibea.» Masakɛ ko: «Ne na olu don aw bolo.»
[7] Dawuda ye Saul denkɛ Jonatan denkɛ Mefibosɛt kisi a ka kalili kosɔn Matigi ɲɛ kɔrɔ, o kalili tun bɛ Dawuda ni Jonatan cɛ.
[8] Nka Aja denmuso Rizpa ye denkɛ fila minw bange Saul ye, Armoni ni Mefibosɛt kɔni, masakɛ ye olu minɛ ani Saul denmuso Merab denkɛ duuru, a ye olu minw bange Mehola Barzilai denkɛ Adriɛl ye.
[9] Dawuda ye olu don Gabaonkaw bolo. U ye olu dulon kulu kan Matigi ɲɛ kɔrɔ. U ye o wolonwula bɛɛ halaki ɲɔgɔn fɛ. Gabaonkaw ye olu faga suman tigɛ tuma la, orje suman tigɛ fɔlɔ waati la.
[10] O tuma la Aja denmuso Rizpa ye bɔrɛ dɔ ta ka o da fara dɔ sanfɛ ka i sigi o suma kɔrɔ k'a daminɛ suman tigɛ tuma la fo ka taa se sanji fɔlɔ bili ma a kan. A tun bɛ kɔnɔw bali, u kana sigi o suw kan tile fɛ ka kungo kɔnɔ waraw gɛn u la su fɛ.
[11] Aja denmuso Rizpa, Saul ka jɔnmuso ye min kɛ, o fɔra Dawuda ye.
[12] O tuma la Dawuda taara Saul ni a denkɛ Jonatan kolow minɛ Jabɛs Galadkaw fɛ. Olu tun taara u cɛ Bɛt-San, u faga yɔrɔ la Filisitikaw fɛ u ka se sɔrɔ don na Saul kan Gilboa.
[13] A ye Saul ni a denkɛ Jonatan kolow cɛ ka bɔ Jabɛs. Minw tun dulonna, u ye olu fana kolow cɛ ka taa olu ni Saul ni a denkɛ Jonatan kolow don Benjamɛn jamana la Zela, Saul fa Kis ka kaburu kɔnɔ. Masakɛ tun ye fɛn o fɛn fɔ, u ye o bɛɛ kɛ. O kɔ, Ala ye u ka delili lamɛn jamana ko la.
[15] Kɛlɛ wɛrɛ kɛra Filisitikaw ni Israɛl bɔnsɔn cɛ. Dawuda taara ni a ka kɛlɛkɛ cɛw ye ka kɛlɛ labɛn Filisitikaw kama. Dawuda tun sɛgɛnna.
[16] Nsiranɛgɛ tama tun bɛ Rafa bɔnson Jisbi-Benɔb bolo. O tamakisɛ tun ka girin kilo saba ye. Npan kura dɔ sirilen tun bɛ a cɛ la. A ko a bɛ Dawuda faga,
[17] nka Zeruja denkɛ Abisai nana Dawuda dɛmɛ ka o Filisitika gosi ka a faga. O kɛlen kɔ, Dawuda fɛ cɛw y'u kali k'a fɔ a ye ko: «I tɛna bɔ ka taa an fɛ kɛlɛ la tun walisa o kana na Israɛl bɔnsɔn ka lanpa faga.»
[18] O tɛmɛnnen kɔ, u ye Filisitikaw kɛlɛ Gob. Husa bɔnsɔn Sibekai ye Saf faga yen, Rafa bɔnsɔn dɔ don.
[19] U ye Filisitikaw kɛlɛ ko kura Gob. Jare-Oregim denkɛ Elkanan ye Gat Goliati faga. Goliati ka tama kala tun bɛ i ko gese dalaw ka bankalama.
[20] Kɛlɛ wulila ko kura Gat. Cɛ jamanjan dɔ tun bɛ o la. Bolonkɔni wɔɔrɔ tun bɛ a bolow bɛɛ kelen-kelen na, sennkɔni wɔɔrɔ tun bɛ a senw bɛɛ kelen-kelen na. O bɛɛ lajɛlen tun ye mugan ni naani ye. Rafa bɔnsɔn tun don.
[21] O cɛ ye Israɛl bɔnsɔn mafiɲɛya tuma min na, Dawuda kɔrɔkɛ Simea denkɛ Jonatan ye o faga.
[22] O Filisitika cɛ naani bangera Gat, Rafa bɔnsɔnw tun don. Dawuda ni a ka baaradenw ye u halaki.