[1] O kɔ, Dawuda ye Matigi ɲininka ko: «Ne ka taa Juda ka dugu dɔ la wa?» Matigi y'a jaabi ko: «I ka taa.» Dawuda ko: «Ne ka taa dugu jumɛn la?» Matigi y'a jaabi ko: «Heborɔn.»
[2] Dawuda ni a muso fila taara ɲɔgɔn fɛ, Akinoam min bɔra Jizreɛl ani Nabal muso kɔrɔ Abigail min bɔra Karmɛl.
[3] Dawuda ni a fɛ cɛw fana taara. Olu bɛɛ ni u ka denbaya tun don. U y'u sigi Heborɔn kɛrɛ fɛ duguw la.
[4] Juda cɛw taara Heborɔn ka Dawuda mun k'a kɛ Juda bɔnsɔn ka masakɛ ye. A fɔra Dawuda ye ko Jabɛs Galadkaw ye Saul su don.
[5] O tuma la Dawuda ye cidenw ci olu ma k'a fɔ u ye ko: «Aw minw ye ko ɲuman kɛ ka aw matigi Saul su don, Matigi ka duba aw ye.
[6] Aw ye ko ɲuman min kɛ, Matigi ka o ɲɔgɔn kɛ aw ye ni kantigiya ye. Ne fana na ko ɲuman kɛ aw ye o kosɔn.
[7] Sisan aw ka kɛ mɔgɔ bolo barikama ja gɛlɛnw ye, k'a masɔrɔ aw matigi Saul sara. Juda ka so ye ne mun ka kɛ u ka masakɛ ye.»
[8] Ayiwa Ner denkɛ Abinɛr min tun ye Saul ka kɛlɛbolo kuntigi ye, o ye Saul denkɛ Isbosɛt ta ka taa n'a ye Mahanayim,
[9] k'a kɛ Galad mara ani Asurkaw ni Jizreɛl ni Efrayim ni Benjamɛn bɔnsɔn ani Israɛl bɔnsɔn bɛɛ ka masakɛ ye.
[10] Saul denkɛ Isbosɛt si tun ye san binaani ye a sigi tuma la ka kɛ Israɛl bɔnsɔn ka masakɛ ye. A ye san fila kɛ Israɛl bɔnsɔn kun na. Nka Juda bɔnsɔn nɔrɔlen tun bɛ Dawuda la.
[11] Dawuda ye san wolonwula ni kalo wɔɔrɔ kɛ masaya la Juda bɔnsɔn kun na Heborɔn.
[12] Ayiwa Ner denkɛ Abinɛr ni Saul denkɛ Isbosɛt ka kɛlɛkɛ cɛw bɔra Mahanayim ka taa Gabaon kama.
[13] Zeruja denkɛ Joas ni Dawuda ka kɛlɛkɛ cɛw fana bɔra. U ye ɲɔgɔn kunbɛn dala dɔ da la Gabaon kɛrɛ fɛ ka u sigi o ji fan fila la. Kulu kelen y'i sigi o ji fan kelen fɛ, tɔ kelen y'i sigi a fan dɔ fɛ.
[14] O tuma la Abinɛr y'a fɔ Joab ye ko: «Kamalenw ka u madon ka ɲɔgɔn kɛlɛ an ɲɛ na.» Joab ko: «U ka u madon.»
[15] O tuma la u wulila ka u madon, u bɛɛ dama tun ka kan. Benjamɛn bɔnsɔn Saul denkɛ Isbosɛt ta tun ye tan ni fila ye. Dawuda taw tun ye tan ni fila fana ye.
[16] U bɛɛ kelen-kelen ye ɲɔgɔn kunkolo minɛ ka u ka npan turu ɲɔgɔn kɛrɛ la, u bɛɛ bira ɲɔgɔn fɛ. O yɔrɔ tɔgɔ dara ko: «Npan ka Foro.» O bɛ Gabaon kɛrɛ fɛ.
[17] Kɛlɛ juguyara o don na. Dawuda ka kɛlɛkɛ cɛw ye Abinɛr ni a ka kɛlɛkɛ cɛw gosi.
[18] Zeruja denkɛ saba tun bɛ yen, olu tun ye Joab ni Abisai ani Asaɛl ye. Asaɛl sen tun ka di i ko kungo kɔnɔ minan.
[19] A ye Abinɛr nɔgɛn, a ma fara ka taa kinin wala numan fɛ ka bɔ a nɔ fɛ.
[20] O tuma la Abinɛr y'i kɔ filɛ k'a fɔ ko: «E don wa, Asaɛl?» O ko: «Ne don.»
[21] Abinɛr y'a fɔ a ye ko: «I ka tɛmɛn kinin fɛ wala numan fɛ ka kamalen dɔ kɛlɛ ka o ka fɛnw minɛ.» Nka Asaɛl tun t'a fɛ ka bɔ a kɔ.
[22] Abinɛr y'a fɔ Asaɛl ye tun ko: «I ka segin ka bɔ ne kɔ. Mun y'a to i bɛ ne karaba ka i gosi ka i bi duguma? Ni o kɛra, ne na se ka i balimakɛ Joab ɲɛda filɛ cogo di?»
[23] A ma sɔn ka i mabɔ minkɛ, Abinɛr y'a sɔgɔ ni tama ye a kɔnɔbara la fo ka bɔ a kɔ fɛ. Asaɛl bira yen ka sa yɔrɔ nin kelen. Minw sera a bi yɔrɔ la, olu bɛɛ y'u jɔ yen.
[24] Joab ni Abisai ye Abinɛr nɔgɛn. U sera Ama tintin da fɛ ka bɛn tile bi da ma, o bɛ Giak kuntilenna la Gabaon kungokolon sira la.
[25] Benjamɛn bɔnsɔn ye ɲɔgɔn lajɛ Abinɛr kɔrɔ ka u kɛ kulu kelen ye ka u jɔ tintin san fɛ.
[26] O tuma la Abinɛr pɛrɛnna Joab fɛ k'a fɔ a ye ko: «Npan tɛna fagali dabila wa? I m'a dɔn ko nin ko laban na juguya wa? I t'a fɔ i ka kɛlɛkɛ cɛw ye ko u ka u balimaw nɔgɛnni dabila wa?»
[27] O tuma la Joab y'a jaabi ko: «Matigi ɲɛnama tɔgɔ kosɔn, ni i tun ma fɛn fɔ, mɔgɔw tun tɛna u balimaw nɔgɛnni dabila sani sɔgɔma cɛ.»
[28] O tuma la Joab ye buru fyɛ, mɔgɔw bɛɛ y'u jɔ. U ye Israɛl bɔnsɔn nɔgɛnni dabila ka kɛlɛ ban.
[29] Abinɛr ni a fɛ cɛw ye o su bɛɛ kɛ taama la ka jɛkɛnɛ cɛ tigɛ. U ye Jurdɛn ba tigɛ ka Bitron cɛ tigɛ ka taa se Mahanayim.
[30] Joab fana nana ka bɔ Abinɛr nɔgɛn yɔrɔ la. A ye Dawuda ka kɛlɛkɛ cɛw bɛɛ lajɛ, cɛ tan ni kɔnɔntɔn y'u jɛ, Asaɛl sen tun t'o la.
[31] Nka Dawuda ka kɛlɛkɛ cɛw tun ye cɛ kɛmɛ saba ni biwɔɔrɔ faga Benjamɛn bɔnsɔn Abinɛr ka kɛlɛkɛ cɛw la.
[32] U taara ni Asaɛl ye ka o su don a fa ka kaburu kɔnɔ Bɛtilɛhɛm. O kɔ, Joab ni a fɛ cɛw ye su bɛɛ kɛ taama la. U sera Heborɔn ka bɛn dugu jɛ ma.