[1] Matigi ye Natan ci ka taa Dawuda fɛ yen. Natan taara Dawuda ɲɛ kɔrɔ k'a fɔ a ye ko: «Cɛ fila tun bɛ dugu dɔ la, o kelen tun ye nafolotigi ye, kelen tun ye sɛgɛnbaatɔ ye.
[2] Saga caman ni misi caman tun bɛ fɛntigi fɛ.
[3] Nka foyi tun tɛ sɛgɛnbaatɔ bolo sagaden musoma kelen kɔ. A tun ye o san ka o balo. O sagaden mɔna sɛgɛnbaatɔ ka so a ka denmisɛnw fɛ. A tun bɛ dumuni kɛ o cɛ fɛ ka minni kɛ a ka jifilen na. A tun bɛ sunɔgɔ o cɛ disi la. O sagaden tun bɛ o cɛ bolo i n'a fɔ a yɛrɛ denmuso.
[4] Ayiwa, dunan dɔ jiginna fɛntigi ka so. A tun t'a fɛ ka maga a ka sagaw ni a ka misiw si la ka u faga a ka dunan ye. Nka o nafolotigi taara sɛgɛnbaatɔ ka sagaden kelen minɛ k'a faga a ka dunan ye.»
[5] O tuma la Dawuda diminna kosɛbɛ haali, k'a fɔ Natan ye ko: «Matigi ɲɛnama tɔgɔ kosɔn, o kɛbaa ka kan ka faga.
[6] A ka o saga ɲɔgɔn naani segin o tigi ma a ka hinɛbaliya ni a ka juguya kosɔn.»
[7] O tuma la Natan y'a fɔ Dawuda ye ko: «E yɛrɛ ye o cɛ ye. Matigi, Israɛl ka Ala ko: ‹Ne ye i mun ka i kɛ Israɛl bɔnsɔn ka masakɛ ye ka i tila ka bɔ Saul bolo.
[8] Ne ye i kuntigi ka so ni i kuntigi ka musow don i bolo ka i sigi ka i kɛ Israɛl bɔnsɔn kuntigi ye. Ni o tun ma i wasa, ne tun na fɛn wɛrɛ fara o kan.
[9] Mun kosɔn i ye Matigi ka kuma mafiɲɛya ka ko jugu kɛ a ɲɛ kɔrɔ? I ye Hɛti bɔnsɔn Uri faga ni npan ye, ka a muso ta k'a kɛ i yɛrɛ muso ye. I ye ale faga ni Amɔn bɔnsɔn ka npan ye.
[10] O de y'a to npan tɛna fagali dabila i ka so tun, k'a masɔrɔ i ye ne mafiɲɛya ka Hɛti bɔnsɔn Uri muso ta walisa o ka kɛ i muso ye.›
[11] Matigi ko: ‹Ne na tɔɔrɔ lase i ma ka bɔ i yɛrɛ ka so. Ne na i musow ta i yɛrɛ ɲɛ na ka olu di i ka mɔgɔ dɔ ma. O na da i musow fɛ kɛnɛkan.
[12] I ye o kɛ dogo la, nka ne na nin kɛ kɛnɛkan Israɛl bɔnsɔn bɛɛ ɲɛ na.›»
[13] O tuma la Dawuda y'a fɔ Natan ye ko: «Ne ye jurumu kɛ ka Matigi hakɛ ta.» Natan ye Dawuda jaabi ko: «A filɛ, Matigi ye i ka jurumu yafa i ma, i tɛna sa tun,
[14] nka o ko jugu kosɔn i ye cogo di Matigi juguw ma ka a mafiɲɛya. O de kosɔn, den min bangera i ye, o na sa.»
[15] O tuma la Natan seginna ka taa a ka so. Awiya, Uri muso ye den bange Dawuda ye, Matigi ye o gosi. A banana kosɛbɛ.
[16] Dawuda ye Ala deli o den kosɔn ka sun don. O kɔ, a donna a ka so ka i da duguma ka si yen.
[17] Dawuda ka so kɔnɔ cɛkɔrɔbaw wulila ko u b'a lawuli k'a bɔ duguma, nka a ma sɔn, a ma dumuni kɛ u fɛ fana.
[18] A tile wolonwulanan don na den sara. Dawuda ka baaradenw siranna, u ma sɔn k'a fɔ Dawuda ye ko den sara, sabu u tun b'a fɔ ɲɔgɔn ye ko: «Ka den ɲɛnama to an kumana a fɛ, a ma an lamɛn. An dun bɛ se k'a fɔ a ye cogo di ko den sara? A na bɔnɛ lase a yɛrɛ ma.»
[19] Nka Dawuda y'a kɔlɔsi ko a ka baaradenw bɛ dogodogoni kuma la minkɛ, a y'a faamu ko den sara. O tuma la a y'a fɔ a ka baaradenw ye ko: «Den sara wa?» U y'a jaabi ko: «Ɔwɔ, a sara.»
[20] O tuma la Dawuda wulila ka bɔ duguma ka i ko ka i mun ni tulu suma duman ye ka a ka finiw yɛlɛma ka taa Matigi ka so kɔnɔ ka i bi k'a ɲɛ biri duguma k'a bato. O kɔ, a seginna a ka so k'a fɔ ko u ka na ni dumuni ye. A ye dumuni kɛ.
[21] Dawuda ka baaradenw y'a ɲininka ko: «I dun ye mun kɛ tan? Ka den ɲɛnama to, i ye sun don ka kasi den kosɔn. Ayiwa sisan den sara, i wulila ka dumuni kɛ.»
[22] A y'u jaabi ko: «Ka den ɲɛnama to ne ye sun don ka kasi sabu ne tun y'a fɔ ne yɛrɛ kɔnɔ ko jɔn y'a dɔn ni Matigi tɛna hinɛ ne la ka den kɛnɛya.
[23] Nka sisan a sara, mun kosɔn ne bɛ sun don tun? Yala ne bɛ se ka a lasegin tun wa? Ne kɔni na taa ale fɛ yen, nka ale tɛna na ne fɛ yan tun.»
[24] Dawuda ye a muso Bat-Seba dusu saalo ka don a fɛ. O ye denkɛ bange Dawuda ye, a ye o tɔgɔ da ko Solomani. Solomani ko diyara Matigi ye.
[25] A ye kira Natan ci ka taa o den tɔgɔ da ko Jedidiya, sabu Matigi tun b'a kanu.
[26] Joab taara Amɔn bɔnsɔn kama ka daga Raba da la ka taa masakɛ ka yɔrɔ minɛ.
[27] O tuma la a ye cidenw bila ka taa Dawuda sɛgɛrɛ k'a fɔ a ye ko: «Ne ye Raba minɛ ka dugu jiman yɔrɔ minɛ.
[28] Ayiwa i ka mɔgɔ tɔw lajɛ, olu ka na ka daga dugu da la k'a minɛ, walisa ne kana na a minɛ ka o bonya sɔrɔ ne yɛrɛ ye.»
[29] O tuma la Dawuda ye jama bɛɛ lajɛ ka taa Raba kama ka bi a kan k'a minɛ.
[30] A ye Amɔn bɔnsɔn ka masakɛ ka masafugula minɛ ka bɔ o kun na. O sanu fugula peselen tun ka ca kilo bisaba ye. Kabakurun sɔngɔ gɛlɛn tun kɛra k'a masiri. U y'o don Dawuda kun na. Dawuda taara ni o, ni fɛn cɛlenw caman ye.
[31] A ye o mɔgɔw bila diyagoya baara la ka jiri si ka kabakurun dɛsɛ ka jele dila ani ka biriki jeni furunɔ dila. U ye Amɔn bɔnsɔn ka duguw bɛɛ kɛ ten. O kɔ, Dawuda ni a fɛ mɔgɔw bɛɛ seginna ka taa Jerusalɛm.