[1] Masakɛ Dawuda sigira a ka masaya so kɔnɔ, Matigi y'a mara k'a tila a lamini juguw bɛɛ la tuma min na,
[2] o tuma la, masakɛ y'a fɔ kira Natan ye ko: «A filɛ, ne sigilen bɛ nin masaya yɔrɔ la sedere jiri so kɔnɔ k'a sɔrɔ Ala ka wagande sigilen bɛ finiso kɔnɔ.»
[3] Natan y'a fɔ masakɛ ye ko: «Fɛn o fɛn bɛ i dusu la, i ka taa o kɛ, katuguni Matigi bɛ i fɛ.»
[4] Nka su fɛ Matigi kumana Natan fɛ ko:
[5] «I ka taa a fɔ ne ka baaraden Dawuda ye ko, Matigi ko: ‹Yala e de bɛ so jɔ ne ye walisa ne ka sigi o kɔnɔ wa?
[6] I y'a dɔn ko kabini ne ye Israɛl bɔnsɔn labɔ Misira jamana la fo ka na se bi ma, ne ma sigi so si kɔnɔ nka ka ne to yaala la Israɛl bɔnsɔn fɛ, finiso kɛra ne sigi yɔrɔ ye.
[7] Ka ne to Israɛl bɔnsɔn cɛma u taama yɔrɔw bɛɛ la, o siyaw la kuntigi minw ɲɛnatɔmɔna ne fɛ, ne y'a fɔ o jumɛn ye ko a ka sedere jiri so jɔ ne ye ka kɛ batoli so ye?›
[8] «Ayiwa sisan i k'a fɔ ne ka baaraden Dawuda ye ko, Kɛlɛbolow Matigi ko: ‹Ne ye i ɲɛnatɔmɔ ka bɔ sagagɛn yɔrɔ la ka bɔ sagaw nɔ fɛ walisa i ka kɛ ne ka mɔgɔw Israɛl bɔnsɔn ɲɛminɛbaa ye.
[9] Ne tora i fɛ i ka ko kɛtaw bɛɛ la. Ne ye i juguw bɛɛ gɛn ka bɔ i ɲɛ, ka i kɛ i ko mɔgɔ tɔgɔba minw bɛ dugukolo kan.
[10] Ne ye yɔrɔ labɛn ne ka mɔgɔw Israɛl bɔnsɔn ye ka u lasigi yen. U sigira u ka so, foyi tɛna u lasiran yen tun. Mɔgɔ juguw tɛna u tɔɔrɔ tun i ko a tun bɛ kɛ cogo min na ka kɔrɔ,
[11] i ko min kɛra waati tɛmɛnnenw na, ne ye kiritigɛlaw sigi ne ka mɔgɔw Israɛl bɔnsɔn kun na waati min na. Ne ye lafiya di i ma ka i tila ka bɔ i juguw bolo. Matigi yɛrɛ y'a fɔ ko ale yɛrɛ bɛ na so jɔ i ye.
[12] Ni i ka waati dafara ka kafo i bɛnbaw kan tuma min na, ne na i yɛrɛ denkɛ dɔ ɲɛnatɔmɔ ka o sigi i nɔ na ka kɛ masakɛ ye. Ne na a ka masaya sabati.
[13] O de na so jɔ ka ne tɔgɔ da a kan. Ne na a ka masasigilan ni a ka masaya sabati badaa.
[14] Ne na kɛ ale Fa ye, ale na kɛ ne denkɛ ye. Ni a ye ko jugu kɛ, ne na mɔgɔ wɛrɛ bila k'a kolo i ko fa bɛ a denkɛ gosi cogo min na.
[15] Nka ne tɛna ne ka nɛɛma bɔsi a la i ko ne y'a bɔsi Saul la cogo min na ka o gɛn ka bɔ ne ɲɛ kɔrɔ.
[16] Masaya tɛna ban i ka so kɔnɔ tuma si, i ka masaya na to badaa.›»
[17] Natan taara o kow bɛɛ ni o yeli fɛn bɛɛ ɲɛ fɔ Dawuda ye.
[18] O tuma la masakɛ Dawuda donna ka i sigi Matigi ɲɛ kɔrɔ k'a fɔ a ye ko: «Matigi Ala, ne ye jɔn ye, ne ka gwa fana ye mun ye fo ka se nin yɔrɔ la?
[19] Matigi Ala, i ye min kɛ ka ban, o ma i wasa fo i bɛ kuma ka don jan ko fɔ i ka baaraden ka so ko la. Matigi Ala, ne min ye mɔgɔ ye, i bɛ sɔn ka nin kow jira ne la.
[20] Dawuda bɛ se ka mun fɔ i ye ka tɛmɛn nin kan, k'a masɔrɔ, Matigi Ala, e bɛ i ka baaraden dɔn.
[21] I ka kuma ni i ka kanuyaba kosɔn, i ye nin kobaw kɛ i ka baaraden ye.
[22] O de kosɔn, Matigi Ala, i ka bon. Mɔgɔ si tɛ i ko e. Ala wɛrɛ si tɛ i kelen kɔ ka kɛɲɛ ni an tulow ka ko mɛnnenw ye.
[23] Dugukolo kan siya jumɛn bɔlen bɛ i ka siya Israɛl fɛ? Ala, i nana i ka mɔgɔw tila walisa i tɔgɔ ka bonya, ka koba kabakomaw kɛ u ni u ka jamana ye walisa i tɔgɔ ka jɛnsɛn. I ye siya wɛrɛw ni u ka bato fɛnw gɛn ka bɔ i ka siya ɲɛ, i ye olu minw kunmabɔ ka bɔ Misira jamana la walisa u ka kɛ i taw ye.
[24] K'a masɔrɔ i ye barika di i ka mɔgɔw Israɛl bɔnsɔn ma walisa u ka kɛ i ka mɔgɔw ye badaa. E, Matigi, i kɛra u ka Ala ye.
[25] «Matigi Ala, sisan i ye kuma min fɔ i ka jɔnkɛ ni a ka so ko la, i ka o sabati badaa ka i ka kuma fɔlen kɛ.
[26] I tɔgɔ ka bonya badaa fo mɔgɔw k'a fɔ ko: ‹Kɛlɛbolow Matigi ye Israɛl ka Ala ye.› I ka baaraden Dawuda ka so ka barika sɔrɔ i ɲɛ kɔrɔ.
[27] Ayiwa, e yɛrɛ, Kɛlɛbolow Matigi, Israɛl bɔnsɔn ka Ala, i ye nin layidu ta ne, i ka baaraden ye, ko i na so jɔ ne ye. O de kosɔn ne ye ja gɛlɛya sɔrɔ ka nin delili kɛ.
[28] «Sisan, Matigi Ala, i ye Ala ye, i ka kumaw ye tiɲɛ ye. I ye nin nɛɛma layidu ta i ka baaraden ye.
[29] Ne b'i deli, i ka duba ta i ka baaraden ka so ye, walisa a ka to i ɲɛ kɔrɔ badaa, k'a masɔrɔ Matigi Ala, e de kumana. I ka baaraden ka so na duba sɔrɔ i ka kuma la badaa.»