[1] Dawuda tɛmɛnna kulu kuncɛ la dɔɔnin, Mefibosɛt ka jɔnkɛ Ziba nana a kunbɛn ni fali fila doninen ye dumuni fɛn caman na. Buurukun kɛmɛ fila ni rezɛn tusuu jalen kɛmɛ ani toroden mɔ kɛmɛ ani diwɛn foroko kelen tun bɛ o faliw la.
[2] Masakɛ y'a fɔ Ziba ye ko: «I bɛ mun kɛ ni olu ye?» Ziba y'a jaabi ko: «Masakɛ ka so mɔgɔw ka yɛlɛn nin faliw kan, buuru ni jiridenw na kɛ kamalenw ka dumuni ye. Ni minw sɛgɛnna kungo kɔnɔ, olu na lafiya ni diwɛn ye.»
[3] Masakɛ ye ɲininkali kɛ ko: «I kuntigi denkɛ bɛ min?» Ziba y'a jaabi ko: «A tora Jerusalɛm k'a masɔrɔ a ko, Israɛl bɔnsɔn na a fa ka masaya kɔsegin a ma bi.»
[4] O tuma la masakɛ y'a fɔ Ziba ye ko: «Ayiwa, ne na Mefibosɛt ka fɛnw bɛɛ di i ma.» Ziba ko: «Ne filɛ i sen kɔrɔ. Ne ka ko ɲuman sɔrɔ ne matigi masakɛ ɲɛ kɔrɔ.»
[5] Masakɛ Dawuda taara se Bakurim. A ye mɔgɔ dɔ bɔtɔ ye, o tun ye Saul ka so mɔgɔ dɔ ye, a tɔgɔ ko Simei, Gera denkɛ don. O y'i madon ka nenili kɛ,
[6] ka Dawuda ni a ka baaradenw bon ni kabakurunw ye, hali k'a sɔrɔ mɔgɔ bɛɛ ni kɛlɛkɛ cɛ ja gɛlɛnw bɛɛ tun ye masakɛ lamini a kinin ni a numan fɛ.
[7] Simei ye Dawuda neni ko: «Taa yen fɛ, taa yen fɛ, mɔgɔ fagala, kojugukɛla.
[8] Matigi ye Saul ka so joli hakɛ bɔ i la, i ye o min ka masaya bɔsi a la. Matigi ye masaya don i denkɛ Absalɔm bolo. I ka i yɛrɛ filɛ tɔɔrɔ la sa, katuguni i ye mɔgɔ fagala ye.»
[9] O tuma la Zeruja denkɛ Abisai y'a fɔ masakɛ ye ko: «Mun kosɔn o wulusu bɛ na ne matigi masakɛ neni? A to ne ka taa a kunkolo tigɛ.»
[10] Nka masakɛ y'a jaabi ko: «Ne ye mun kɛ aw la, Zeruja denkɛw? A to a ka ne neni, Matigi de y'a fɔ a ye ko: ‹I ka Dawuda neni!› Jɔn bɛ se k'a fɔ ko: ‹Mun kosɔn i bɛ nin kɛ?›»
[11] O kɔ, Dawuda y'a fɔ Abisai ni a ka baaradenw bɛɛ ye ko: «Aw yɛrɛ ɲɛ b'a la ko ne denkɛ yɛrɛ min bɔra ne la, o b'a fɛ ka ne faga, janko nin Benjamɛn bɔnsɔn. A' ye a to a ka nenili kɛ, sabu Matigi de y'a bila o la.
[12] A dɔrɔ Matigi na miiri ne ka tɔɔrɔ ko la ka hɛrɛ kɛ ne ye, ne ye tɔɔrɔ min sɔrɔ bi, ka o yɛlɛma ka kɛ hɛrɛ ye.»
[13] Dawuda ni a fɛ cɛw ye sira minɛ ka taa, Simei ye kulu sira minɛ u kɛrɛ fɛ ka taa. Ka u to taama la ka taa, a b'a la ka Dawuda danga, ka Dawuda bon ni kabakurunw ye ka buguri seri san fɛ.
[14] Ayiwa masakɛ ni a fɛ mɔgɔw sɛgɛnnen sera Jurdɛn ba da la. U ye u lafiya yen.
[15] O waati la Absalɔm tugulen tun bɛ a ka kɛlɛkɛ cɛw Israɛl bɔnsɔn nɔ fɛ ka taa don Jerusalɛm. Akitofɛl fana taara a fɛ.
[16] Dawuda terikɛ Husai min bɔra Arka, o sera Absalɔm ma tuma min na, a y'a fɔ Absalɔm ye ko: «Masakɛ ka si sɔrɔ! Masakɛ ka si sɔrɔ!»
[17] Absalɔm y'a fɔ Husai ye ko: «I bɛ mun kanntanya kɛ i terikɛ Dawuda la? Mun y'a to i ma taa i terikɛ fɛ?»
[18] Husai ye Absalɔm jaabi ko: «Ayi, nka Matigi ye mɔgɔ min ɲɛnatɔmɔ, ne ye o de ta ye. Nin mɔgɔw bɛɛ kosɔn ani Israɛl mɔgɔw bɛɛ kosɔn, ne na to o de fɛ.
[19] Ne na baara kɛ jɔn ye ni o tɛ? Masakɛ denkɛ, i m'a dɔn ko ne na baara kɛ i ye i ko ne ye baara kɛ i fa ye cogo min na wa?»
[20] O tuma la Absalɔm y'a fɔ Akitofɛl ye ko: «Aw ka ɲɔgɔn ye ka ko dɔ latigɛ an ka kan ka min kɛ.»
[21] Akitofɛl ye Absalɔm jaabi ko: «I fa ye a ka jɔnmuso minw bila ka a ka so kɔlɔsi, i ka taa don olu fɛ. Israɛl mɔgɔw bɛɛ n'a dɔn ko i ye i fa dusu kasi. Mɔgɔ minw bɛ i fɛ, olu barika na bonya.»
[22] U ye gwa jɔ so kun na Absalɔm ye. Absalɔm taara don a fa ka jɔnmusow fɛ Israɛl bɔnsɔn bɛɛ ɲɛ na.
[23] O waati la ɲɛjirali minw tun bɛ di Akitofɛl fɛ, olu tun bɛ jate i ko Ala ka kuma yɛrɛ. Dawuda ni Absalɔm bɛɛ tun bɛ Akitofɛl ka kuma jate kosɛbɛ.