[1] Dawuda ka kuma labanw filɛ ninw ye. Isayi denkɛ Dawuda ka dɔnkili. Cɛ min kɔrɔtara sanfɛ, o ka dɔnkili don, mɔgɔ min ɲɛnatɔmɔna Yakuba ka Ala fɛ, Israɛl bɔnsɔn ka dɔnkili dala ɲuman.
[2] Matigi Ni kumana ne da la, a ka kuma bɛ ne nɛnkun na.
[3] Israɛl bɔnsɔn ka Ala kumana, Israɛl bɔnsɔn ka farakurun y'a fɔ ne ye ko: «Mɔgɔ min bɛ mɔgɔ mara ni tilennenya ye, mɔgɔ min bɛ marali kɛ ni Ala ɲɛsiran ye,
[4] o tigi bɛ i ko kɛnɛbɔda kɛnɛ tile bɔ tuma la, a bɛ i ko sɔgɔma da kɛnɛ ni sankaba tɛ yen, a yeelen bɛ bin falen dugukolo kan sanji nalen kɔ.»
[5] Ala ye ne ka so kɛ o cogo la, k'a masɔrɔ a ye layidu wulibali ta ne ye, layidu dafalen kantigima maralen. Ɔwɔ, a bɛ kisili ni fɛn ɲuman bɛɛ di ne ma, i ko bin nugu.
[6] O bɛɛ n'a ta mɔgɔ juguw bɛ i ko ŋɔni min bɛ fili yɔrɔ jan, mɔgɔ tɛ se ka u minɛ a bolo la.
[7] Mɔgɔ min bɛ u minɛ, o tigi mago bɛ nɛgɛ wala tama kala la, u na jeni ni tasuma ye ka u to u ka yɔrɔ la.
[8] Kɛlɛkɛ cɛ minw ye baara kɛ Dawuda ye, olu tɔgɔw filɛ ninw ye: Josɛb-Basebɛt min bɔra Takemɔn, o tun ye masakɛ ka kɛlɛbolow kuntigiba dɔ ye. Ale de ye cɛ kɛmɛ segin faga ni a ka tama ye yɔrɔ nin kelen.
[9] Akosi bɔnsɔn Dodo denkɛ Eleazar dara ale kan. O tun ye Dawuda ka kɛlɛkɛ cɛ ja gɛlɛn saba la kelen ye. Filisitikaw ye ɲɔgɔn lajɛ kɛlɛ kama tuma min na, Dawuda ni o cɛ saba ye olu mafiɲɛya, k'a sɔrɔ Israɛl cɛ tɔw bɛɛ tun taara.
[10] Eleazar wulila ka Filisitikaw gosi fo k'a bolo jalen nɔrɔ a ka npan na. Matigi ye se di Israɛl bɔnsɔn ma o don na. Mɔgɔ tɔw kɔseginna ka bɔ Eleazar nɔ fɛ kɛlɛ la ka mɔgɔ fagalenw wɔrɔn ka u ka fɛnw cɛ.
[11] Age denkɛ Sama dara ale kan. O ka dugu tun ye Harar ye. Filisitikaw tun ye u ka kɛlɛbolow lajɛ shɔ foro dɔ la yen. Israɛl bɔnsɔn bolila Filisitikaw ɲɛ.
[12] Nka Sama y'i jɔ o shɔ foro cɛmancɛ la ka Filisitikaw bali. A ye u faga. Matigi ye se di a ma.
[13] Kuntigi bisaba la mɔgɔ saba bɔra ka taa Dawuda sɛgɛrɛ suman tigɛ tuma la Adulam kuluwo kɔnɔ. Filisitikaw ka daga sigilen tun bɛ Refaim jɛkɛnɛ la.
[14] Dawuda tun bɛ a dogo yɔrɔ la. Filisitikaw ka kɛlɛdenw sigilen tun bɛ Bɛtilɛhɛm o tuma la.
[15] Minnɔgɔ tun bɛ Dawuda la. O tuma la a y'a fɔ ko: «Jɔn na taa ji bɔ Bɛtilɛhɛm donda la kɔlɔn na ka n'a di ne ma?»
[16] O tuma la o kuntigi saba ye Filisitikaw ka daga cɛ tigɛ ka taa ji bɔ Bɛtilɛhɛm donda la kɔlɔn na ka taa n'o ji ye ka o di Dawuda ma. Nka Dawuda ma sɔn ka o ji min. A y'a bɔn duguma Matigi ɲɛ kɔrɔ,
[17] k'a fɔ ko: «Kaari, ne tɛ o kɛ, Matigi. Nin cɛ minw kɛra yɛrɛfagasuw ye ka taa, ne na olu joli min wa?» O de kosɔn Dawuda ma sɔn ka o ji min. O kuntigi saba ye o kow kɛ.
[18] Zeruja denkɛ Joab balimakɛ Abisai tun ye o cɛ bisaba kuntigi ye. Ale de ye cɛ kɛmɛ saba faga ni a ka tama ye. A ye tɔgɔ sɔrɔ i ko o cɛ saba.
[19] Ale tun bɛ jate ka tɛmɛn o cɛ bisaba kan, o de kosɔn a kɛra u kuntigi ye nka a tun tɛ o cɛ saba bɔ fariya la.
[20] Kabzeɛl Jehojada denkɛ Benaja dara ale kan. Kɛlɛkɛ cɛ ja gɛlɛn tun don. A ye kobaw kɛ. Ale de ye Moab bɔnsɔn na cɛ fila faga, olu ja tun ka gɛlɛn i ko waraba. Ale de donna dingɛ kɔnɔ fonɛnɛ tuma la ka waraba faga.
[21] Ale bira Misira cɛ barikama fana kan ka o faga. Tama tun bɛ o Misiraka bolo. Benaja bira o kan ni bere ye ka o cɛ ka tama minɛ ka a faga n'o ye.
[22] Jehojada denkɛ Benaja ye min kɛ, o filɛ o ye. A ye tɔgɔba sɔrɔ o mɔgɔ bisaba cɛma.
[23] Ale tɔgɔ tun ka bon ka tɛmɛn o cɛ bisaba tɔw kan nka a tun tɛ o cɛ saba bɔ ja gɛlɛya la. Dawuda y'a kɛ a yɛrɛ kɔlɔsibaa ye.
[24] Joab balimakɛ Asaɛl tun ye o cɛ bisaba la kelen ye. Dodo min bɔra Bɛtilɛhɛm, o denkɛ Elkanan fana tun b'a la,
[25] ani Sama ka bɔ Harɔd ani Elika ka bɔ Harɔd
[26] ani Helɛz ka bɔ Pelɛt ani Ikɛs denkɛ Ira ka bɔ Tekoa
[27] ani Abiezɛr ka bɔ Anatɔt ani Mebunayi ka bɔ Husa
[28] ani Zalmɔn ka bɔ Aho ni Maharai ka bɔ Netofa
[29] ani Bana denkɛ Helɛb ka bɔ Netofa ani Ribai denkɛ Itai ka bɔ Gibea, Benjamɛn bɔnsɔn na kelen tun don,
[30] ani Benaja ka bɔ Piratɔn ni Hidai ka bɔ Nakale-Gas
[31] ani Abi-Alibɔn ka bɔ Ariba ani Azmavɛt ka bɔ Barukim,
[32] ani Eliaba ka bɔ Salbɔn ani Jasɛn denkɛw Jonatan
[33] ani Sama ka bɔ Harar ani Sarar denkɛ Akiam ka bɔ Harar
[34] ani Maka Akasbai denkɛ Elifelɛt ani Akitofɛl denkɛ Eliam ka bɔ Gilo
[35] ani Hezrai min bɔra Karmɛl ani Parai ka bɔ Arab
[36] ani Natan denkɛ Igal ka bɔ Zoba ani Bani ka bɔ Gad
[37] ani Zelɛk ka bɔ Amɔn bɔnsɔn na ani Naharai ka bɔ Berɔt, o tun ye Zeruja denkɛ Joab ka kɛlɛkɛ minan tabaa ye,
[38] ani Ira ka bɔ Jetɛr ani Gebɛr ka bɔ Jetɛr
[39] ani Hɛti bɔnsɔn Uri, u bɛɛ lajɛlen kɛra kuntigi bisaba ni wolonwula ye.