[1] Akitofɛl y'a fɔ Absalɔm ye ko kura ko: «A to ne ka cɛ waa tan ni fila ɲɛnatɔmɔ ka taa ni olu ye ka Dawuda nɔgɛn bi su in na.
[2] Ne na kun a sɛgɛnnen na ka bala a la. O n'a sɔrɔ a barika banna. Ne na a fɛ mɔgɔw bɛɛ lasiran, u bɛɛ na boli ka masakɛ kelen to, ne na a kelen faga.
[3] Ne bɛ na ni a fɛ mɔgɔw ye, i bɛ mɔgɔ min nɔ fɛ, ni ne nana ni o salen ye, mɔgɔw bɛɛ na kɔsegin i ma. O tuma la mɔgɔw na hɛrɛ sɔrɔ.»
[4] O miirili diyara Absalɔm ni Israɛl cɛkɔrɔbaw bɛɛ ye.
[5] O tuma la Absalɔm ko: «Husai min bɔra Arka, an ka o wele ka o ka fɔta fana dɔn.»
[6] Husai donna Absalɔm ka so. Absalɔm y'a fɔ a ye ko: «Akitofɛl ye nin miirili di. A ye min fɔ, an ka o kɛ wala an kana o kɛ?»
[7] O tuma la Husai y'a jaabi ko: «Akitofɛl ye miirili min di nin sen in na, o man ɲi.»
[8] A ko fana: «E bɛ i fa ni a fɛ mɔgɔw dɔn, olu ye kɛlɛkɛ cɛ ja gɛlɛnw ye. U dusu diminnen bɛ i ko ursi waramuso bɔnɛlen a den na. Ka fara o kan, i fa ye kɛlɛkɛ cɛ ye, a tɛ si mɔgɔw fɛ.
[9] A dogolen bɛ sɔrɔ a dan na sisan tu dɔ kɔnɔ wala kuluwo dɔ kɔnɔ. Ni an ka mɔgɔ dɔw fagara kɛlɛ daminɛ tuma la, o kibaru na jɛnsɛn fan bɛɛ la, ko Absalɔm ka kɛlɛkɛ cɛ dɔw fagara.
[10] O tuma la kɛlɛkɛ cɛ minw ja ka gɛlɛn, i ko waraba, olu na siran, k'a masɔrɔ Israɛl bɔnsɔn bɛɛ y'a dɔn ko i fa ye cɛ farin ye, ko a fɛ cɛw ye cɛ barikamaw ye.
[11] Ne b'a fɔ i ye ko Israɛl bɔnsɔn bɛɛ ka lajɛ i kɔrɔ ka bɔ Dan fo ka taa se Beɛr-Seba. U na kɛ i ko kɔgɔji dala cɛncɛn. E yɛrɛ ka u ɲɛminɛ ka taa kɛlɛ la.
[12] O cogo la a bɛ yɔrɔ o yɔrɔ la, an na kun a la ka bi a kan, i ko ngomiji bɛ da duguma cogo min na. Dawuda ni a fɛ mɔgɔw si tɛna kisi o ma.
[13] Ni a taara a dogo dugu dɔ la, Israɛl bɔnsɔn na taa ni jurukisɛw ye o dugu kama, an na o dugu sama ka bɔ yen k'a fili kɔ dingɛ kɔnɔ. Hali kabakurun kelen tɛna to.»
[14] O tuma la Absalɔm ni Israɛl bɔnsɔn bɛɛ y'a fɔ ko: «Arka Husai ka ɲɛjirali ka fisa Akitofɛl ta ye.» Matigi y'a latigɛ ka Akitofɛl ka ɲɛjirali ɲuman tiɲɛn walisa ko jugu ka Absalɔm sɔrɔ.
[15] O tuma la Husai y'a fɔ sarakalasebaaw Zadɔk ni Abiatar ye ko: «Akitofɛl ye nin laadili di Absalɔm ni Israɛl cɛkɔrɔbaw ma, nka ne fana ye nin laadili di a ma.
[16] Ayiwa, aw ka boli sisan ka taa Dawuda lasɔmi k'a fɔ a ye ko a kana si jɛkɛnɛ la kungokolon kɔnɔ yen, wajibi don a ka ba tigɛ ka taa yɔrɔ jan walisa a ni a fɛ mɔgɔw bɛɛ kana faga.»
[17] Jonatan ni Akimaz tora En-Rogɛl ji boyi da la, sabu a tɛ bɛn mɔgɔ ka u dontɔ ye dugu kɔnɔ. Baaraden muso dɔ taara o kibaru fɔ u ye. U taara ka o bɛɛ lakali Dawuda ye.
[18] Nka kamalen dɔ ye u ye ka u ko fɔ Absalɔm ye. O tuma la u tɛliyara ka taa se cɛ dɔ ka so Bakurim. Kɔlɔn dɔ tun bɛ o ka so, u jiginna o kɔnɔ.
[19] O cɛ muso ye birifini dɔ ta ka o kɛ ka kɔlɔn da tugu ka ɲɔ susulen fɛnsɛ o kan walisa mɔgɔ kana o dɔn.
[20] Absalɔm ka cidenw sera o muso ka so k'a ɲininka ko: «Akimaz ni Jonatan bɛ min?» Muso y'u jaabi ko: «U ye ba tigɛ.» U ye u ɲini, nka u ma u ye. U seginna ka taa Jerusalɛm.
[21] Olu taalen kɔ, Akimaz ni Jonatan bɔra kɔlɔn kɔnɔ ka taa masakɛ Dawuda lasɔmi ko: «A' ye wuli ka ba tigɛ joona k'a masɔrɔ Akitofɛl ye nin ni nin ɲɛjirali di aw kama.»
[22] O tuma la Dawuda ni a fɛ mɔgɔw bɛɛ wulila ka Jurdɛn ba tigɛ. Dugu jɛra k'a sɔrɔ u bɛɛ ye ba tigɛ.
[23] Akitofɛl y'a ye ko u ma sɔn a ka ɲɛjirali ma minkɛ, a ye tɛrɛfɛ da a ka fali la ka taa a ka so a ka dugu kɔnɔ. A ye a ka so kɔnɔ kow bɛɛ ɲɛnabɔ, o kɔ, ka a yɛrɛ dulon. A sara. U y'a su don a fa ka kaburu kɔnɔ.
[24] O waati la Dawuda sera Mahanayim k'a sɔrɔ Absalɔm ni Israɛl bɔnsɔn kɛlɛkɛ cɛw bɛɛ bɛ Jurdɛn ba tigɛli la.
[25] Absalɔm ye Amasa bila kɛlɛkɛ cɛw kun na Joab nɔ na sabu Amasa tun ye Jitira denkɛ ye ka bɔ Israɛl bɔnsɔn na, a ba tun ye Nakas denmuso Abigail ye. O tun ye Joab ba Zeruja balimamuso ye.
[26] Ayiwa Israɛl bɔnsɔn bɛɛ ni Absalɔm taara u ka daga sigi Galad jamana la.
[27] Dawuda sera Mahanayim tuma min na, Amɔn bɔnsɔn Nakas denkɛ Sobi min tun bɛ Raba ani Amiɛl denkɛ Makir ka bɔ Lodebar ani Barzilai min bɔra Galad jamana la Rogelim dugu kɔnɔ,
[28] olu taara Dawuda ni a fɛ mɔgɔw sɛgɛrɛ ni dalanw ni ji minanw ni bɔgɔ dagaw ni alikama ni orje suman ni mugu ni kisɛ jirannen ni shɔ ni lantiye ni kisɛ jirannen wɛrɛw ye,
[29] ani di ni nare ni misi nare ni saga dɔw. Olu kɛra Dawuda ni a fɛ mɔgɔw ka dumuni ye. U ko: «O mɔgɔw sɛgɛnnen kɔngɔtɔ minnɔgɔtɔw bɛ kungokolon kɔnɔ yen.»