[1] Song-chú yu hiong Yî-set-lie̍t-ngìn thai fat-khién, só-yî kit Thai-ví lòi chhìm kì-têu ke mà-fàn. Song-chú tui Thai-ví kóng: “Ngì hi thiàu-chhà yit-ha Yî-set-lie̍t lâu Yù-thai ke ngìn-khiéu.”
[2] Vòng chhiu min-lin kiûn-chhui ke ngièn-soi Yok-ap kóng: “Tai-tén ngì ke phu-ha, hàng-theu Yî-set-lie̍t tak kî-chhu̍k, tui pet-phién ke Tan to nàm-phién ke Phe̍t-sṳ-pâ, tiám-son ngìn-mìn. Ngài oi tî ngìn-mìn ke su-muk.”
[3] Chúng-he Yok-ap tui vòng kóng: “Ngâ chú ngâ vòng, ngien Song-chú — ngì ke Song-ti sṳ́ Yî-set-lie̍t ngìn-mìn pí liá-ha ke ngìn-su tô yit-pak phi. Ngien ngì chhîn-muk khon-tó Song-ti ke chok-vì. M̀-ko, ngâ chú ngâ vòng, cho-má-ke oi cho liá-sṳ nè?”
[4] Chúng-he vòng kiên-chhṳ̀ oi Yok-ap lâu kì ke phu-ha fu̍k-chhiùng kì ke min-lin; kì-têu chhiu lì-khôi vòng, chhut-hi tiám-son Yî-set-lie̍t ngìn-mìn.
[5] Kì-têu ko Yok-tan-hò, chhai Kâ-tet kin-nui sân-lak tú ke Â-lò-ngí-sàng nàm-phién ôn-yàng, yèn-heu tui ke-vi hiong-pet to Ngâ-chhia,
[6] yu to Kî-lie̍t lâu Het-ngìn kin-nui ke Kâ-tâi-sṳ̂, yèn-heu to Tan, yu tui Tan hiong-sî to Sî-tun,
[7] yèn-heu hiong-nàm hàng, to fòng-ví-sàng Thai-ngì, yu to só-yû Hî-vi-ngìn lâu Kâ-nàm-ngìn ke sàng-sṳ, chui-heu lòi-to Yù-thai nàm-phu ke Phe̍t-sṳ-pâ.
[8] Kì-têu chhiòn-koet hàng theu-theu, kîn-ko kiú-ke ngie̍t yu ngi-sṳ̍p ngit, yèn-heu chón-to Yâ-lu-sat-lâng.
[9] Yok-ap hiong vòng po-ko: Yî-set-lie̍t tai vú-hi ke chong-tên chúng-su pat-sṳ̍p van ngìn; Yù-thai chong-tên chúng-su ńg-sṳ̍p van ngìn.
[10] Thai-ví thiàu-chhà ngìn-khiéu heu, liòng-sîm chhin put-ôn, chhiu tui Song-chú kóng: “Ngài cho liá-sṳ fam thai-chhui lé! Khiù Ngì sa-miên phu̍k-ngìn ke ko-sṳt! Ngài ke hàng-vì sṳ̍t-chhai tông-ngong.”
[11] Song-chú tui Thai-ví ke siên-kien Kâ-tet siên-tî kóng: “Hi lâu Thai-ví kóng, Ngài yung sâm-ke châi-nan pûn kì sién yit-ke, kì sién má-ke, Ngài chhiu cho-má-ke.” Thi-ngi chêu-sṳ̀n, Thai-ví hong-hí-lòi yî-heu,
[13] Kâ-tet hi kien kì, lâu kì kóng Song-chú só-kóng ke fa, yu mun Thai-ví: “Ngì oi sién nai-yong? Ngì ke koet-nui yû sâm-ngièn kî-fông? Ya-he chhai ngì thi̍t-ngìn mien-chhièn thò-mòng sâm-ke ngie̍t? Ya-he ngì ke koet-kâ pot sâm-ngit ke vûn-é? Sióng khon-é, oi ngài ngióng-pân fì-tap Song-chú.”
[14] Thai-ví tui Kâ-tet kóng: “Ngài tông vì-nàn! Ngài mò-oi pûn-ngìn chhú-fa̍t. Ngài kâm-ngien pûn Song-chú chhṳ-kâ chit-fa̍t ngài, yîn-vi Song-chú yû fûng-sṳn ke lìn-mén.”
[15] Só-yî Song-chú kong vûn-é chhai Yî-set-lie̍t-ngìn sṳ̂n-song, tui ke-ngit chêu-sṳ̀n to Kì só-thin ke sṳ̀; tui pet-phién ke Tan to nàm-phién ke Phe̍t-sṳ-pâ khiung yû chhit-van Yî-set-lie̍t-ngìn sí-thet.
[16] Thiên-sṳ́ chhûn-sú oi fí-me̍t Yâ-lu-sat-lâng ke sṳ̀, Song-chú kói-pien Kì chit-fa̍t ngìn-mìn ke sîm-yi, chhiu tui ke chṳp-hàng fí-me̍t ke thiên-sṳ́ kóng: “Sú thìn hâ-lòi, la-lé!” Ke-sṳ̀, Song-chú ke thiên-sṳ́ chhai Yâ-pu-sṳ̂-ngìn Â-lò-nâ ke tá-ma̍k-chhòng.
[17] Thai-ví khon-tó ke chṳp-hàng fí-me̍t ke thiên-sṳ́, chhiu tui Song-chú kóng: “He ngài fam ke chhui, ngài chang he ke cho m̀-chho̍k sṳ ke ngìn. Liá-têu ngìn-mìn chhiong yòng-è, kì-têu me-mò cho má-ke. Ngì yin-kôi chit-fa̍t ngài lâu ngài vuk-hâ ke ngìn!”
[18] Ke-ngit, Kâ-tet hi kien Thai-ví, tui kì kóng: “To Yâ-pu-sṳ̂-ngìn Â-lò-nâ ke tá-ma̍k-chhòng hi, vi Song-chú hí yit-chho chi-thàn.”
[19] Thai-ví cheu Kâ-tet fung Song-chú min-lin só-kóng ke fa sông-hi.
[20] Â-lò-nâ hiong-hâ khon, khon-tó vòng lâu kì ke kôn-yèn hiong kì liá-phién sông-lòi, chhiu hàng-chhièn hi phu̍k-lo̍k chhai vòng mien-chhièn,
[21] mun kì: “Ngâ chú ngâ vòng lòi-to phu̍k-ngìn liá-vi yû má-ke sṳ?” Thai-ví kóng: “Ngài oi mâi ngì ke tá-ma̍k-chhòng, vi Song-chú hí yit-chho chi-thàn, pûn pot-vûn thìn hâ-lòi.”
[22] Â-lò-nâ kóng: “Ngâ chú ngâ vòng, ngì kak-yi má-ke chhiu cho ngì nâ-hi hien-pûn Song-chú. Liá-vi yû ngiù hó cho sêu-fa-chi, yu yû ngiù-ak lâu tá-ma̍k ke piông-é hó cho chhèu sêu.
[23] Vòng â, ngài — Â-lò-nâ chiông liá-têu chhiòn-phu pûn ngì.” Kì yu tui vòng kóng: “Ngien Song-chú — ngì ke Song-ti fôn-hí chiap-na̍p ngì.”
[24] Chúng-he vòng tui Â-lò-nâ kóng: “Cho-m̀-tet! Ngài yit-thin oi cheu ka-chhièn lâu ngì mâi; ngài mò-oi hiong Song-chú — ngài ke Song-ti hien pha̍k-pha̍k tet-lòi ke cho sêu-fa-chi.” Thai-ví chhiu yung ńg-sṳ̍p chak ngiùn-pi mâi-hâ tá-ma̍k-chhòng lâu ngiù.
[25] Thai-ví chhai ke-vi vi Song-chú hí yit-chho chi-thàn, hien sêu-fa-chi lâu phìn-ôn-chi. Só-yî, Song-chú thâng kì vi liá thú-thi ke khì-tó, pot-vûn chhiu chhai Yî-set-lie̍t thìn-thet.