[1] Yâ-sî ke lai-é Thai-ví ke yi-ngièn, chhiu-he Song-ti só chhung-yung ke ngìn fat-chhut ke yi-ngièn; Ngâ-kok ke Song-ti kò-yù sat-li̍p kì cho vòng. Thai-ví vi Yî-set-lie̍t cho tông-tô chhin-chiâng ke sṳ̂-kô. Hâ-poi liá-sú sṳ̂ he Thai-ví chui-heu ke vùi-ngièn:
[2] Song-chú ke Lìn thûng-ko ngài kóng-fa; Kì ke sin-sit sòng chhai ngài choi-sùn.
[3] Yî-set-lie̍t ke Song-ti sṳt án-ngiòng kóng, Yî-set-lie̍t ke phàn-sa̍k lâu ngài kóng-fa: Ke yung chṳn-ngi lòi chhṳ-lî ngìn-mìn ke, yung kin-vi Song-ti lòi chóng-khièn ke vòng,
[4] chhiu-chhiong ngit-thèu tá-chó yit chhut-lòi, chhai mò vû-yùn ke thiên-táng fat-kông, sṳ́ lo̍k-yí heu ke chhiâng-chhó meu-sṳn.
[5] Song-ti oi án-ngiòng ên-thai ngài ke heu-thoi, yîn-vi Kì lâu ngài yû li̍p yún-yén ke yok, he yún-yén m̀-voi fi-thet ke sṳ-yok, Kì yit-thin voi sṳ̀n-chhiòn ngài ke ngien-mong, Kì voi su-pûn ngài yit-chhiet ke kiu-ên.
[6] Ok-ngìn chhiu-chhiong fit-thet ke net-è, má-ngìn tû m̀-kám yung sú ngiâm kì,
[7] oi ngiâm kì chhiu yung thiet-kun thiet-khiàm; thin-chho̍k chiông kì yung fó sêu chhiang-chhiang.
[8] Thai-ví sú-hâ yû-miàng ke yúng-sṳ ki chhai hâ-poi: Thi-yit ke he Thâ-kiet-mùn-ngìn Yok-sat-Pâ-sat; kì he “Sâm Yúng-sṳ” ke liâng-chhiu. Kì sṳt chhai yit-pái chan-chên chûng yung chhiông chhiuk-sí pat-pak ngìn.
[9] “Sâm Yúng-sṳ” ke thi-ngi ke he Â-ha̍p chhu̍k-ngìn Tó-tô ke lai-é Yî-li-â-sat. Yû yit-pái, kì lâu Thai-ví hiong ke-têu chhièn-lòi kûng-tá ke Fî-li-sṳ-ngìn ma-chhṳn. Yî-set-lie̍t-ngìn chha̍t-thui;
[10] chúng-he kì khî chhai ke-vi lâu Fî-li-sṳ-ngìn piang-miang, chhṳ̍t-to kì ke sú pi-to ngang-kau thet, piong m̀-khôi sú-chûng ke kiam. Ke-ngit, Song-chú sṳ́ Yî-set-lie̍t-ngìn thai-yàng. Chan-chên ko-heu, Yî-set-lie̍t-ngìn chón-to Yî-li-â-sat ke-vi, siông-châng pi-poi chhióng thi̍t-ngìn sṳ̂-thí ke thiet-kap.
[11] “Sâm Yúng-sṳ” ke thi-sâm ke he Ha̍p-lâ-ngìn Â-kî ke lai-é Sâ-mâ. Yû yit-ngit, Fî-li-sṳ-ngìn chhi-si̍p chhai Li-hî ke theu-é thièn ke sṳ̀, Yî-set-lie̍t-ngìn chhiòn-phu thò-chéu,
[12] chúng-he Sâ-mâ vi-tó pó-fu ke-te thièn, chhiu khî chhai thièn-tú tí-khong kì-têu, chhṳ̀-sí chhin-tô Fî-li-sṳ-ngìn. Ke-ngit, Song-chú sṳ́ Yî-set-lie̍t-ngìn thai-yàng.
[13] Sû-kot ke sṳ̀, “Sâm-sṳ̍p Yúng-sṳ” tông-chûng yû sâm-sà hâ-to Â-thu-làn sân-lùng ke-vi hi kien Thai-ví. Ke-sṳ̀, yû yit-chhui Fî-li-sṳ-ngìn ôn-yàng chhai Li-fa̍t-yîm sân-lak tú.
[14] Ke-sṳ̀ Thai-ví chhai yit-ke yû fòng-ví ke sân-thèu; yit-khiùn Fî-li-sṳ-ngìn cham-liâng Pak-li-hèn.
[15] Thai-ví sióng-ngiam kâ-hiông, chhiu kóng: “Ngài tông sióng-oi lîm Pak-li-hèn-sàng mùn-sùn ke chiáng-súi â!”
[16] Ke sâm-ke yúng-sṳ chhiu chhong-tén ko Fî-li-sṳ-ngìn ke yàng-thi, tui ke chiáng-tú tá-súi, tai-lòi pûn Thai-ví. Chúng-he Thai-ví m̀-hén lîm, fán-chón chiông súi tó chhut-lòi hien-pûn Song-chú.
[17] Kì kóng: “Song-chú â, ngài ngióng-pân cho-tet lîm liá-súi! Liá kám m̀-he lîm mo sâng-miang ngùi-hiám hi tá-súi ke yúng-sṳ ke hiet?” Só-yî Thai-ví m̀-lîm. Liá chhiu-he ke sâm-ke yúng-sṳ yúng-kám ke hàng-vì.
[18] Sé-lu-ngâ ke lai-é, Yok-ap ke ló-thâi Â-pí-chhî he “Sâm-sṳ̍p Yúng-sṳ” ke liâng-chhiu. Kì sṳt yung chhiông chhiuk-sí sâm-pak ngìn, só-yî lâu “Sâm Yúng-sṳ” khiung-yong chhut-miàng.
[19] Kì he “Sâm-sṳ̍p Yúng-sṳ” tông-chûng chui khiet-chhut ke yit-ke, sàng-cho kì-têu ke liâng-chhiu, chúng-he pí m̀-tet “Sâm Yúng-sṳ” ke miàng-sâng.
[20] Kap-siet-ngìn Yâ-hò-yâ-thai ke lai-é Pí-nâ-ngâ he nang-ngoi yit-ke chhut-miàng ke yúng-sṳ. Kì yû tông-tô yúng-kám ke hàng-vì, pâu-hàm chhṳ̀-sí lióng-ke khiòng-chong ke Mô-ap chan-sṳ. Kì sṳt chhai lo̍k-siet thiên hâ-to thai-fut tú tá-sí yit-chak sṳ̂-é.
[21] Kì yu chhṳ̀-sí yit-ke khiòng-chong ke Âi-khi̍p-ngìn; ke-ngìn nâ-tén chhòng chhiông, Pí-nâ-ngâ chṳ́-yû nâ-tén yit-kî kun-é; Pí-nâ-ngâ chiông kì sú-chûng ke chhiông chhióng ko-lòi, yung ke chhiông chiông kì chhṳ̀-sí.
[22] Liá he Yâ-hò-yâ-thai ke lai-é Pí-nâ-ngâ yúng-kám ke hàng-vì; kì lâu “Sâm Yúng-sṳ” ya chhin chhut-miàng.
[23] Kì chhai “Sâm-sṳ̍p Yúng-sṳ” tông-chûng chui su-ngìn chûn-chhung, chúng-he lâu “Sâm Yúng-sṳ” ke miàng-sâng hàn-he pí m̀-tet. Thai-ví phai kì cho sṳ-ví-chóng.
[24] “Sâm-sṳ̍p Yúng-sṳ” khì-thâ ke ngìn yû: Yok-ap ke ló-thâi Â-sat-het, Pak-li-hèn-ngìn Tó-tô ke lai-é Yî-le̍t-ha̍p-nàn, Ha̍p-li̍t-ngìn Sâ-mâ, Ha̍p-li̍t-ngìn Yî-li-kâ, Pha-le̍t-thì-ngìn Hî-li-sṳ̂, Thì-kô-â-ngìn Yit-kit ke lai-é Yî-lâ, Â-nâ-thut-ngìn Â-pí-yî-chhia, Fu-sâ-ngìn Mí-pún-nâi, Â-ha̍p-ngìn Sat-mùn, Nì-thò-fap-ngìn Mâ-ha̍p-lòi, Nì-thò-fap-ngìn Pâ-nâ ke lai-é Hî-li̍p, Phien-ngâ-mén-chhu̍k, Kî-pí-â-ngìn Li-pai ke lai-é Yî-thai, Pí-lâ-tun-ngìn Pí-nâ-ngâ, Kâ-sṳ̍t-kuk-ngìn Hî-thai, Â-lâ-pâ-ngìn Â-pí-Â-pún, Pâ-lû-mí-ngìn Ap-sṳ̂-mâ-fut, Sâ-pún-ngìn Yî-li-ngâ-ha̍p-pâ, Ngâ-san ke-têu lai-é, Yok-nâ-tân, Ha̍p-lâ-ngìn Sâ-mâ, Ha̍p-lâ-ngìn Sâ-lâ ke lai-é Â-hî-am, Mâ-kâ-ngìn Â-ha̍p-pai ke lai-é Yî-li-fap-lie̍t, Kî-lò-ngìn Â-hî-tô-fut ke lai-é Yî-lièn, Kâ-me̍t-ngìn Hî-sṳ̂-lòi, Â-pâ-ngìn Pha-lòi, Só-pâ-ngìn Nâ-tân ke lai-é Yî-kap, Kâ-tet-ngìn Pâ-nì, Â-mùn-ngìn Sé-le̍t, Pí-liu̍k-ngìn Nâ-ha̍p-lòi (kì he thoi Sé-lu-ngâ ke lai-é Yok-ap nâ vú-hi ke ngìn), Yî-thiap-ngìn Yî-lâ, Yî-thiap-ngìn Kâ-li̍p, Het-ngìn Vû-li-â, chúng-khiung he sâm-sṳ̍p chhit-sà.