[1] Yúng-fu Só-lò kâ-chhu̍k ke kiûn-chhui lâu Thai-ví kâ-chhu̍k ke kiûn-chhui siông-chhṳ̀ tông-kiú. Thai-ví yit-ngit pí yit-ngit khiòng-chong, chúng-he Só-lò ke kâ-chhu̍k yit-ngit pí yit-ngit sôi-ngio̍k.
[2] Thai-ví chhai Hî-pak-lùn kiung liuk-ke lai-é. Cheu chhut-se ke sun-si lòi-phài: Am-nun he Yâ-sṳ̂-lie̍t-ngìn Â-hî-nôn kiung ke;
[3] Kî-li-ap he Kâ-me̍t-ngìn Nâ-pa ke koá-fu Oi-pí-kâi kiung ke; Ap-sâ-liùng he Kî-sut-vòng Tha̍t-mâi ke moi-é Mâ-kâ kiung ke;
[4] Â-tô-nì-ngâ he Ha̍p-khi̍p kiung ke; Sṳ-fap-thì-ngâ he Â-pí-thâ kiung ke;
[5] Yî-thi̍t-ngiam he Thai-ví ke pû-ngiòng Yî-kiet-lâ kiung ke. Thai-ví liá liuk-ke lai-é chhiòn-phu he chhai Hî-pak-lùn chhut-se ke.
[6] Thai-ví kâ-chhu̍k ke kiûn-chhui lâu yúng-fu Só-lò kâ-chhu̍k ke ngìn siông-chhṳ̀ m̀-sṳt thôn; chhai Só-lò ke phu-ha tông-chûng, Ap-nì-ngí ngièn-soi ke sṳ-li̍t ye̍t-lòi ye̍t-thai.
[7] Só-lò yû yit-ke se-chiá ôn-to Li-sṳ̂-pâ, he Oi-â ke moi-é. Yû yit-ngit, Só-lò ke lai-é Yî-sṳ̂-pô-sat mun Ap-nì-ngí: “Ngì cho-má-ke lâu ngâ-pâ ke se-chiá khiung-ha soi nè?”
[8] Liá-fa sṳ́ Ap-nì-ngí fî-sòng su-hi; kì kóng: “Ngì sióng ngài voi chhut-mai Só-lò ke kâ-chhu̍k he-mò? Ngài kám-he Yù-thai ke chéu-kiéu? Yit khôi-sṳ́ ngài chhiu tui ngiâ-pâ Só-lò lâu kì ke hiûng-thi phèn-yû chûng-sîm; ngài me mò chiông ngì kâu chhai Thai-ví ke sú-chûng. Kîm-pû-ngit, ngì sa vi liá fu-ngìn-kâ lòi chit-phi ngài.
[9] Song-chú sṳt yin-hí Thai-ví oi tui Só-lò lâu kì ke kâ-chhu̍k sú-chûng chhióng-chéu vòng-khièn, sṳ́ Thai-ví cho Yî-set-lie̍t lâu Yù-thai ke vòng, tui chui pet-phién ke Tan chhṳ̍t-to chui nàm-phién ke Phe̍t-sṳ-pâ. Liá-ha, ngài na-he m̀ vàn-sṳ̀n liá-khien sṳ, ngien Song-ti chhûng-chhûng chit-fa̍t ngài!”
[11] Yî-sṳ̂-pô-sat fî-sòng kiâng Ap-nì-ngí, m̀-kám kóng pan-ki fa.
[12] Ap-nì-ngí phai-ngìn to Thai-ví ke-vi hi, lâu kì kóng: “Má-ngìn sióng thúng-chhṳ liá-koet? Na-he ngì lâu ngài kóng-hó thiàu-khien, ngài chhiu pông-chhu ngì, sṳ́ Yî-set-lie̍t-ngìn chhiòn-phu kûi-sun ngì.”
[13] Thai-ví kóng: “Hó â! Ngài cho-tet lâu ngì li̍p-yok, chúng-he ngài yû yit-chak yêu-khiù: Ngì lòi kien ngài ke sṳ̀, yit-thin oi tai Só-lò ke moi-é Mí-kap khiung-ha lòi.”
[14] Thai-ví ya phai-ngìn hi-kien Só-lò ke lai-é Yî-sṳ̂-pô-sat, kóng: “Chiông ngài ke pû-ngiòng Mí-kap vàn ngài â! Kì he ngài yung yit-pak ke Fî-li-sṳ-ngìn ke pâu-phì von-lòi ke.”
[15] Yî-sṳ̂-pô-sat chhiu phai-ngìn tui Mí-kap ke ló-kûng — Lâ-yi ke lai-é Pha-thiet ke-vi chiông Mí-kap tai-chéu.
[16] Ló-kûng Pha-thiet thèn-tén Mí-kap kín-hàng kín-kieu, yit-chhṳ̍t thèn-to Pâ-fu-lìm. Ap-nì-ngí tui kì kóng: “Ngì hó-chón lé!” Pha-thiet chhiu chón-hi.
[17] Ap-nì-ngí lâu Yî-set-lie̍t ke-têu chóng-ló kóng: “Chhin-kiú yî-lòi, ngì-têu yit-chhṳ̍t hî-mong Thai-ví cho ngì-têu ke vòng,
[18] liá-ha, ngì-têu ke kî-fi lòi lé. Yîn-vi Song-chú sṳt yin-hí Thai-ví kóng: ‘Ngài oi yung Ngài ke phu̍k-ngìn Thai-ví lòi kiu Ngài ke chṳ́-mìn Yî-set-lie̍t thot-lì Fî-li-sṳ-ngìn lâu só-yû sù-thi̍t ke sú.’ ”
[19] Ap-nì-ngí ya tui Phien-ngâ-mén kî-chhu̍k ke ngìn kóng khiung-yong ke fa, yèn-heu to Hî-pak-lùn hi, chiông Yî-set-lie̍t-ngìn lâu Phien-ngâ-mén chhiòn kî-chhu̍k só thùng-yi ke sṳ hiong Thai-ví po-ko.
[20] Tông Ap-nì-ngí tai-tén ngi-sṳ̍p sà to Hî-pak-lùn kien Thai-ví ke sṳ̀, Thai-ví vi kì-têu pài-sat yèn-si̍t.
[21] Ap-nì-ngí tui Thai-ví kóng: “Liá-ha, ngài oi hi seu-si̍p chhiòn Yî-set-lie̍t-ngìn lòi kien ngài ke chú ngài ke vòng, lâu ngì li̍p-yok, sṳ́ ngì cheu sîm-ngien thúng-chhṳ chhiòn-koet.” Thai-ví pó-chṳn Ap-nì-ngí ke ôn-chhiòn, yèn-heu sung kì lì-khôi.
[22] Mò kí-kiú, Yok-ap lâu Thai-ví ke kiûn-chhui kûng-tá thi̍t-ngìn chón-lòi, tai-chón tông-tô chan-li-phín. Chúng-he ke-sṳ̀ Ap-nì-ngí yí-kîn mò chhai Hî-pak-lùn, yîn-vi Thai-ví yí-kîn pó-chṳn kì ke ôn-chhiòn, sung kì chéu lé.
[23] Yok-ap lâu kì ke kiûn-chhui chón-to Hî-pak-lùn ke sṳ̀, yû-ngìn lâu kì kóng Nì-ngí ke lai-é Ap-nì-ngí lòi kien-ko vòng, vòng pó-chṳn kì ke ôn-chhiòn, sung kì chéu lé.
[24] Yok-ap chhiu hi kien vòng, kóng: “Ngì cho má-ke án-ngiòng? Ap-nì-ngí lòi kien ngì, ngì hàn sung kì chéu?
[25] Ngì oi tî, Nì-ngí ke lai-é Ap-nì-ngí to liá-vi lòi he oi khî-phien ngì, tá-tham ngì chhut-ngi̍p ke thi-fông lâu ngì só cho ke sṳ-chhìn.”
[26] Yok-ap lì-khôi Thai-ví yî-heu, chhiu phai-ngìn hi tûi Ap-nì-ngí, tui Sî-lâ-chiáng ke-vi chiông Ap-nì-ngí tai chón-lòi; chúng-he liá-sṳ Thai-ví pin m̀-tî.
[27] Ap-nì-ngí chón-to Hî-pak-lùn ke sṳ̀, Yok-ap chiông kì tai-to sàng-mùn sùn, cha-yi oi lâu kì kóng pi-me̍t fa, chhiu chhai ke-vi chhiuk-chhôn kì ke tú-sṳ́. Án-ngiòng, Ap-nì-ngí chhiu sí-thet, yîn-vi kì sṳt chhṳ̀-sí Yok-ap ke ló-thâi Â-sat-het.
[28] Thai-ví thâng-tó liá sêu-sit, chhiu kóng: “Liù Nì-ngí ke lai-é Ap-nì-ngí ke hiet, liá chhui chhai Song-chú mien-chhièn yún-yén m̀-voi kûi-pûn ngài lâu ngài ke koet.
[29] Ngien po-yin kûi-to Yok-ap lâu kì ke kâ-chhu̍k sṳ̂n-song. Ngien Yok-ap ke kâ-chhu̍k thoi-thoi yû-ngìn chho̍k-tó sin-phiang, pot thái-kô, khiò-sú pâi-kiok, chan-sí, ngo-sí.”
[30] Án-ngiòng, Yok-ap lâu kiâ thai ló-thâi Â-pí-chhî chhṳ̀-thet Ap-nì-ngí, vi-tó po kì-têu ke se ló-thâi Â-sat-het chhai Kî-phiên chan-chhòng pûn Ap-nì-ngí chhṳ̀-sí ke yên-sù.
[31] Thai-ví min-lin Yok-ap lâu kì ke phu-ha kóng: “Ngì-têu oi chhá-lan sâm, chok mà-sâm, chhai Ap-nì-ngí kôn-muk chhièn pî-sông thai-kieu.” Thai-ví-vòng chhîn-chhṳ thèn chhai kôn-muk heu-poi hàng.
[32] Ap-nì-ngí chong chhai Hî-pak-lùn. Vòng chhai Ap-nì-ngí fùn-mu chhièn sông-sîm to thai-sâng kieu; só-yû ke ngìn-mìn ya chhiòn-phu pî-sông thai-kieu.
[33] Thai-ví-vòng vi Ap-nì-ngí chhong liá-sú ôi-kô: Ap-nì-ngí kám yin-kôi chhiong ngong-é án-ngiòng sí?
[34] Ngì ke sûng-sú mò pûn-ngìn thak-tén; ngì ke sûng-kiok mò pûn-ngìn khún-tén. Ngì chhiu chhiong pûn phau-thù chhṳ̀-sí khiung-yong! Só-yî ngìn-mìn yu vi Ap-nì-ngí pî-sông thai-kieu.
[35] Thai-kâ kûi-ngit khien Thai-ví sṳ̍t tûng-sî, chúng-he Thai-ví fat-sṳ kóng: “Na-he ngài chhai ngit-thèu lo̍k-sân yî-chhièn sṳ̍t tûng-sî, ngien Song-ti chhûng-chhûng chit-fa̍t ngài!”
[36] Thai-kâ thâng-kóng liá-khien sṳ, chhiòn-phu tông fôn-hí vòng án-ngiòng cho. Sṳ-sṳ̍t song, vòng só cho ke mî-yit khien-sṳ thai-kâ chhiòn-phu tông fôn-hí.
[37] Ke-ngit só-yû thèn Thai-ví ke ngìn lâu Yî-set-lie̍t ngìn-mìn chhiòn-phu tî mèu-sat Nì-ngí ke lai-é Ap-nì-ngí liá-khien sṳ m̀-he vòng ke yi-sṳ.
[38] Vòng tui kì ke phu-ha kóng: “Kám-kóng ngì-têu m̀-tî kîm-pû-ngit Yî-set-lie̍t sí-thet yit-ke ví-thai ke chiông-kiûn?
[39] Kîm-pû-ngit, sûi-yèn ngài he Song-ti kò-yù sat-li̍p ke vòng, ngài me mò phan-fap cho má-ke. Sé-lu-ngâ liá lióng-ke lai-é án-khiòng án-phau, ngài mò-fap yin-fu! Ngien Song-chú cheu kì-têu ke chhui lòi chit-fa̍t kì-têu!”