[1] Song-chú phai siên-tî Nâ-tân hi kien Thai-ví. Nâ-tân to Thai-ví ke-vi, tui kì kóng: “Mêu-sàng yû lióng-ke ngìn, yit-ke tông yû-chhièn, yit-ke chhin phìn-khiùng.
[2] Ke yû-chhièn ngìn yû tông-tô ngiù-yòng;
[3] ke khiùng-khú ngìn má-ke tû mò, chṳ́-yû yit-chak yòng-chhṳ-é he kì mâi-lòi hiuk ke. Kì cheu-ku yòng-chhṳ-é, pûn yòng-chhṳ-é lâu chhṳ-kâ ke chṳ́-ńg khiung-ha hiuk-thai. Kì chiông chhṳ-kâ sṳ̍t ke, lîm ke ya pûn yòng-chhṳ-é sṳ̍t, chiông yòng-chhṳ-é nám chhai kì fài-chûng soi, chhiong chhṳ-kâ ke moi-é khiung-yong.
[4] Yû yit-ngit, ke yû-chhièn ngìn vuk-hâ lòi yit-ke ngìn-hak; kì m̀ phan-tet chhṳ̀ yit-chak chhṳ-kâ hiuk ke thèu-sâng lòi chêu-thai ngìn-hak, sa chiông khiùng-khú ngìn vuk-hâ ke-chak yòng-chhṳ-é chhióng-lòi, khoán-thai ngìn-hak.”
[5] Thai-ví thâng-tó, tui ke yû-chhièn ngìn fî-sòng fat-khién, tui Nâ-tân kóng: “Ngài chṳ́-tén yún-sên Song-chú fat-sṳ, cho liá-sṳ ke ngìn kôi-sí!
[6] Kì cho-chhut án mò thiên-liòng ke sṳ, yin-kôi phòi si-phi pûn kì só chhióng ke ngìn.”
[7] Nâ-tân tui Thai-ví kóng: “Ngì chhiu-he ke-chak ngìn! Song-chú — Yî-set-lie̍t ke Song-ti án-ngiòng kóng: ‘Ngài kò-yù li̍p ngì cho Yî-set-lie̍t ke vòng, kiu ngì lì-khôi Só-lò ke sú.
[8] Ngài chiông Só-lò ke koet lâu kì ke pû-ngiòng se-chiá chhiòn-phu pûn ngì, sṳ́ ngì cho vòng thúng-chhṳ Yî-set-lie̍t lâu Yù-thai. Na-he liá-têu hàn m̀-la pái, Ngài hàn voi kâ-phi su-pûn ngì.
[9] Ngì cho-má-ke vì-poi Ngài ke min-lin? Cho-má-ke cho án-fái ke sṳ? Ngì sṳ́ Het-ngìn Vû-li-â sí chhai chan-chhòng; ngì chia Â-mùn-ngìn ke tô chhṳ̀-sí kì, yèn-heu chhióng kì ke pû-ngiòng!
[10] Ngì án-ngiòng méu-sṳ Ngài, chhióng Het-ngìn Vû-li-â ke pû-ngiòng, ngì ke kâ voi yún-yén lì m̀-khôi tô-kiam.’
[11] Song-chú án-ngiòng kóng: ‘Ngài oi ham ngì chhṳ-kâ vuk-hâ ke ngìn hong hí-lòi chok-lon kûng-kit ngì. Ngì voi khon-tó Ngài chiông ngì ke pû-ngiòng se-chiá pûn ngì sṳ̂n-piên ke nàm-ngìn; liá-sà ngìn voi chhai kông-thiên pha̍k-ngit chṳ̂-ha lâu kì-têu soi-muk.
[12] Ngì chhai am-chûng fam-chhui, chúng-he Ngài oi chhai kông-mìn ke só-chhai sṳ́ liá-sṳ hién-mìn chhut-lòi, pûn chhiòn Yî-set-lie̍t-ngìn khon-tó.’ ”
[13] Thai-ví tui Nâ-tân kóng: “Ngài tet-chhui Song-chú lé!” Nâ-tân en-kóng: “Song-chú sa-miên ngì; ngì m̀-voi chṳ-to sí.
[14] Chúng-he, yîn-vi ngì cho liá-sṳ méu-sṳ Song-chú, ngì liá-ke lai-é voi sí-thet.”
[15] Kóng-so̍t, Nâ-tân chhiu chón vuk-hâ hi lé. Song-chú sṳ́ Vû-li-â ke pû-ngiòng lâu Thai-ví só kiung ke se-ngìn-è pot-phiang.
[16] Thai-ví khì-khiù Song-ti pûn se-ngìn-è không-fu̍k. Kì kim-sṳ̍t, tak am-pû ngi̍p chhṳ-kâ ke kiên-tú, theu-ya soi chhai thi-song.
[17] Kì nui-yen ke ló phu̍k-ngìn khien kì hong-hí-lòi; kì m̀-hén, ya m̀ lâu kì-têu khiung-ha sṳ̍t-fan.
[18] Ko yit-ke lî-pai, se-ngìn-è sí-thet. Thai-ví ke kôn-yèn m̀-kám chiông liá-ke sêu-sit lâu kì po-ko; kì-têu kóng: “Se-ngìn-è hàn-sâng ke sṳ̀, ngài-têu lâu Thai-ví kóng-fa, kì chhiu m̀-hén thâng, ngài-têu ngióng-pân kám lâu kì kóng se-ngìn-è sí-thet ke sêu-sit? Kì khó-nèn voi cho-chhut sông-hoi chhṳ-kâ ke sṳ!”
[19] Thai-ví fat-hien kì ke kôn-yèn se-sâng kóng-fa, tî se-ngìn-è yí-kîn sí-thet, chhiu mun kì-têu: “Se-ngìn-è sí-thet he-mò?” Kì-têu en-kóng: “He! Se-ngìn-è sí-thet lé.”
[20] Thai-ví chhiu tui thi-song hong-hí-lòi, sé-sṳ̂n, sṳ̂-thèu, von sâm-fu, yèn-heu to Song-chú ke sṳn-thien kin-pai. Kì chón-to vòng-kiûng ke sṳ̀, fûn-fu ngìn chún-phi sṳ̍t-vu̍t; fan-chhoi yit sông-chok, kì chhiu sṳ̍t.
[21] Kì ke kôn-yèn mun kì: “Ngài-têu chṳ̂n m̀ mìn-pha̍k: Se-ngìn-è hàn-sâng, ngì vi kì kim-sṳ̍t kín-kieu, se-ngìn-è yit-sí, ngì fán-chón hong-hí-lòi lîm-sṳ̍t!”
[22] Thai-ví kóng: “Chho̍k â! Se-ngìn-è hàn-sâng, ngài kim-sṳ̍t kín-kieu; yîn-vi ngài sióng, Song-chú khó-nèn voi lìn-mén ngài, mo̍k pûn se-ngìn-è sí-thet.
[23] Liá-ha se-ngìn-è sí-thet, ngài cho-má-ke hàn-oi kim-sṳ̍t nè? Ngài voi sṳ́ se-ngìn-è fán-sâng he-mò? Yû yit-ngit ngài voi to kì ke-vi hi, chúng-he kì mò fap-thu chón-to ngài liá-vi lòi!”
[24] Thai-ví ôn-ví kì ke pû-ngiòng Pha̍t-sṳ-pâ, lâu kì thùng-fòng. Kì heu-lòi kiung yit-ke lai-é; Thai-ví lâu kì ôn-miàng Só-lò-mùn. Song-chú siak liá se-ngìn-è,
[25] fûn-fu siên-tî Nâ-tân lâu liá se-ngìn-è ôn-miàng Yâ-tí-tí-â, yîn-vi Song-chú chhin siak kì.
[26] Yok-ap ki-siu̍k kûng-tá Â-mùn-ngìn ke kîn-sàng Lâ-pâ, chhâ-m̀-tô voi tá hâ-lòi.
[27] Kì phai-ngìn hi hiong Thai-ví po-ko: “Ngài kûng-tá Lâ-pâ-sàng, yí-kîn chhióng-tó súi-ngièn-thèu,
[28] liá-ha chhiáng koet-vòng seu-si̍p khì-thâ ke kiûn-chhui, chhîn-chhṳ tai-liâng hi kûng-tá! Ngài mò-oi chiông tá-hâ liá-sàng ke kûng-lò kûi ngài chhṳ-kâ.”
[29] Só-yî Thai-ví si̍p-chûng thai-kiûn, hi kûng-kit Lâ-pâ, chiông sàng tá hâ-lòi.
[30] Â-mùn-ngìn ke sṳ̀n-siong Mí-le̍t-kûng yû yit-táng kîm miên-liù, thai-yok chhûng sâm-sṳ̍p ńg kûng-kîn, yû siông pó-sa̍k. Thai-ví chiông pó-sa̍k pok hâ-lòi, siông chhai chhṳ-kâ ke vòng-kon táng. Kì ya tui sàng-tú chhióng-tó chhin-tô chan-li-phín,
[31] chiông ke-sàng ke ngìn-mìn lâi chhut-lòi, khiòng-pet kì-têu yung ki-é, thiet-phà, pú-thèu cho-kûng, yu khiòng-pet kì-têu chhai chôn-yèu kûng-chok. Thai-ví ya khiung-yong tui-thai khì-thâ Â-mùn sàng-sṳ ke ngìn-mìn. Yèn-heu Thai-ví lâu kì ke thai-kiûn chhiu chón Yâ-lu-sat-lâng hi.