[1] Liá-sṳ̀, Thai-ví-vòng yí-kîn chhin-ló; sûi-yèn kì ke phu̍k-ngìn yung thán-è kâ chhai kì sṳ̂n-hong, kì hàn-he kám-kok m̀-la sêu-nôn.
[2] Kì ke thai-sṳ̀n tui kì kóng: “Ngâ chú ngâ vòng, pûn ngài-têu hi chhìm yit-ke ngìn-kâ-ńg lòi fu̍k-sṳ ngì, cheu-ku ngì, ham kì soi chhai ngì ke sṳ̂n-piên, sṳ́ ngì sêu-nôn.”
[3] Só-yî kì-têu to Yî-set-lie̍t kok-thi hi chhìm chiâng-chiâng ke ngìn-kâ-ńg, chui-mî chhai Sû-ngiam chhìm-tó yit-ke ngìn-kâ-ńg, miàng-ham Ngâ-pí-sâ, chhiu tai kì hi kien vòng.
[4] Liá ngìn-kâ-ńg chhin chiâng; kì chhai vòng sùn-thèu fu̍k-sṳ cheu-ku vòng, chúng-he vòng mò lâu kì fat-sên chhîn-me̍t ke koân-he.
[5] Ke-sṳ̀, Ap-sâ-liùng yí-kîn sí-thet; Thai-ví lâu Ha̍p-khi̍p só kiung ke lai-é Â-tô-nì-ngâ cheu-son he chui-thai ke lai-é. Kì sâng-to chhin yèn-tàu. Thai-ví chhṳ-chhiùng m̀-sṳt pûn kì sṳ̍t-ko khú, m̀-sṳt hiàm-ko kì, chúng-he kì yâ-sîm tông-thai, sióng-oi cho vòng. Kì vi chhṳ-kâ chún-phi chan-chhâ lâu khì-pîn, yu yû ńg-sṳ̍p ke ví-pîn chhai thèu-chhièn hàng.
[7] Â-tô-nì-ngâ sṳt lâu Sé-lu-ngâ ke lai-é Yok-ap pin chi-sṳ̂ Â-pí-â-thâ chhâm-siòng ko; lióng-sà lûng-chúng chan-sṳ̀n, tap-yin chṳ̂-chhṳ̀ kì.
[8] Chúng-he chi-sṳ̂ Sat-tuk, Yâ-hò-yâ-thai ke lai-é Pí-nâ-ngâ, siên-tî Nâ-tân, Sṳ-mî, Li-yî lâu Thai-ví ke-têu sṳ-ví lûng-chúng m̀ chan-sṳ̀n Â-tô-nì-ngâ.
[9] Yû yit-ngit, Â-tô-nì-ngâ chhai Yún-Lò-kiet chhièn-súi fu-khiun ke “Sà-ngàm” ke-vi chhṳ̀ ngiù, yòng lâu se phì-ngiù lòi hien-chi, yu chhiáng Thai-ví-vòng khì-thâ ke lai-é lâu thai-sṳ̀n tui Yù-thai lòi chhâm-kâ hien-chi ke yèn-si̍t.
[10] Chúng-he kì mò chhiáng siên-tî Nâ-tân, Pí-nâ-ngâ lâu vòng ke-têu sṳ-ví, me mò chhiáng kiâ ló-thâi Só-lò-mùn.
[11] Só-yî, Nâ-tân hi kien Só-lò-mùn ke â-mê Pha̍t-sṳ-pâ, mun kì: “Ngì mò thâng-kóng Ha̍p-khi̍p ke lai-é Â-tô-nì-ngâ yí-kîn li̍p chhṳ-kâ cho vòng mò? Ngài-têu ke chú Thai-ví hàn m̀-tî liá-khien sṳ.
[12] Na-he ngì oi kiu chhṳ-kâ lâu ngiâ lai-é Só-lò-mùn ke sin-miang, ngài kien-ngi ngì,
[13] ngiàm-sṳ̀ hi kien Thai-ví-vòng, mun kì: ‘Ngâ chú ngâ vòng, ngì m̀-he chṳn-kîn tap-yin ko ngài, ngâ lai-é Só-lò-mùn yit-thin voi sṳ̀n-chiap ngì cho vòng, chhô ngì ke vòng-vi mò? Ngióng-pân liá-ha Â-tô-nì-ngâ cho vòng nè?’ ”
[14] Nâ-tân yu kóng: “Ngì hàn lâu vòng kóng-tén fa ke sṳ̀, ngài voi ngi̍p-hi, chṳn-sṳ̍t ngì só kóng ke fa.”
[15] Só-yî Pha̍t-sṳ-pâ to vòng ke kiên-fòng hi kien vòng. Vòng tông-ló lé; tui Sû-ngiam lòi ke se-moi-é Ngâ-pí-sâ chhai cheu-ku kì.
[16] Pha̍t-sṳ-pâ chhai vòng mien-chhièn khúi lo̍k-hi; vòng mun kì: “Ngì oi má-ke?”
[17] Pha̍t-sṳ-pâ kóng: “Ngâ chú ngâ vòng, ngì sṳt chṳ́-tén Song-chú — ngì Song-ti ke miàng fat-sṳ, oi pûn ngâ lai-é Só-lò-mùn sṳ̀n-chiap ngì cho vòng, chhô ngì ke vòng-vi.
[18] Chúng-he, Â-tô-nì-ngâ yí-kîn li̍p chhṳ-kâ cho vòng, ngì hàn m̀-tî.
[19] Kì chhṳ̀ chhin-tô ngiù, yòng lâu se phì-ngiù lòi hien-chi, yu chhiáng ngì só-yû ke lai-é, chi-sṳ̂ Â-pí-â-thâ lâu ngì kiûn-chhui ke ngièn-soi Yok-ap hi chhâm-kâ yèn-si̍t, chúng-he mò chhiáng ngì ke phu̍k-ngìn Só-lò-mùn.
[20] Ngâ chú ngâ vòng, chhiòn Yî-set-lie̍t ke ngìn-mìn kín khon ngì, tén ngì lâu kì-têu kóng, má-ngìn oi sṳ̀n-chiap ngì ke vòng-vi.
[21] Na-he ngì m̀-kóng, ngì ko-sṳ̂n yî-heu, ngài lâu ngâ lai-é Só-lò-mùn chhiu voi pûn-ngìn chún-cho chhui-ngìn lé.”
[22] Pha̍t-sṳ-pâ hàn lâu vòng kóng-tén fa ke sṳ̀, siên-tî Nâ-tân lòi-to vòng-kiûng.
[23] Yû-ngìn po-ko vòng kóng: “Siên-tî Nâ-tân to lé.” Nâ-tân ngi̍p-hi, chhai vòng mien-chhièn phu̍k lo̍k-hi khúi-tén,
[24] yèn-heu kóng: “Ngâ chú ngâ vòng, ngì sṳt kóng-ko oi Â-tô-nì-ngâ sṳ̀n-chiap ngì cho vòng, chhô ngì ke vòng-vi he-mò?
[25] Kîm-pû-ngit kì hi chhṳ̀ chhin-tô ngiù, yòng lâu se phì-ngiù lòi hien-chi, yu chhiáng ngì só-yû ke lai-é, ngì kiûn-chhui ke-têu kiûn-chóng lâu chi-sṳ̂ Â-pí-â-thâ chhô-chok. Liá-ha kì-têu lâu Â-tô-nì-ngâ khiung-ha lîm-sṳ̍t, yu thai-sâng hêm-kóng: ‘Â-tô-nì-ngâ-vòng van-soi!’
[26] Chúng-he Â-tô-nì-ngâ mò chhiáng ngài — chhiu-he ngì ke phu̍k-ngìn, chi-sṳ̂ Sat-tuk lâu Yâ-hò-yâ-thai ke lai-é Pí-nâ-ngâ, me mò chhiáng ngì ke phu̍k-ngìn Só-lò-mùn.
[27] Ngâ chú ngâ vòng ton-chṳ̂n thùng-yi liá-khien sṳ he-mò? Ngióng-pân m̀ lâu ngì ke phu̍k-ngìn kóng má-ngìn oi sṳ̀n-chiap ngì ke vòng-vi nè?”
[28] Só-yî, Thai-ví-vòng fûn-fu kóng: “Ham Pha̍t-sṳ-pâ ko-lòi.” Pha̍t-sṳ-pâ chhiu ko-lòi, khî chhai vòng mien-chhièn.
[29] Vòng fat-sṳ tui kì kóng: “Ngài chṳ́-tén ke kiu ngài thot-lì kok-chúng fam-nan ke yún-sên Song-chú tap-yin ngì,
[30] kîm-pû-ngit ngài oi chûn-sú ngài chṳ́-tén Song-chú — Yî-set-lie̍t Song-ti ke miàng só fat ke sṳ: Ngì ke lai-é Só-lò-mùn yit-thin voi sṳ̀n-chiap ngài cho vòng, chhô ngài ke vòng-vi.”
[31] Pha̍t-sṳ-pâ phu̍k lo̍k-hi khúi-tén kóng: “Ngien ngài ke chú Thai-ví-vòng van-soi!”
[32] Thai-ví-vòng yu fûn-fu ngìn hi ham chi-sṳ̂ Sat-tuk, siên-tî Nâ-tân lâu Yâ-hò-yâ-thai ke lai-é Pí-nâ-ngâ lòi. Kì-têu lòi-to vòng mien-chhièn,
[33] Thai-ví-vòng tui kì-têu kóng: “Ngì-têu oi tai-liâng kiûng-thìn ke kôn-chóng, pûn ngài ke lai-é Só-lò-mùn khì ngài ke lò-è, fu-sung kì to Kî-hiun ke chhièn-súi sùn.
[34] Chhai ke-vi, chi-sṳ̂ Sat-tuk lâu siên-tî Nâ-tân oi kò-yù li̍p kì cho Yî-set-lie̍t ke vòng. Ngì-têu oi phùn yòng-kok thai-sâng hêm: ‘Só-lò-mùn-vòng van-soi!’
[35] Yèn-heu ngì-têu oi fu-sung kì chón-to liá-vi lòi; kì oi chhô ngài ke vòng-vi, sṳ̀n-chiap ngài cho vòng, yîn-vi ngài yí-kîn li̍p kì cho Yî-set-lie̍t lâu Yù-thai ke thúng-chhṳ-chá.”
[36] Yâ-hò-yâ-thai ke lai-é Pí-nâ-ngâ kóng: “Ngien ngâ chú ngâ vòng ke chṳ́-yi sṳ̀n-chhiu! Ngien Song-chú — ngì ke Song-ti sṳ̀n-chhiòn liá-sṳ.
[37] Song-chú ngióng-pân lâu ngâ chú ngâ vòng thùng-chhai, ngien Kì cheu-yong lâu Só-lò-mùn thùng-chhai, sṳ́ kì ke khièn-sṳ pí ngâ chú Thai-ví-vòng ke khièn-sṳ hàn-kha khiòng-sṳn!”
[38] Só-yî chi-sṳ̂ Sat-tuk, siên-tî Nâ-tân, Yâ-hò-yâ-thai ke lai-é Pí-nâ-ngâ, pin ke-têu cho sṳ-ví ke Kî-li-thì-ngìn lâu Pí-li-thì-ngìn lûng-chúng hi, chhiáng Só-lò-mùn khì Thai-ví-vòng ke lò-è, fu-sung kì to Kî-hiun ke chhièn-súi sùn.
[39] Chi-sṳ̂ Sat-tuk tui piong yok-khui ke sṳn-chong-phùng tú tai-lòi yit-ke chông-mân sṳn-yù ke kok lòi kò-li̍p Só-lò-mùn cho vòng. Só-yî kì-têu phùn yòng-kok, ngìn-mìn chhiòn-phu thai-sâng hêm: “Só-lò-mùn-vòng van-soi!”
[40] Yèn-heu kì-têu chhiòn-phu thèn Só-lò-mùn chón-lòi, yit-lu thai-sâng hêm, yu phùn tha̍k-é, sâng-yîm thai to lièn thi ya voi chûn.
[41] Â-tô-nì-ngâ lâu kì ke ngìn-hak chang kiet-suk kì-têu ke yèn-si̍t, thâng-tó liá sâng-yîm. Yok-ap thâng-tó phùn yòng-kok ke sâng-yîm, chhiu mun: “Sàng-tú fat-sên má-ke sṳ? Án-thai ke sâng-yîm he má-ke yi-sṳ?”
[42] Kì-têu fa hàn-màng kóng-so̍t, chi-sṳ̂ Â-pí-â-thâ ke lai-é Yok-nâ-tân chhiu to. Â-tô-nì-ngâ kóng: “Ngi̍p-lòi! Ngì he hó-ngìn, ngì yit-thin he tai-lòi hó sêu-sit.”
[43] Yok-nâ-tân tui Â-tô-nì-ngâ kóng: “Fai-thet lé! Ngài-têu ke chú Thai-ví-vòng yí-kîn li̍p Só-lò-mùn cho vòng.
[44] Kì phai chi-sṳ̂ Sat-tuk, siên-tî Nâ-tân, Yâ-hò-yâ-thai ke lai-é Pí-nâ-ngâ, pin ke-têu cho sṳ-ví ke Kî-li-thì-ngìn lâu Pí-li-thì-ngìn fu-sung Só-lò-mùn, hàn pûn kì khì vòng ke lò-è.
[45] Chi-sṳ̂ Sat-tuk lâu siên-tî Nâ-tân chhai Kî-hiun ke chhièn-súi sùn kò-yù li̍p kì cho vòng. Kì-têu fu-sung kì ngi̍p-sàng, yit-lu thai-sâng hêm; ngìn-mìn chhiòn-phu thai-sâng en. Ke chhiu-he ngì-têu thèu-siên thâng-tó ke sâng-yîm.
[46] Só-lò-mùn yí-kîn tên-kî cho vòng lé.
[47] M̀ tân-chhiang án-ngiòng, lièn só-yû kiûng-thìn ke kôn-chóng ya hi kiûng-fo ngài-têu ke chú Thai-ví-vòng, tui kì kóng: ‘Ngien ngì ke Song-ti sṳ́ Só-lò-mùn pí ngì kien-yû miàng-sâng, kì ke khièn-sṳ pí ngì ke hàn-kha khiòng-sṳn!’ Thai-ví-vòng chhiu chhai mìn-chhòng táng phu̍k-tén kin-pai,
[48] khì-tó kóng: ‘Oi siung-chan Song-chú — Yî-set-lie̍t ke Song-ti! Kì kîm-pû-ngit sṳ́ ngài ke yit-ke heu-thoi sṳ̀n-chiap ngài ke vòng-vi, yu sṳ́ ngài hàn-sâng ke sṳ̀ chhîn-muk khon-tó liá-sṳ!’ ”
[49] Â-tô-nì-ngâ ke-têu ngìn-hak tông chho̍k-kiâng; kì-têu ngiàm-sṳ̀ khî hí-lòi, yit-ha chhiu si-san thet-hi.
[50] Â-tô-nì-ngâ ya kiâng Só-lò-mùn, chéu-to piong yok-khui ke sṳn-chong-phùng tú, châ-tén chi-thàn ke kok.
[51] Yû-ngìn lâu Só-lò-mùn kóng: “Â-tô-nì-ngâ yîn-vi kiâng Só-lò-mùn-vòng, liá-ha hi châ-tén chi-thàn ke kok, kóng: ‘Ngài oi Só-lò-mùn-vòng kîm-pû-ngit hiong ngài fat-sṳ, m̀ chiông phu̍k-ngìn chhṳ̀-sí.’ ”
[52] Só-lò-mùn kóng: “Kì na tui ngài chûng-sîm, kì yit-thiàu thèu-nà-mô ya m̀-voi lut-thet; kì na-he cho fái-sṳ, thin-chho̍k voi mò-miang.”
[53] Só-yî Só-lò-mùn-vòng phai-ngìn hi tui chi-thàn táng chiông Â-tô-nì-ngâ tai hâ-lòi. Â-tô-nì-ngâ lòi kien Só-lò-mùn-vòng, khúi chhai vòng mien-chhièn. Só-lò-mùn tui kì kóng: “Ngì cho-tet chón vuk-hâ lé!”