[1] Â-hî-tô-fut tui Ap-sâ-liùng kóng: “Chhiáng chún ngài sién yit-van lióng-chhiên ngìn; kîm-am-pû ngài chhiu hi tûi Thai-ví.
[2] Ngài oi chhai kì tông fôi-sîm tông khioi ke sṳ̀ kûng-kit kì; kì yit-thin voi kiâng-to mò kat-sat, thèn kì ke ngìn ya chhiòn-phu voi thò-chéu. Ngài voi tân-chhiang chhṳ̀ vòng,
[3] chiông kì ke kiûn-chhui tai-lòi kûi ngì, chhiu-chhiong sîn-ngiòng chón-to ló-kûng ke sṳ̂n-piên án-ngiòng. Ngì tân-chhiang chhṳ̀ yit-sà, khì-thâ ke ngìn chhiòn-phu voi phìn-ôn mò-sṳ.”
[4] Ap-sâ-liùng lâu Yî-set-lie̍t ke-têu chóng-ló chhiòn-phu ngin-vì liá he tông-hó ke chú-yi.
[5] Ap-sâ-liùng kóng: “Hi ham Â-kî-ngìn Fu-chhî lòi, ngài-têu ya oi thâng kì ke yi-kien.”
[6] Fu-chhî lòi-to, Ap-sâ-liùng tui kì kóng: “Â-hî-tô-fut lâu ngài-têu chhut án-ngiòng ke chú-yi, ngài-têu cheu kì ke thì-ngi hi cho hó-mò? Na-he ngì m̀ thùng-yi, ngì yû má-ke kien-ngi?”
[7] Fu-chhî en-kóng: “Â-hî-tô-fut liá-pái ke chú-yi m̀-hó.
[8] Ngì tî ngiâ-pâ Thai-ví lâu kì ke phu-ha chhiòn-phu he tông-voi siông-chhṳ̀ ke ngìn; kì-têu liá-ha chhiong pûn-ngìn chhióng-chéu se-yùng ke yùng-mà án-ok. Ngiâ-pâ he yit-ke kîn-ngiam fûng-fu ke chan-sṳ, am-pû-sṳ̀ yit-thin mò lâu kiûn-chhui khiung-ha he̍t.
[9] Kiâng-pha liá-ha kì khong chhai sân-lùng tú, ya-he phe̍t ke só-chhai. Kì yit chhut-sú kûng-tá ngì ke kiûn-chhui, thâng-tó ke ngìn yit-thin voi láu-tó ngì ke phu-ha tá-sû lé.
[10] Ke-sṳ̀, chhiu-he yúng-chong chhiong sṳ̂-é ke ngìn ya voi hak-to pan-sâng-sí; yîn-vi chhai Yî-set-lie̍t tông-chûng, má-ngìn tû tî ngiâ-pâ he thai yîn-hiùng, kì ke phu-ha ya chhiòn-phu he tông-voi siông-chhṳ̀ ke ngìn.
[11] Só-yî, ngài kien-ngi ngì seu-si̍p só-yû Yî-set-lie̍t-ngìn khiung-ha, tui chui pet-phién ke Tan to chui nàm-phién ke Phe̍t-sṳ-pâ, chhiong hói-sùn ke sâ-é án-tô, ngì chhîn-chhṳ tai-liâng kì-têu sông chan-chhòng.
[12] Mò-lun Thai-ví chhai nai-vi, ngài-têu thin-chho̍k voi chhìm-tó kì, yèn-heu, chhai kì mò chu-yi ke sṳ̀, ngài-têu voi lìm-to kì chhiong lu-súi lo̍k chhai thi-song yit-yong; án-ngiòng, kì lâu kì ke phu-ha yit-ke ya chéu m̀-thet.
[13] Na-he kì thui-to sàng-tú hi, ngài-têu liá-phién ke Yî-set-lie̍t-ngìn chhiu voi tai sok-è hi chiông ke-sàng lâi-hâ sân-lak! Lièn yit-lia̍p se sa̍k-é ya m̀-pûn kì liù chhai sân-táng.”
[14] Ap-sâ-liùng lâu só-yû Yî-set-lie̍t-ngìn chhiòn-phu kóng: “Â-kî-ngìn Fu-chhî ke kien-ngi pí Â-hî-tô-fut ke kha-hó.” Song-chú kiet-thin m̀-pûn Â-hî-tô-fut ke hó chú-yi su chhái-na̍p, vi-tó oi kong châi-fo chhai Ap-sâ-liùng sṳ̂n-song.
[15] Fu-chhî chiông kì hiong Ap-sâ-liùng pin Yî-set-lie̍t ke-têu chóng-ló só-thì ke kien-ngi lâu chi-sṳ̂ Sat-tuk pin Â-pí-â-thâ kóng, thùng-sṳ̀ ya lâu kì-têu kóng Â-hî-tô-fut ke kien-ngi.
[16] Fu-chhî yu kóng: “Kón-kín phai-ngìn hi lâu Thai-ví kóng, kîm-am-pû m̀-hó chhai khóng-yâ ke thu-sòn-thèu ko-ya, oi ngiàm-sṳ̀ ko Yok-tan-hò; án-ngiòng, vòng lâu phu-ha chang m̀-voi pûn-ngìn sêu-me̍t.”
[17] Ke-sṳ̀, Â-pí-â-thâ ke lai-é Yok-nâ-tân lâu Sat-tuk ke lai-é Â-hî-mâ-sṳ̂ chhai Yâ-lu-sat-lâng ngoi-vì ke Yún-Lò-kiet chhièn-súi sùn-thèu tén-tén, yîn-vi kì-têu m̀-kám ngi̍p-sàng, kiâng-pha pûn-ngìn fat-hien. Yû yit-ke sṳ́-ńg sòng-sòng lòi lâu kì-têu kóng só fat-sên ke sṳ, kì-têu chhiu chón-hi lâu Thai-ví-vòng kóng.
[18] Chúng-he yû yit-ngit, yit-ke se-â-kô-é khon-tó kì-têu, chhiu hi lâu Ap-sâ-liùng kóng. Lióng-sà kón-kín chéu-hi khong chhai Pâ-fu-lìm mêu-ngìn ke vuk-hâ. Ke-ngìn ke vò-thàng yû yit-héu chiáng, kì-têu chhiu lo̍k chiáng-tú hi.
[19] Ke-ngìn ke pû-ngiòng yung chiáng-koi chiông chiáng-héu khièm-hó, yu chhai táng-kô ve-têu ma̍k-é, miên-tet pûn-ngìn chu-yi tó.
[20] Ap-sâ-liùng ke kôn-yèn to liá-ngìn vuk-hâ lòi, mun ke fu-ngìn-kâ kóng: “Â-hî-mâ-sṳ̂ lâu Yok-nâ-tân chhai nai-vi?” Fu-ngìn-kâ en-kóng: “Kì-têu ko-hò hi lé.” Ke-têu ngìn chhìm-lòi chhìm-hi chhìm m̀-tó kì-têu, chhiu chón Yâ-lu-sat-lâng hi lé.
[21] Ke-têu ngìn lì-khôi yî-heu, Â-hî-mâ-sṳ̂ lâu Yok-nâ-tân tui chiáng-tú sông-lòi, hi hiong Thai-ví-vòng po-ko Â-hî-tô-fut kie-mèu tûi-sat vòng ke sṳ, yu kóng: “Kiak-kiak ko-hò hi!”
[22] Só-yî Thai-ví lâu thèn kì ke ngìn chhiòn-phu khôi-sṳ́ ko Yok-tan-hò hi. To thiên-kông ke sṳ̀, kì-têu chhiòn-phu ko-hi lé.
[23] Â-hî-tô-fut khon chhṳ-kâ ke kien-ngi mò pûn-ngìn chhái-na̍p, chhiu khì lì-è chón kâ-hiông hi. Kì chiông chhṳ-kâ ke heu sṳ kâu-tai chhîn-chhú, chhiu tiau-kiáng chhṳ-sat. Yû-ngìn chiông kì mài chhai kiâ kâ-chhu̍k ke fùn-mu.
[24] Ap-sâ-liùng lâu kì ke kiûn-chhui ko Yok-tan-hò ke sṳ̀, Thai-ví yí-kîn to Mâ-ha̍p-ngiam.
[25] (Ap-sâ-liùng yí-kîn phai Â-mâ-sat cho ngièn-soi, thoi Yok-ap. Â-mâ-sat he Yî-sṳ̍t-mâ-li-ngìn Yit-thiap ke lai-é. Kiâ-mê Oi-pí-kâi he Nâ-hot ke moi-é, lâu Yok-ap ke â-mê Sé-lu-ngâ he chí-moi.)
[26] Ap-sâ-liùng lâu Yî-set-lie̍t-ngìn chhai Kî-lie̍t ôn-yàng.
[27] Thai-ví to Mâ-ha̍p-ngiam ke sṳ̀, yû sâm-ke ngìn chhut-lòi ngiàng-chiap kì. Kì-têu he Â-mùn-chhu̍k ke Lâ-pâ-ngìn Nâ-hot ke lai-é Sok-pí, Lò-Tí-pâ-ngìn Â-mí-li ke lai-é Mâ-kit, lâu Kî-lie̍t ke Lò-kî-lìm-ngìn Pâ-sî-lòi.
[28] Kì-têu tai-tén vo̍k-thèu, vón, phî, sṳ̍t-vu̍t pûn Thai-ví lâu thèn kì ke ngìn. Sṳ̍t ke tûng-sî yû séu-ma̍k, thai-ma̍k, ma̍k-phién, phoi-su̍k ke ma̍k-chhon, si-kui theu, ván-theu,
[29] phûng-thòng, nen-piáng, nen-yù lâu mièn-yòng. Kì-têu kóng, Thai-ví lâu thèn kì ke ngìn chhai khóng-yâ yit-thin yu khioi yu kî-hot.